Petrol Price
पेंच जलाशयात बुडून ६५ वर्षीय मच्छीमाराचा मृत्यू
- मासेमारीसाठी गेले असता घडली दुर्घटना; रात्रभर शोध, दुसऱ्या दिवशी सकाळी आढळला मृतदेह
विदर्भ न्यूज एक्सप्रेस
प्रतिनिधी / नागपूर : मासेमारीसाठी पेंच जलाशयात गेलेल्या ६५ वर्षीय मच्छीमाराचा पाण्यात बुडून मृत्यू झाल्याची दुर्दैवी घटना समोर आली आहे. महादेव अखंडू चामलाटे ६५ वर्षे रा. बच्छेरा टोली, ता. पारशिवनी असे मृत मच्छीमाराचे नाव आहे. शुक्रवारी सकाळी मासेमारीसाठी घराबाहेर पडलेले महादेव चामलाटे रात्री उशिरापर्यंत घरी परतले नाहीत. त्यामुळे कुटुंबीयांनी स्थानिक नागरिकांच्या मदतीने त्यांचा शोध घेतला. अखेर शनिवारी सकाळी नवेगाव (खैरी) शिवारातील पेंच जलाशयात त्यांचा मृतदेह पाण्यावर तरंगताना आढळून आला. या घटनेमुळे बच्छेरा टोली परिसरात हळहळ व्यक्त होत आहे.
नेहमीप्रमाणे मासेमारीसाठी गेले -
मिळालेल्या माहितीनुसार, महादेव चामलाटे हे शुक्रवारी सकाळी सुमारे ६ वाजताच्या सुमारास पारशिवनी तालुक्यातील नवेगाव (खैरी) शिवारात असलेल्या पेंच जलाशयात मासेमारी करण्यासाठी गेले होते. ते नेहमीप्रमाणे मासेमारीसाठी गेल्याने कुटुंबीयांना सुरुवातीला कोणतीही शंका आली नाही. मात्र, दिवसभर उलटून रात्र झाली तरी ते घरी परतले नाहीत. त्यामुळे कुटुंबीयांची चिंता वाढली. त्यांनी स्थानिक नागरिकांच्या मदतीने जलाशय आणि आजूबाजूच्या परिसरात त्यांचा शोध सुरू केला. बराच वेळ शोध घेऊनही त्यांचा ठावठिकाणा लागला नाही. रात्री अंधार वाढल्यामुळे शोधमोहीम थांबविण्यात आली. त्यानंतर दुसऱ्या दिवशी सकाळी पुन्हा शोध घेण्याचे ठरविण्यात आले.
सकाळी पाण्यावर तरंगताना आढळला मृतदेह -
शनिवारी सकाळी कुटुंबीय आणि स्थानिक नागरिकांनी पुन्हा शोधमोहीम सुरू केली. यावेळी महादेव चामलाटे यांचा मृतदेह पेंच जलाशयाच्या पाण्यावर तरंगताना आढळून आला. ही माहिती मिळताच स्थानिक पोलिस पाटील केशव वरखडे यांनी पोलिसांना घटनेची सूचना दिली. माहिती मिळाल्यानंतर पारशिवनी पोलिसांनी तातडीने घटनास्थळी धाव घेतली. पोलिसांनी घटनास्थळाची पाहणी करून पंचनामा केला. त्यानंतर मृतदेह उत्तरीय तपासणीसाठी पारशिवनी शहरातील ग्रामीण रुग्णालयात पाठविण्यात आला.
पारशिवनी पोलिसांकडून तपास सुरू -
या प्रकरणी पारशिवनी पोलिसांनी अकस्मात मृत्यूची नोंद केली आहे. महादेव चामलाटे यांचा मृत्यू नेमक्या कोणत्या परिस्थितीत झाला, याचा तपास पोलिसांकडून करण्यात येत आहे. ठाणेदार किशोर शेरकी यांच्या मार्गदर्शनाखाली पारशिवनी पोलिस पुढील तपास करीत आहेत. मासेमारीसाठी घराबाहेर पडलेल्या महादेव चामलाटे यांचा अशा प्रकारे दुर्दैवी मृत्यू झाल्याने त्यांच्या कुटुंबीयांवर दुःखाचा डोंगर कोसळला आहे. या घटनेमुळे बच्छेरा टोलीसह परिसरात शोककळा पसरली आहे.
