Petrol Price
कोरपणा मध्ये ६०० विद्यार्थ्यांनी घेतली नशामुक्ती ची शपथ
विदर्भ न्यूज एक्सप्रेस
प्रतिनिधी / चंद्रपूर : जागतिक अंमली पदार्थ विरोधी दिनानिमित्त स्टेल मॅरिस स्कूल, कोरपणायेथे विद्यार्थ्यांमध्ये अंमली पदार्थांविरोधात जनजागृती करण्यात आली. यावेळी शाळेतील सुमारे ६०० विद्यार्थी-विद्यार्थिनींनी अंमली पदार्थांचे सेवन न करण्याची शपथ घेतली.या कार्यक्रमात कोरपणा पोलीस ठाण्याच्या ठाणेदार लता वढीवे यांनी विद्यार्थ्यांना मार्गदर्शन केले. त्यांनी अंमली पदार्थांचे सेवन टाळण्यासोबतच कायद्याचे पालन, सायबर गुन्हे, वाहतूक नियम, POCSO कायदा, बालवयात नकळत होणाऱ्या चुका टाळण्याचे उपाय, चांगल्या मित्रांची निवड तसेच सुजाण नागरिक म्हणून असलेली कर्तव्ये याबाबत विद्यार्थ्यांना मार्गदर्शन केले.
यावेळी विद्यार्थ्यांनी उत्स्फूर्त सहभाग नोंदवत मानवी साखळीच्या माध्यमातून भारताचा नकाशा तयार केला. या मानवी साखळीतून NO DRUGS असा संदेश साकारण्यात आला. विद्यार्थ्यांनी स्वतःच्या मेहनतीने साकारलेल्या या उपक्रमातून अंमली पदार्थांविरोधात प्रभावी जनजागृती करण्यात आली.
यावेळी पोलीस दीदी, पोलीस काका आणि पोलीस मित्र या संकल्पनांचीही विद्यार्थ्यांना माहिती देण्यात आली. तसेच आपल्या हातून एखादा गुन्हा घडल्यास त्याचे भविष्यातील परिणाम काय होऊ शकतात, याबाबत विद्यार्थ्यांना सावध करण्यात आले. विविध शासकीय व खासगी नोकऱ्यांसाठी चारित्र्य पडताळणीचे महत्त्वही समजावून सांगण्यात आले.
विद्यार्थ्यांना हर जुर्म से पहले एक आहट होती है. उस आहट को नजरअंदाज न करें. थोड़ा रुकें और सही निर्णय लें. असा संदेश देत कोणतीही कृती करण्यापूर्वी थांबून विचार करण्याचे आवाहन करण्यात आले.अंमली पदार्थांपासून दूर राहणे, कायद्याचे पालन करणे, सायबर गुन्ह्यांपासून सावध राहणे आणि जबाबदार नागरिक म्हणून आपली भूमिका पार पाडणे, याबाबत विद्यार्थ्यांना मार्गदर्शन करण्यात आले. कार्यक्रमाला विद्यार्थ्यांचा उत्स्फूर्त प्रतिसाद मिळाला.
