Petrol Price
स्थानिक महिला उद्योजिकांसाठी अंकुर दीपावली बाजारचे आयोजन
- अमृत संस्था आणि महिला कला निकेतनचा संयुक्त उपक्रम
विदर्भ न्यूज एक्सप्रेस
प्रतिनिधी / नागपूर : स्थानिक महिला उद्योजिकांना हक्काचे व्यासपीठ मिळवून देण्यासाठी तसेच व्होकल फॉर लोकल आणि आत्मनिर्भर भारत या संकल्पनेला बळ देण्यासाठी अमृत (महाराष्ट्र संशोधन, उन्नती व प्रशिक्षण प्रबोधिनी) आणि ‘महिला कला निकेतन यांच्या संयुक्त विद्यमाने उद्या ३१ ऑक्टोबर विशेष अंकुर दीपावली बाजार व अमृत पेठ या प्रदर्शनाचे आयोजन करण्यात आले आहे. स्थानिक महिला उद्योजिकांनी तयार केलेल्या विविध दिवाळी उपयुक्त व कलात्मक वस्तूंचे स्टॉल्स असलेले हे प्रदर्शन महिला कला निकेतन, ५८५, गिरीपेठ, नागपूर येथे भरवण्यात येत असून प्रवेश निशुल्क आहे. प्रदर्शनाची वेळ दुपारी ४ ते रात्री ९ ठेवण्यात आली आहे.
सणासुदीच्या काळात स्थानिक उत्पादनांना प्रोत्साहन मिळावे आणि महिलांच्या स्वावलंबनाला हातभार लागावा, हा या उपक्रमाचा मुख्य उद्देश असल्याचे अमृतचे नागपूर जिल्हा व्यवस्थापक आदित्य कुलकर्णी यांनी सांगितले. या प्रदर्शनात सजावटीच्या वस्तू आकाश कंदील, आकर्षक पणत्या, बोरोसिलीकेट काचेचे दिवे, तयार रांगोळ्या, एमडीएफ, क्रोशा व मॅक्रमच्या वस्तू येथे विक्रीसाठी उपलब्ध असून विविध प्रकारची वस्त्र प्रावरणे तसेच घरगुती व आरोग्यदायी खाद्यपदार्थांच्या दालनात सुकामेव्याचे लाडू, आयुर्वेदिक उत्पादने, घरगुती चॉकलेट, उकडीचे मोदक, कटलेट तसेच धान्यांची मिश्र पिठे येथे विक्रीस असणार आहेत. नागरिकांनी या प्रदर्शनाला भेट देऊन महिला उद्योजिकांना प्रोत्साहन द्यावे, असे आवाहन आयोजकांतर्फे करण्यात आले आहे.
