Petrol Price
एटीएममधून कमी आलेले पैसे परत देण्याच्या बहाण्याने ५.४३ लाखांची फसवणूक : सायबर भामटा कोलकात्यातून जेरबंद
विदर्भ न्यूज एक्सपरीस
प्रतिनिधी / चंद्रपूर : एटीएममधून पैसे कमी आल्याची तक्रार केल्यानंतर उर्वरित रक्कम परत मिळवून देण्याचे आमिष दाखवत एका शालेय मुख्याध्यापिकेची तब्बल ५ लाख ४३ हजार रुपयांनी ऑनलाईन फसवणूक करणाऱ्या आंतरराज्यीय सायबर भामट्याला चंद्रपूर सायबर पोलिसांनी पश्चिम बंगालमधील कोलकाता येथून अटक केली आहे. अंगद सुरज प्रजापती (वय २१), रा. कोलकाता, पश्चिम बंगाल असे अटक करण्यात आलेल्या आरोपीचे नाव असून, चार दिवस अहोरात्र शोधमोहीम राबवून पोलिसांनी त्याला जेरबंद केले. पोलीस कोठडी संपल्यानंतर ७ नोव्हेंबर रोजी न्यायालयात हजर केले असता त्याची न्यायालयीन कोठडीत रवानगी करण्यात आली असून, त्याची चंद्रपूर जिल्हा कारागृहात पाठवणी करण्यात आली आहे.
या प्रकरणातील ५८ वर्षीय शालेय मुख्याध्यापिकेने ३० ऑगस्ट २०२६ रोजी ॲक्सिस बँकेच्या एटीएममधून पाच हजार रुपये काढण्याचा प्रयत्न केला होता. मात्र, त्यांच्या खात्यातून रक्कम वजा होऊनही एटीएममधून ९०० रुपये कमी मिळाले. याबाबत त्यांनी बँकेत रीतसर तक्रार नोंदवली होती. हीच बाब हेरून सायबर भामट्याने त्यांना अनोळखी मोबाईल क्रमांकावरून फोन केला. बँकेचा कर्मचारी असल्याचे भासवत एटीएममधून ९०० रुपये कमी आल्याची खात्री करून त्याने त्यांचा विश्वास संपादन केला.
त्यानंतर आरोपीने व्हॉट्सॲपवर बनावट एपीके (APK) फाईल पाठवून ती डाऊनलोड करण्यास सांगितले. या ॲपमध्ये बँकेचा एटीएम पिन आणि सीव्हीव्ही क्रमांक भरण्यास सांगून आरोपीने बँक खात्याची गोपनीय माहिती मिळवली. त्यानंतर विविध ऑनलाईन व्यवहारांच्या माध्यमातून खात्यातील ५ लाख ४३ हजार रुपये परस्पर वळवून घेतले. आपली फसवणूक झाल्याचे लक्षात आल्यानंतर या प्रकरणी चंद्रपूर सायबर पोलीस ठाण्यात गुन्हा क्रमांक ००६/२०२६ अन्वये भारतीय न्याय संहिता आणि माहिती तंत्रज्ञान कायद्याच्या विविध कलमांखाली गुन्हा दाखल करण्यात आला.
गुन्ह्याचे गांभीर्य लक्षात घेऊन पोलीस अधीक्षक आयुष नोपाणी यांनी विशेष तपास पथक तयार करून पश्चिम बंगालमधील कोलकाता येथे रवाना केले. सायबर पोलीस ठाण्याचे सहाय्यक पोलीस निरीक्षक निलेश गिरी, पोलीस अंमलदार राहुल पोंदे, अनिमेश भोंगळे आणि पंकज बावणे यांच्या पथकाने स्थानिक पोलिसांच्या मदतीने सलग चार दिवस अहोरात्र शोधमोहीम राबवली. तांत्रिक विश्लेषणाच्या आधारे आरोपीचा माग काढत उल्टाडांगा पोलीस ठाण्याच्या हद्दीतून अंगद सुरज प्रजापती याला ताब्यात घेऊन अटक करण्यात आली.
आरोपीला चंद्रपूर येथे आणल्यानंतर न्यायालयाकडून तीन दिवसांची पोलीस कोठडी मिळवण्यात आली. या काळात त्याची सखोल चौकशी करण्यात आली असून, फसवणुकीच्या या प्रकारात सहभागी असलेले इतर साथीदार आणि संपूर्ण सायबर नेटवर्कचा शोध घेण्याचे काम पोलिसांकडून सुरू आहे. ७ नोव्हेंबर रोजी पोलीस कोठडीची मुदत संपल्यानंतर आरोपीला न्यायालयात हजर करण्यात आले. न्यायालयाने त्याची न्यायालयीन कोठडीत रवानगी केली.
सदर कारवाई पोलीस अधीक्षक आयुष नोपाणी, अपर पोलीस अधीक्षक ईश्वर कातकडे आणि उपविभागीय पोलीस अधिकारी प्रमोद चौगुले यांच्या मार्गदर्शनाखाली सायबर पोलीस ठाण्याचे पोलीस निरीक्षक सुनील गाडे यांचा नेतृत्वात सहाय्यक पोलीस निरीक्षक निलेश गिरी,सहाय्यक पोलीस निरीक्षक राजेंद्र सोनवणे, अनिसा सय्यद, सहाय्यक पोलीस निरीक्षक राजेंद्र सोनवणे, अनिसा सय्यद, सहायक पोलीस उपनिरीक्षक मुजावर अली, पोलीस हवालदार कार्तिक खनके, उमेश रोडे, पोलीस अंमलदार राहुल पोंदे, अनिमेश भोंगळे, पंकज बावणे, गुणवंत मुंडके, साहिल आवारी, छाया शंभरकर, पूजा जांभुळे, अंजली घिवे आणि श्रुतीका घाईत यांनी केले.
दरम्यान, बँकेचे अधिकारी किंवा कर्मचारी फोनवरून कधीही एटीएम पिन, ओटीपी अथवा सीव्हीव्ही क्रमांकासारखी गोपनीय माहिती मागत नाहीत. अनोळखी व्यक्तीकडून व्हॉट्सॲप किंवा संदेशाद्वारे पाठवण्यात आलेल्या एपीके फाईल डाऊनलोड करू नयेत. कोणत्याही परिस्थितीत बँक खात्याची गोपनीय माहिती इतरांना देऊ नये. ऑनलाईन फसवणूक झाल्यास तातडीने १९३० या सायबर हेल्पलाईन क्रमांकावर संपर्क साधावा, असे आवाहन चंद्रपूर सायबर पोलिसांनी केले आहे.
