गडचिरोली जिल्ह्यातील कोरोना विषाणू संसर्गजन्य प्रतिबंध अंतर्गत सुधारीत आदेश जारी


विदर्भ न्यूज एक्सप्रेस 
प्रतिनिधी / गडचिरोली : 
महाराष्ट्र राज्यात साथरोग अधिनियम 1897 ची अंमलबजावणी सुरू झालेली आहे. या अधिनियमाअंतर्गत खंड 2,3 व 4 नुसार प्रदान करण्यात आलेल्या अधिकारानूसार कोरोना विषाणू (कोविड-19) या संसर्गजन्य रोगाचा प्रादुर्भाव होण्यास प्रतिबंध करणे याकरीता विविध आदेश निर्गमित करण्यात आलेले आहेत व सद्यस्थितीत सदर आदेशाच्या तरतूदी गडचिरोली जिल्ह्यात लागू आहेत.
शासन आदेशान्वये, महाराष्ट्र राज्यात कोविड-19 साथरोगसंदर्भाने उचित प्रतिबंधात्मक उपाययोजनानंतर्गत नियमावली व उपाययोजना गडचिरोली जिल्हयात लागू आहेत.
शासन आदेशातील  तरतुदीच्‍या अनुषंगाने गडचिरोली जिल्‍हयातील नागरी, ग्रामीण तसेच औद्यो‍गिक क्षेत्रातील जनतेस, खालील व्‍यक्‍ती, आस्‍थापना यांना उद्देशुन यापूर्वी लॉकडाऊन संदर्भांत काढलेले प्रतिबंधात्‍मक आदेशांमध्ये खालील प्रमाणे सुधारित आदेश काढण्यात आले आहे.
जिल्हाधिकारी व जिल्‍हादंडाधिकारी तथा अध्यक्ष, जिल्हा आपत्ती व्यवस्थापन प्राधिकरण, गडचिरोली दीपक सिंगला यांनी वरील शासन निर्देशाप्रमाणे कोविड - 19 साथरोग अंतर्गत गडचिरोली जिल्हा सीमाक्षेत्रामध्ये (कंटेनमेंट झोन वगळून) पुढीलप्रमाणे जमावबंदी व टाळेबंदीसंदर्भात सुधारित नियमावली आणि उपाययोजना 15 ऑगस्ट, 2021 सकाळी 07.00 वाजेपासून पुढील आदेशापर्यंत लागू केले आहे.
शासन व जिल्हा प्रशासनाचे निर्देशाप्रमाणे वेळोवेळी निर्गमित केलेले आदेशातील सर्व निर्देश, सुचना, अटी व शर्तीचे पालन करणे सर्व संबधितांना बंधनकारक असेल. कोविड-19 साथरोगासंदर्भाने शासनाचे आदेश, जिल्हा प्रशासनाचे आदेशामधील अटी, शर्ती, दंडाबाबत निर्देशाचे काटेकोर पालन करणे सर्व संबधित व्यक्ती, आस्थापना व शासकिय/निमशासकिय विभागांना बंधनकारक असून पुढील अतिरिक्त अटी व शर्तीचे पालन करणे सक्तीचे असेल.

उपहारगृहे- 

खुली अथवा बंदिस्त उपहारगृहे आसन व्यवस्थेच्या 50 टक्के क्षमतेने खालील अटींच्या पूर्ततेच्या अधीन राहून सुरु करण्याची मुभा देण्यात येत आहे. उपहारगृह मध्ये प्रवेश करताना, प्रतिक्षा कक्षात अथवा जेवण मिळेपर्यंतच्या  कालावधीत मास्कचा वापर अनिवार्य राहिल व याबाबतच्या स्पष्ट सूचना उपहारगृह आस्थापनांनी उपहारगृहात लावणे आवश्यक राहिल. उपहारगृह मध्ये काम करणारे आचारी, वाढपे,व्यवस्थापक व स्वच्छता कर्मचाऱ्यासह सर्व कर्मचाऱ्यांचे कोविड प्रतिबंधक लसीकरण करणे आवश्यक राहिल व ज्या कर्मचाऱ्यांच्या लसीकरणाच्या दोन मात्रा आणि दुसरी मात्रा घेतल्यानंतर 14 दिवस पुर्ण झाले आहे असेच कर्मचारी व व्यवस्थापक उपहागृह मध्ये काम करु शकतील  तसेच या सर्व कर्मचारी व व्यवस्थापनाने उपहारगृहात मास्कचा वापर करणे अनिवार्य राहिल. वातानुकुलित उपहारगृह असल्यास वायुवीजनासाठी खिडक्या असल्यास कमीत कमी दोन खिडक्या किंवा दरवाजा उघडा ठेवून आतील हवा खेळती राहण्यासाठी पंखे लावणे आवश्यक राहिल. प्रसाधनगृहातही उच्च क्षमतेचा एक्झॉस्ट फॅन असणे आवश्यक राहिल.  उपहारगृह मध्ये विहित शारिरीक अंतराचे पालन होईल यानुसारच आसन व्यवस्था करण्यात यावी. उपहारगृह मध्ये निर्जंतुकीकरणाची तसेच सॅनिटायझरची व्यवस्था असणे आवश्यक राहिल. उपरोक्तनुसार उपहारगृहे सुरु ठेवण्यास सर्व दिवस रात्री 10.00 वा. पर्यंत मुभा देण्यात येत आहे. उपहारगृहे मधील भोजनासाठी ग्राहकाकडून शेवटची मागणी जास्तीत जास्त रात्री 9.00 वाजेपर्यंत घ्यावी. मात्र पार्सल सेवा 24 तास सुरु ठेवण्याची मुभा देण्यात येत आहे.

