Petrol Price
आदिवासी समाजाच्या सांस्कृतिक वारशाचे जतन आणि एकजुटीवर भर : पोंभुर्ण्यात धर्मचिंतन परिषद
विदर्भ न्यूज एक्सप्रेस
प्रतिनिधी / चंद्रपूर : आदिवासी समाजाच्या रूढी, परंपरा, संस्कृती, ऐतिहासिक वारसा आणि सामाजिक प्रश्नांवर चिंतन करण्याच्या उद्देशाने पोंभुर्णा येथे आयोजित आदिवासी धर्मचिंतन परिषद उत्साहपूर्ण वातावरणात संपन्न झाली. या परिषदेला आदिवासी समाजातील विविध संघटनांचे पदाधिकारी, सामाजिक क्षेत्रात कार्यरत कार्यकर्ते तसेच समाजबांधव मोठ्या संख्येने उपस्थित होते. आदिवासी समाजाची एकजूट, सांस्कृतिक अस्मितेचे जतन आणि आगामी २०२७ च्या जनगणनेत आदिवासी म्हणून नोंद होण्याच्या महत्त्वावर यावेळी विशेष भर देण्यात आला.
परिषदेच्या अध्यक्षस्थानी माजी सामाजिक न्याय मंत्री तथा अखिल भारतीय आदिवासी विकास परिषदेचे राष्ट्रीय उपाध्यक्ष अॅड. शिवाजीराव मोघे होते. माजी आमदार डॉ. नामदेवराव उसेंडी यांच्या हस्ते परिषदेचे उद्घाटन करण्यात आले. प्रमुख मार्गदर्शक म्हणून बिरसा क्रांती दलाचे राष्ट्रीय अध्यक्ष दशरथजी मडावी उपस्थित होते. प्रमुख पाहुणे म्हणून नाशिकचे माजी आदिवासी आयुक्त संभाजीराव सरकुंडे, बिरसा क्रांती दलाचे महाराष्ट्र प्रदेशाध्यक्ष डी. बी. अंबुरे, अखिल भारतीय आदिवासी विकास परिषदेचे प्रदेशाध्यक्ष रामसाहेब चव्हाण, चंद्रपूर महानगरपालिकेच्या नगरसेविका सरला कुलसंगे, परिषदेच्या जिल्हा शहराध्यक्ष बेबीताई उईके, जिल्हाध्यक्ष जनार्दन गेडाम आदी मान्यवर उपस्थित होते.
उद्घाटनपर भाषणात डॉ. नामदेवराव उसेंडी यांनी आदिवासी समाजाच्या सामाजिक, सांस्कृतिक आणि शैक्षणिक स्थितीवर प्रकाश टाकत समाजाच्या सर्वांगीण विकासासाठी एकत्रित प्रयत्नांची आवश्यकता व्यक्त केली. प्रमुख मार्गदर्शक दशरथ मडावी यांनी आदिवासी समाजाच्या पारंपरिक रूढी, प्रथा, सांस्कृतिक वारसा आणि ऐतिहासिक पार्श्वभूमीवर सविस्तर मार्गदर्शन केले. आपल्या मूळ संस्कृतीचे जतन करून पुढील पिढीपर्यंत आदिवासी समाजाचा इतिहास आणि परंपरा पोहोचविण्याचे आवाहन त्यांनी केले.
यावेळी डी. बी. अंबुरे, रामसाहेब चव्हाण, जगन येलके, संभाजीराव सरकुंडे आणि जनार्दन गेडाम यांनीही आपले विचार मांडले. आदिवासी समाजासमोर असलेल्या विविध सामाजिक आणि सांस्कृतिक प्रश्नांवर सामूहिक चिंतन करण्याची वेळ आली असल्याचे मत त्यांनी व्यक्त केले. समाजाच्या एकजुटीशिवाय राजकीय, सामाजिक आणि प्रशासकीय क्षेत्रातील हक्काची भागीदारी मजबूत होऊ शकत नाही. त्यामुळे आगामी २०२७ च्या जनगणनेत आदिवासी समाजाची योग्य नोंद होण्यासाठी प्रत्येकाने जागरूक राहून संघटितपणे प्रयत्न करावेत, असे आवाहन यावेळी करण्यात आले.
परिषदेच्या व्यासपीठावर ॲड. शिवाजीराव मोघे, डॉ. नामदेवराव उसेंडी, संभाजीराव सरकुंडे, शेषराव कोरे, जगन येलके, जनार्दन गेडाम, बेबीताई उईके, सरला कुलसंगे, शालिग्राम पवार, वसंत कुलसंगे यांच्यासह विविध संघटनांचे पदाधिकारी उपस्थित होते. याशिवाय अखिल भारतीय आदिवासी विकास परिषद, बिरसा क्रांती दल, जागतिक गोंडसगा मंदी, आदिवासी संघर्ष कृती समिती, गोंडवाना आंदोलन आणि आदिवासी चळवळीशी संबंधित विविध संघटनांचे पदाधिकारी व कार्यकर्ते मोठ्या संख्येने सहभागी झाले होते.
कार्यक्रमाचे सूत्रसंचालन भोलेनाथ कोवे यांनी केले. प्रास्ताविक जनार्दन गेडाम यांनी केले, तर राजेश शेडमाके यांनी आभार मानले. आदिवासी समाजाच्या सांस्कृतिक अस्मितेचे जतन, सामाजिक एकजूट आणि हक्कांच्या जाणीवेला बळ देणारी ही परिषद उत्साहात पार पडली.
