Petrol Price
थंडीची प्रतीक्षा, गरम कपड्यांच्या विक्रीची चिंता : आरमोरीतील बाजारपेठ अद्याप थंडच!
- नोव्हेंबर उजाडला तरी थंडीचा जोर नाही; स्वेटर, कानटोप्या, जॅकेट आणि ब्लँकेटच्या विक्रीला अपेक्षित प्रतिसाद मिळेना
विदर्भ न्यूज एक्सप्रेस
तालुका प्रतिनिधी / आरमोरी : नोव्हेंबर महिना सुरू झाला की गुलाबी थंडीची चाहूल लागते आणि हिवाळ्याच्या तयारीसाठी नागरिकांची गरम कपड्यांच्या खरेदीसाठी बाजारपेठेत गर्दी होऊ लागते. मात्र, यंदा नोव्हेंबर महिना उजाडूनही थंडीचा जोर जाणवत नसल्याने आरमोरी शहरातील गरम कपड्यांचा बाजार अद्याप थंडच असल्याचे चित्र आहे. दिवसा उन्हाचा चटका कायम असून रात्रीही अपेक्षित गारवा जाणवत नसल्याने नागरिकांकडून स्वेटर, जॅकेट, कानटोप्या आणि ब्लँकेटच्या खरेदीला अद्याप सुरुवात झालेली नाही. परिणामी, हंगामी व्यावसायिकांना ग्राहकांच्या प्रतीक्षेत राहावे लागत आहे.
हिवाळ्याच्या दिवसांत सर्वाधिक मागणी असणारे स्वेटर, कानटोप्या, मफलर, उबदार जॅकेट, शाल आणि लहान मुलांचे गरम कपडे बाजारात विक्रीसाठी उपलब्ध झाले आहेत. मात्र, थंडीचा प्रभाव नसल्यामुळे ग्राहक दुकानांमध्ये येऊन वस्तूंचे दर विचारत असले तरी प्रत्यक्ष खरेदीचे प्रमाण कमी आहे. त्यामुळे व्यापाऱ्यांच्या अपेक्षेप्रमाणे व्यवसायाला अद्याप गती मिळालेली नाही.
कानटोप्या, हुडी आणि स्टायलिश जॅकेटला पसंती -
यंदा गरम कपड्यांच्या बाजारात आकर्षक रंगांचे स्वेटर, हुडी, फुल स्लीव्ह जॅकेट, फॅन्सी कानटोप्या आणि मफलर यांना मागणी राहण्याची शक्यता आहे. लहान मुलांसाठी कार्टून डिझाइन असलेल्या रंगीबेरंगी उबदार कपड्यांचीही विविधता उपलब्ध आहे. तरुणांमध्ये हलके, स्टायलिश आणि आरामदायी जॅकेट लोकप्रिय होत आहेत. बाजारात विविध प्रकारचे स्वेटर १०० रुपयांपासून ते एक हजार रुपयांपर्यंत उपलब्ध असल्याची माहिती व्यापाऱ्यांनी दिली.
तिबेटियन विक्रेतेही थंडीच्या प्रतीक्षेत -
दरवर्षी हिवाळ्याच्या हंगामात विविध शहरांमध्ये तिबेटियन विक्रेत्यांकडून गरम कपड्यांची दुकाने थाटली जातात. हिवाळ्याच्या सुरुवातीलाच हे विक्रेते विविध प्रकारचे स्वेटर, जॅकेट, शाल, मफलर आणि ब्लँकेट विक्रीसाठी आणतात. मात्र, यंदा थंडीचा जोर नसल्याने ग्राहकांचा प्रतिसाद कमी आहे. थंडी वाढल्यानंतरच व्यवसायाला गती मिळेल, अशी अपेक्षा विक्रेत्यांना आहे.
मोठ्या बाजारपेठांतून आणला जातो माल -
गरम कपड्यांच्या विक्रीसाठी येणारे व्यापारी प्रामुख्याने दिल्ली, नागपूर आणि इतर मोठ्या घाऊक बाजारपेठांतून माल खरेदी करतात. काही विक्रेते थेट उत्पादकांकडून, तर काही घाऊक व्यापाऱ्यांकडून विविध प्रकारचे कपडे आणतात. मालाची खरेदी, वाहतूक आणि दुकानांची व्यवस्था यासाठी आधीच खर्च करावा लागतो. मात्र, ग्राहकांची वर्दळ कमी असल्याने व्यापाऱ्यांची चिंता वाढली आहे.
किमतीतही काही प्रमाणात वाढ -
कच्च्या मालाच्या किमती, वाहतूक आणि उत्पादन खर्चातील बदलांमुळे यंदा गरम कपड्यांच्या किमतीत काही प्रमाणात वाढ झाली आहे. स्वेटर, जॅकेट, ब्लँकेट आणि कानटोप्यांचे दर त्यांच्या गुणवत्ता, प्रकार आणि आकारानुसार वेगवेगळे आहेत. त्यामुळे ग्राहकांना यंदा गरम कपड्यांच्या खरेदीसाठी तुलनेने अधिक पैसे मोजावे लागू शकतात.
नेहरू चौक, जुना बसस्थानक परिसरात दुकाने सजली -
आरमोरी शहरातील नेहरू चौक, जुना बसस्थानक परिसर, गुजरी परिसर तसेच प्रमुख बाजारपेठांमध्ये हंगामी गरम कपड्यांची दुकाने सजू लागली आहेत. नागरिकांच्या सोयीसाठी विविध प्रकारचे स्वेटर, जॅकेट, शाल आणि ब्लँकेट विक्रीसाठी उपलब्ध करून देण्यात आले आहेत. सध्या बाजारात गरम कपड्यांची मागणी कमी आहे. ग्राहक दुकानात येऊन दर विचारतात; मात्र खरेदी करण्याचे प्रमाण कमी आहे. थंडीचा जोर वाढल्यानंतर विक्रीला चांगला प्रतिसाद मिळेल, अशी अपेक्षा आहे, अशी प्रतिक्रिया व्यावसायिक मिलिंद आखाडे यांनी दिली.
तर व्यापारी मनोज जिवानी यांनीही नागरिकांच्या सोयीसाठी विविध प्रकारचे गरम कपडे बाजारात उपलब्ध असल्याचे सांगितले. एकंदरीत, थंडीची चाहूल लागण्याची प्रतीक्षा नागरिकांप्रमाणेच गरम कपड्यांच्या व्यावसायिकांनाही लागली असून, तापमानात घट झाल्यानंतर बाजारपेठेत ग्राहकांची गर्दी वाढण्याची अपेक्षा व्यापारी व्यक्त करीत आहेत.