दुकाने- 

सर्व व्यापारी दुकाने सर्व दिवस रात्री 10.00 वा. पर्यंत सुरु ठेवण्याची मुभा देण्यात येत आहे. दुकानात काम करणाऱ्या सर्व व्यवस्थापन व कर्मचाऱ्यांचे कोविड प्रतिबंधात्मक लसीकरणाचे दोन मात्रा पूर्ण व दुसरी मात्रा झाल्यानंतर 14 दिवसाचा कालावधी पुर्ण होणे आवश्यक राहिल.
शॉपिंग मॉल्स- सर्व शॉपिंग मॉल्स  सर्व दिवस रात्री 10.00 वा. पर्यंत सुरु ठेवण्याची मुभा देण्यात येत आहे. तथापी  शॉपिंग मॉलमध्ये काम करणाऱ्या सर्व व्यवस्थापन व कर्मचारी आणि प्रवेश करणाऱ्या सर्व नागरिकांचेही  कोविड प्रतिबंधात्मक लसीकरणाचे दोन मात्रा पूर्ण व दुसरी मात्रा झाल्यानंतर 14 दिवसाचा कालावधी पुर्ण होणे आवश्यक राहिल व तसे लसीकरण प्रमाणपत्र व त्यासमवेत फोटोसहीत ओळखपत्र प्रवेशव्दारावर दाखविणे आवश्यक राहील.

जिम्नॅशिअम, योगसेंटर, सलून-स्पा- 

वातानुकुलित तसेच बिनावातानुकुलित जिम्नॅशिअम, योगसेंटर, सलुन-स्पा 50 टक्के क्षमतेने सर्व दिवस रात्री 10.00 वा. पर्यंत सुरु ठेवण्याची मुभा देण्यात येत आहे. तथापी उक्त संस्था वातानुकुलित असल्यास वायुविजनासाठी फॅन व वातानुकुलनासह खिडकी अथवा दरवाजा उघडा ठेवणे आवश्यक राहील.
इनडोअर स्पोर्टस- इनडोअर स्पोर्टस असलेल्या ठिकाणी खेळाडूचे व तेथील कर्मचारी व व्यवस्थापन यांच्या कोविड प्रतिबंधात्मक लसीकरणाचे दोन मात्रा पूर्ण व दुसरी मात्रा झाल्यानंतर 14 दिवसाचा कालावधी पुर्ण होणे आवश्यक राहिल तसेच या ठिकाणी हवा खेळती राहण्यासाठी योग्य वायुविजन व्यवस्था असणे आवश्यक राहील या ठिकाणी खेळाडूना बॅडमिंटन,टेबलटेनिस, स्क्वॅश, पॅरलल बार, मलखाब अशाच खेळांसाठी केवळ दोन खेळाडू या मर्यादेत सुरु करण्याची मुभा देण्यात येत आहे.

