Petrol Price
अखेर अंकिसा येथील शासकीय धान खरेदीचे गोडाऊन सील : तक्रारीनंतर प्रशासनाची कारवाई
- धान खरेदी, डी.ओ. आणि शिल्लक साठ्यातील कथित अनियमिततेचा मुद्दा ऐरणीवर; संपूर्ण व्यवहाराची निष्पक्ष चौकशी करण्याची संतोष ताटीकोंडावार यांची मागणी
विदर्भ न्यूज एक्सप्रेस
प्रतिनिधी / गडचिरोली : सिरोंचा तालुक्यातील अंकिसा येथील शासकीय धान खरेदी केंद्राशी संबंधित गोडाऊन सील करण्यात आल्याचे वृत्त समोर आले असून, यामुळे धान खरेदी सोसायटीच्या कारभाराबाबत चर्चेला उधाण आले आहे. खरीप व रब्बी हंगामातील धान खरेदी, डी.ओ. (डिलिव्हरी ऑर्डर), धानाची वाहतूक, उचल आणि गोडाऊनमधील शिल्लक साठा यामध्ये कथित अनियमितता झाल्याचा आरोप करण्यात आला आहे. या प्रकरणी जनकल्याण समाज उन्नती अन्याय भ्रष्टाचार निवारण समितीचे गडचिरोली जिल्हाध्यक्ष संतोष रामचंद्र ताटीकोंडावार यांनी केलेल्या तक्रारीची दखल घेण्यात आल्याचे सांगण्यात येत आहे.
अंकिसा येथील शासकीय धान खरेदी केंद्राच्या व्यवहारांबाबत ताटीकोंडावार यांनी यापूर्वी संबंधित यंत्रणांकडे तक्रार करून चौकशीची मागणी केली होती. खरेदी केलेले धान, प्रत्यक्षात उचल करण्यात आलेला माल आणि गोडाऊनमध्ये शिल्लक असलेला धानसाठा यांचा ताळमेळ जुळत नसल्याचा संशय त्यांनी व्यक्त केला होता. आता संबंधित गोडाऊन सील झाल्याचे वृत्त प्रसिद्ध झाल्याने या प्रकरणातील अनियमिततेचा तपास होण्याची अपेक्षा व्यक्त केली जात आहे.
धान खरेदीच्या व्यवहारांवर गंभीर प्रश्नचिन्ह -
शासकीय धान खरेदी केंद्रांमध्ये शेतकऱ्यांकडून खरेदी करण्यात आलेल्या धानाची नोंद, त्यानंतर जारी होणारे डी.ओ., धानाची वाहतूक, गोदामातून होणारी उचल आणि शिल्लक साठा या सर्व प्रक्रियांमध्ये पारदर्शकता असणे आवश्यक आहे. मात्र, अंकिसा येथील केंद्राच्या व्यवहारांमध्ये या नोंदी आणि प्रत्यक्ष धानसाठा यांची पडताळणी करण्याची गरज असल्याचे ताटीकोंडावार यांनी म्हटले आहे.
शासनाकडे सादर करण्यात आलेल्या नोंदी आणि प्रत्यक्ष उपलब्ध धानसाठा यामध्ये तफावत आहे का, धान खरेदी व वाहतुकीच्या व्यवहारांमध्ये अनियमितता झाली आहे का, तसेच यामध्ये संबंधित सोसायटीचे पदाधिकारी, व्यवस्थापक किंवा अधिकाऱ्यांची काही भूमिका आहे का, याचा सखोल तपास होणे आवश्यक आहे. या आरोपांची अधिकृत चौकशी झाल्यानंतरच वस्तुस्थिती स्पष्ट होणार आहे.
प्रत्यक्ष धानसाठ्याची मोजणी करून नोंदींची पडताळणी करा -
या प्रकरणाची स्वतंत्र आणि निष्पक्ष चौकशी करण्याची मागणी करताना संतोष ताटीकोंडावार यांनी प्रशासनासमोर काही प्रमुख मुद्दे उपस्थित केले आहेत.
अंकिसा येथील खरीप व रब्बी हंगामातील संपूर्ण धान खरेदी व्यवहारांची तपासणी करावी.
जारी करण्यात आलेले सर्व डी.ओ., धान वाहतूक आणि उचल यांची कागदपत्रांसह पडताळणी करावी.
गोडाऊनमधील प्रत्यक्ष धानसाठ्याची अधिकृत मोजणी करून शासकीय नोंदींशी ताळमेळ तपासावा.
धान खरेदी सोसायटीचे पदाधिकारी, व्यवस्थापक आणि संबंधित अधिकाऱ्यांची भूमिका तपासावी.
चौकशीत बनावट नोंदी, आर्थिक गैरव्यवहार किंवा शासनाची दिशाभूल केल्याचे सिद्ध झाल्यास दोषींवर फौजदारी गुन्हे दाखल करावेत.
शासनाचे आर्थिक नुकसान झाल्याचे निष्पन्न झाल्यास संबंधित जबाबदार व्यक्तींकडून नुकसानभरपाईची संपूर्ण रक्कम वसूल करावी.
गोडाऊन सील होणे ही केवळ सुरुवात; प्रत्येक क्विंटलचा हिशेब द्या -
या प्रकरणावर प्रतिक्रिया व्यक्त करताना संतोष रामचंद्र ताटीकोंडावार म्हणाले, गोडाऊन सील होणे ही केवळ सुरुवात आहे. धान खरेदीतील प्रत्येक क्विंटलचा हिशेब जनतेसमोर आला पाहिजे. आदिवासी शेतकऱ्यांच्या हक्काच्या धानामध्ये गैरव्यवहार करणारा कोणीही असो, त्याला प्रशासकीय संरक्षण मिळता कामा नये. केवळ गोडाऊन सील करून हे प्रकरण थंड बस्त्यात टाकण्याचा प्रयत्न झाल्यास लोकशाही मार्गाने तीव्र आंदोलन छेडण्यात येईल.
इतर धान खरेदी केंद्रांचीही चौकशी करण्याची मागणी -
अंकिसा येथील प्रकरणापुरतीच चौकशी मर्यादित न ठेवता सिरोंचा तालुक्यासह जिल्ह्यातील इतर संबंधित शासकीय धान खरेदी केंद्रांवरील व्यवहारांचीही तपासणी करण्यात यावी, अशी मागणी ताटीकोंडावार यांनी केली आहे. धान खरेदीपासून ते वाहतूक, डी.ओ. आणि अंतिम साठा पडताळणीपर्यंतच्या संपूर्ण प्रक्रियेचे लेखापरीक्षण केल्यास संभाव्य अनियमितता समोर येण्यास मदत होईल, असे त्यांनी नमूद केले.
दरम्यान, अंकिसा येथील गोडाऊन सील झाल्याचे वृत्त समोर आले असले, तरी कथित गैरव्यवहाराबाबत अद्याप अंतिम निष्कर्ष निघालेला नाही. त्यामुळे संबंधित प्रशासनाने प्रत्यक्ष साठ्याची मोजणी, कागदपत्रांची तपासणी आणि जबाबदार व्यक्तींची चौकशी करून वस्तुस्थिती जनतेसमोर आणण्याची आवश्यकता आहे. या प्रकरणातील पुढील प्रशासकीय कारवाईकडे आता शेतकरी आणि नागरिकांचे लक्ष लागले आहे.
- संतोष रामचंद्र ताटीकोंडावार जिल्हाध्यक्ष, जनकल्याण समाज उन्नती अन्याय भ्रष्टाचार निवारण समिती, गडचिरोली.
