Petrol Price
साकोलीतील शासकीय योजनांचे महाशिबिर आता ६ डिसेंबरला
- प्रशासकीय कारणास्तव तारखेत बदल; जिल्हा विधी सेवा प्राधिकरण आणि जिल्हा प्रशासनाचा संयुक्त उपक्रम
विदर्भ न्यूज एक्सप्रेस
प्रतिनिधी / भंडारा : जिल्हा विधी सेवा प्राधिकरण, भंडारा आणि जिल्हा प्रशासन यांच्या संयुक्त विद्यमाने साकोली येथे आयोजित करण्यात येणाऱ्या शासकीय योजनांच्या महाशिबिराच्या तारखेत बदल करण्यात आला आहे. यापूर्वी २४ ऑक्टोबर २०२६ रोजी होणारे हे महाशिबिर आता ६ डिसेंबर २०२६ रोजी आयोजित करण्यात येणार आहे. प्रशासकीय कारणास्तव हा बदल करण्यात आल्याची माहिती प्रशासनाने दिली आहे.
सेवा संकल्प अभियान मुळे तारखेत बदल -
जिल्हा विधी सेवा प्राधिकरण, भंडारा आणि जिल्हा प्रशासन यांच्या संयुक्त विद्यमाने २४ ऑक्टोबर रोजी साकोली येथे शासकीय योजनांचे महाशिबिर आयोजित करण्याचे निश्चित करण्यात आले होते. मात्र, सामान्य प्रशासन विभागाच्या ९ आणि १९ सप्टेंबर २०२६ रोजीच्या शासन निर्णयांनुसार राज्यात १७ सप्टेंबर ते १७ ऑक्टोबर २०२६ या कालावधीत सेवा संकल्प अभियान राबविण्यात येत आहे.
या अभियानाचा कालावधी आणि शासकीय योजनांच्या महाशिबिराचे नियोजन जवळपास एकाच काळात येत असल्याने प्रशासकीय कामकाजाचे योग्य नियोजन करण्याच्या दृष्टीने महाशिबिराच्या तारखेत बदल करण्याची आवश्यकता निर्माण झाली.
पालक न्यायमूर्तींकडे करण्यात आली होती विनंती -
महाशिबिराच्या नियोजित तारखेत बदल करण्यासाठी जिल्हा विधी सेवा प्राधिकरण, भंडारा यांच्यामार्फत मुंबई उच्च न्यायालयाच्या नागपूर खंडपीठाच्या पालक न्यायमूर्तींकडे विनंती करण्यात आली होती. या विनंतीची दखल घेऊन महाशिबिरासाठी ६ डिसेंबर २०२६ ही नवीन तारीख निश्चित करण्यात आली आहे. त्यामुळे साकोली येथे होणारे शासकीय योजनांचे महाशिबिर आता सुधारित वेळापत्रकानुसार ६ डिसेंबर रोजी पार पडणार आहे.
कार्यालयप्रमुखांना सुधारित तारखेची नोंद घेण्याचे आवाहन -
महाशिबिराच्या आयोजनासंदर्भात सर्व कार्यालयप्रमुख आणि विभागप्रमुखांनी सुधारित तारखेची नोंद घ्यावी, असे आवाहन निवासी उपजिल्हाधिकारी मनोहर चव्हाण यांनी केले आहे. शासकीय योजनांच्या माध्यमातून पात्र लाभार्थ्यांपर्यंत विविध योजनांची माहिती आणि त्यांचा लाभ पोहोचविण्याच्या दृष्टीने या महाशिबिराचे आयोजन करण्यात येत आहे.
त्यामुळे संबंधित विभागांनी सुधारित तारखेनुसार आवश्यक नियोजन करावे, असे प्रशासनाने सूचित केले आहे. साकोली येथे होणाऱ्या महाशिबिराची तारीख बदलली असली, तरी आता ६ डिसेंबर २०२६ रोजी हे शिबिर आयोजित करण्यात येणार असल्याने नागरिकांनी आणि संबंधित विभागांनी नव्या तारखेची नोंद घ्यावी.