कार्यालय/औद्योगिक/सेवाविषयक आस्थापना- 

सर्व शासकीय /निमशासकीय आस्थापनाचे कर्मचारी, बँक कर्मचारी, रेल्वे व म्युनिसिपल कर्मचारी व व्यवस्थापन यांचे कोविड प्रतिबंधात्मक लसीकरण प्राथम्याने पुर्ण करण्यात यावे. ज्या खाजगी व आद्यौगिक आस्थापनाच्या कर्मचाऱ्यांचे व व्यवस्थापनाचे कोविड प्रतिबंधात्मक लसीकरण पुर्ण झालेले असेल त्या आस्थापनांना पुर्ण क्षमतेने सुरु ठेवण्याची मुभा देण्यात येत आहे. सर्व आस्थापनानी गर्दी टाळण्यासाठी शक्यतो विविध सत्रात कर्मचाऱ्यांना बोलावून कामाचे व्यवस्थापन करावे ज्या आस्थापना वरील कर्मचाऱ्यांना घरुन काम करणे शक्य आहे अशा सर्व आस्थापनाच्या व्यवस्थापनांनी कर्मचाऱ्यांना घरुन काम करण्याची मुभा द्यावी कार्यालयात काम करणे आवश्यक असल्यास कर्मचाऱ्यांच्या गर्दीच्या वेळी प्रवास टाळणे शक्य होईल अशा प्रकारे कार्यालयीन वेळेचे व्यवस्थापन करण्यात यावे. तसेच खाजगी कार्यालयाना वेळेचे व्यवस्थापन करण्यासाठी कार्यालये 24 तास सूरु ठेवण्याची मुभा देण्यात येत आहे. मात्र अशा सर्व व्यवस्थापनातर्गत कार्यालयांना एका सत्रात कार्यालयातील एकूण कर्मचारी संख्येच्या 25 टक्के उपस्थिती मर्यादित करणे आवश्यक राहील.

मैदाने, उद्याने- जिल्ह्यातील सर्व मैदाने, उद्याने सर्व दिवस नियमित वेळेत सुरु राहतील तथापि सदर ठिकाणी गर्दी होणार नाही याची संबंधितांनी दक्षता घ्यावी.

विवाह सोहळे-  खुल्या प्रांगणातील /लॉन वरील  किंवा बंदिस्त मंगल कार्यालयातील विवाह सोहळे संबधित प्रांगण /लॉन/मंगल कार्यालय /हॉटेल मधील आसन व्यवस्थेच्या 50 टक्के क्षमतेने व कोविड प्रतिबंधात्मक उपाययोजनाचे संपूर्ण पालन होईल या अटीवर मंगल कार्यालयाच्या प्रयोजनार्थ सुरु ठेवण्याची मुभा देण्यात येत आहे.  खुल्या प्रांगण/लॉन मध्ये होणाऱ्या विवाह सोहळयास उपस्थितांची संख्या प्रागण किंवा लॉन क्षमतेच्या 50 टक्के परंतु जास्तीत जास्त 200 व्यक्ती या मर्यादेत असेल. बंदिस्त मंगल कार्यालय/हॉटेलमध्ये उपस्थितांची संख्या क्षमतेच्या 50 टक्के परंतु जास्तीत जास्त 100 व्यक्ती या मर्यादित असेल.  मात्र कोणत्याही परिस्थीतीत कोविड प्रतिबंधात्मक उपाययोजनाचे पालन केले जात आहे याची खातरजमा करणेसाठी व्हिडिओ रेकॉडिंग करणे व आवश्यकतेनुसार सक्षम प्राधिकाऱ्याला तपासणीसाठी उपलब्ध करुन देणे आवश्यक राहिल या निर्बंधाचे उल्लंघन करणाऱ्यावर तसेच संबधित हॉटेल/कार्यालयावर दंडनीय कारवाई तसेच संबधित हॉटेल/मंगल कार्यालयाचा परवाना रद्द करण्याची कार्यवाही करण्यात येईल. तसेच मंगल कार्यालय/हॉटेल/लॉन व्यवस्थापन /भोजन व्यवस्थापन/बेंडपथक/भटजी /फोटोग्राफर्स अशा विवाह व्यवस्थेशी संबधित सर्व सलग्न संस्था यामधील व्यवस्थापक व कर्मचारी यांचेही कोविड प्रतिबंधात्मक लसीकरण पुर्ण होऊन दुसरी मात्रा घेतल्यानंतर 14 दिवस पुर्ण होणे अनिवार्य राहील व त्यानुसार ओळखपत्रासह लसीकरण प्रमाणपत्र सोबत असणे आवश्यक राहील.

सिनेमागृहे व मल्टिप्लेक्स- सिनेमागृह/नाटयगृह, मल्टीप्लेक्स (स्वतंत्र तसेच शॉपिंग मॉलमधील) पुढील आदेशापर्यंत बंद राहतील.
धार्मिक स्थळे-सर्व धार्मिक स्थळे पुढील आदेशापर्यंत नागरिकांसाठी बंद राहतील.

आंतरराज्य प्रवास- ज्या नागरिकाचे कोविड लसीकरण पूर्ण झाले आहे त्या नागरिकांना बाहेरच्या राज्यातून महाराष्ट्र राज्यात प्रवेश करण्यासाठी आरटीपीसीआर चाचणीची आवश्यकता नसेल अन्य प्रवाशासाठी 72 तास पुर्वीची आरटीपीसीआर चाचणी निगेटीव्ह किंवा 14 दिवस विलगीकरण आवश्यक राहिल.

