Petrol Price
सात महिन्यांपासून वनमजुरांचे मानधन थकीत : दिवाळीपूर्वी वेतन देण्याची मागणी
- वनसंवर्धनाची जबाबदारी पार पाडणाऱ्या मजुरांवर आर्थिक संकट; कुटुंबाचा उदरनिर्वाह करणे कठीण
विदर्भ न्यूज एक्सप्रेस
प्रतिनिधी / भंडारा : वनसंवर्धन, रोपवनांची देखभाल आणि वृक्षलागवडीसह विविध कामांची जबाबदारी पार पाडणाऱ्या वनमजुरांवरच सध्या आर्थिक संकट ओढवले आहे. सामाजिक वनीकरण परिक्षेत्र, साकोली अंतर्गत लाखनी तालुक्यात अभिसरण योजनेच्या माध्यमातून सुरू असलेल्या मुख्य मार्गाच्या दुतर्फा वृक्षारोपण तसेच गट वृक्षलागवडीच्या कामांवर कार्यरत किटाडी व परिसरातील वनमजुरांचे एप्रिल २०२६ पासूनचे मागील सात महिन्यांचे मानधन अद्याप मिळालेले नाही. त्यामुळे या मजुरांवर आर्थिक अडचणींचा सामना करण्याची वेळ आली असून, त्यांच्या कुटुंबाच्या उदरनिर्वाहाचा प्रश्न गंभीर बनला आहे.
सामाजिक वनीकरण विभागाच्या माध्यमातून राबविण्यात येणाऱ्या वृक्षलागवड आणि वनसंवर्धनाच्या कामांमध्ये किटाडी व परिसरातील वनमजूर नियमितपणे आपली जबाबदारी पार पाडत आहेत. निर्धारित कालावधीत त्यांनी प्रामाणिकपणे आणि पूर्ण जबाबदारीने काम करून वनसंरक्षण व पर्यावरण संवर्धनासाठी योगदान दिले आहे. मात्र, काम पूर्ण करूनही त्यांच्या मेहनतीचे मानधन वेळेवर मिळत नसल्याने वनमजुरांमध्ये तीव्र नाराजी व्यक्त होत आहे.
गेल्या सात महिन्यांपासून मानधनाची रक्कम प्रलंबित असल्याने मजुरांना दैनंदिन गरजा भागविणे कठीण झाले आहे. कुटुंबाचा उदरनिर्वाह, मुला-मुलींचे शैक्षणिक खर्च, घरखर्च तसेच इतर आवश्यक बाबींसाठी आर्थिक अडचणी निर्माण झाल्या आहेत. स्वतःच्या मेहनतीचे पैसे मिळविण्यासाठी वारंवार प्रतीक्षा करावी लागत असल्याने वनमजुरांमध्ये संतापाचे वातावरण आहे.
दिवाळीपूर्वी थकीत मानधन अदा करण्याची मागणी -
दिवाळीचा सण जवळ आला असताना सात महिन्यांचे मानधन थकीत असल्याने वनमजुरांच्या अडचणीत आणखी भर पडली आहे. सणासुदीच्या काळात कुटुंबाच्या गरजा पूर्ण करण्यासाठी पैशांची आवश्यकता असतानाही हक्काचे मानधन मिळत नसल्याने मजूर आर्थिक विवंचनेत सापडले आहेत. त्यामुळे सामाजिक वनीकरण विभागाच्या वरिष्ठ अधिकाऱ्यांनी या प्रकरणाची तातडीने दखल घेऊन वनमजुरांचे एप्रिल २०२६ पासूनचे संपूर्ण थकीत मानधन दिवाळीपूर्वी अदा करावे, अशी मागणी वनमजुरांकडून होत आहे.
सामाजिक वनीकरण विभागात वनमजूर म्हणून कार्यरत असून, निर्धारित वेळेत जबाबदारीने काम केले आहे. मात्र, सात महिन्यांचे मानधन अद्याप मिळालेले नाही. कुटुंबाच्या गरजा, मुला-मुलींचा शैक्षणिक खर्च आणि इतर आवश्यक बाबी पूर्ण करताना मोठ्या आर्थिक अडचणींचा सामना करावा लागत आहे. स्वतःच्या मेहनतीचे मानधन मिळण्यासाठी प्रतीक्षा करावी लागत असल्याने दिवाळीपूर्वी थकीत मानधन अदा करावे.