गर्दी व्यवस्थापन- कोविड प्रतिबंधात्मक उपाययोजना म्हणून राज्यात गर्दी व्यवस्थापन करण्याबाबत केंद्र शासनाचे तसेच मा. सर्वोच्च न्यायालयाने दिर्देशित केले आहे. यास्तव गर्दी/जमाव टाळण्यासाठी वाढदिवस, राजकीय, धार्मिक, सामाजिक व सांस्कृतिक कार्यक्रम निवडणूक प्रचार सभा, रैली,मोर्चे इ. वरील निर्बंध कायम राहतील.

ऑक्सीजन उपलब्धता- मेडीकल ऑक्सीजनची उपलब्धता मर्यादीत असल्याने ,जर राज्यातील रुग्णसंख्या वाढल्यास व कोविड रुग्णाच्या उपचारासाठी प्रतिदिन 700 मे.टन किंवा व त्यापेक्षा जास्त ऑक्सीजनची लागत असल्यास संपूर्ण राज्यात तात्काळ पूर्णपणे लॉकडाऊन घोषित करुन त्यानुसार कठोर निर्बंध लागू करण्यात येतील.

कोविड-19 साथरोगसंदर्भाने आवश्यक खबरदारी- राज्यातील सर्व नागरिकांना कोविड प्रतिबंधात्मक उपाययोजना जसे की, मास्कचा वापर, हाताची स्वच्छता,शारिरीक अंतराचे पालन, इतरत्र थुकण्यास प्रतिबंध, इ. सर्व निर्बंधाचे पालन करणे अनिवार्य राहिल.

लसीकरण- सर्व दुकाने, कार्यालये , औद्योगिक आस्थापना ,उपहारगृहे, बार व मॉल मालक/व्यवस्थापनाने त्यांचे आस्थापनेवर कार्यरत असलेल्या व्यवस्थापक तसेच कर्मचाऱ्याचे कोविड प्रतिबंधात्मक लसीकरणाचे दोन मात्रा पुर्ण होऊन 14 दिवस झाल्याची खातरजमा करावी व या कर्मचाऱ्याची यादी (लसीकरण माहिती/प्रमाणपत्रासह) तयार ठेवावी व सक्षम प्राधिकाऱ्यांनी तपासणी साठी मागणी केल्यास त्यांना उपलब्ध करुन द्यावी.

निर्जंतूकीकरण व सॅनीटायझेशन- दुकाने/उपहारगृहे/बार/मॉल्सचे /कार्यालये/औद्योगिक आस्थापना याचे नियतकालीक निर्जंतूकीकरण व सॅनीटायझेशन करण्याची जबाबदारी संबधीत मालकाची व व्यवस्थापनाची असेल .तसेच यामध्ये कर्मचारी तसेच यामध्ये कर्मचारी तसेच ग्राहकाचे तापमान घेण्यासाठी इन्फ्रारेड/कोन्टॅक्टलेस थर्मामिटर याची व्यवस्था करण्यात यावी. तसेच यामध्ये मास्क डिस्पेसर व बायोमेडीकल वेस्ट (वापरलेले मॉस्क व टिशु पेपर्स इत्यादीची विल्हेवाट) जमा करण्याची व विहित कार्यपध्दतीने विल्हेवाटीसाठी देण्याची जबाबदारी संबधीत आस्थापनांची असेल.
आठवडी बाजार-पुढील आदेशापर्यंत बंद असतील.
सदरील आदेशाचे पालन न करणारी/ उल्लंघन करणारी कोणतीही व्यक्ती, संस्था अथवा समुह यांनी साथरोग प्रतिबंधक कायदा 1897, आपत्ती व्यवस्थापन अधिनियम 2005 तसेच भारतीय दंड संहिता 1860 नुसार शिक्षेस पात्र असलेला अपराध केला असे मानण्यात येईल व नियमानुसार कारवाई करण्यात येईल.
सदरचे आदेश आज दिनांक 12/08/2021 रोजी जिल्हाधिकारी दीपक सिंगला यांच्या सही व शिक्क्यानिशी निर्गमित करण्यात येत असून सदर आदेश दिनांक 15/08/2021 ते पुढील आदेशापर्यंत लागू राहील. असे दीपक सिंगला, जिल्हाधिकारी व जिल्‍हादंडाधिकारी तथा अध्यक्ष, जिल्हा आपत्ती व्यवस्थापन प्राधिकरण, गडचिरोली  यांनी कळविले आहे.




  Print






News - Gadchiroli | Posted : 2021-08-12



Related Photos