Petrol Price
मासळमध्ये रेशनच्या धान्याच्या गुणवत्तेवर प्रश्नचिन्ह
- किडे, लोथळ्या व कुजलेले धान्य वितरित होत असल्याचा लाभार्थ्यांचा आरोप; अन्नपुरवठा विभागाकडून तपासणीची मागणी
विदर्भ न्यूज एक्सप्रेस
प्रतिनिधी / भंडारा : गरीब आणि गरजू कुटुंबांना अन्नसुरक्षा योजनेअंतर्गत वितरित करण्यात येणाऱ्या रेशनच्या धान्याच्या गुणवत्तेबाबत लाखांदूर तालुक्यातील मासळ येथे गंभीर तक्रारी समोर आल्या आहेत. येथील स्वस्त धान्य दुकानातून किडे, लोथळ्या आणि कुजलेला माल असलेले धान्य वितरित होत असल्याचा आरोप लाभार्थ्यांनी केला आहे. तसेच तांदूळ आणि मक्याची अवस्था मीठ पडल्यासारखी असल्याचे सांगण्यात येत असल्याने धान्याच्या गुणवत्तेवर प्रश्नचिन्ह निर्माण झाले आहे.
शासनाकडून मिळणारे रेशनचे धान्य हे आर्थिकदृष्ट्या दुर्बल कुटुंबांच्या उदरनिर्वाहाचा महत्त्वाचा आधार आहे. अनेक कुटुंबे दैनंदिन गरजा भागविण्यासाठी या धान्यावर अवलंबून असतात. मात्र, वितरित होणारे धान्यच खाण्यायोग्य नसेल, तर अन्नसुरक्षा योजनेचा लाभ कशासाठी, असा संतप्त सवाल लाभार्थ्यांकडून उपस्थित केला जात आहे.
निकृष्ट धान्य स्वीकारण्यास लाभार्थ्याचा नकार -
मासळ येथील लाभार्थी सुनील मनोहर लांजेवार यांनी धान्याची अवस्था पाहून ते स्वीकारण्यास नकार दिल्याचे सांगण्यात येते. रेशनच्या धान्यामध्ये किडे, लोथळ्या किंवा कुजलेला माल आढळत असल्याच्या तक्रारी गंभीर असून, यामुळे लाभार्थ्यांच्या आरोग्याचा प्रश्न निर्माण होऊ शकतो. त्यामुळे संबंधित दुकानातील धान्याच्या साठ्याची तपासणी करणे आवश्यक असल्याची मागणी होत आहे.
गुणवत्ता तपासणीच्या कार्यपद्धतीवर प्रश्न -
धान्याचा साठा स्वस्त धान्य दुकानात पोहोचण्यापूर्वी त्याची गुणवत्ता तपासली जाते का? तसेच लाभार्थ्यांना धान्य वितरित करताना त्याची स्थिती आणि साठवणुकीबाबत आवश्यक काळजी घेतली जाते का, असे प्रश्न या प्रकारामुळे उपस्थित होत आहेत. धान्याची गुणवत्ता योग्य असल्याची खात्री करूनच त्याचे वितरण केले जाते का, याचीही चौकशी करण्याची गरज व्यक्त केली जात आहे.
नमुने प्रयोगशाळेत तपासण्याची मागणी -
या प्रकरणाची लाखांदूर अन्नपुरवठा विभागाने गांभीर्याने दखल घेऊन मासळ येथील संबंधित स्वस्त धान्य दुकानातील धान्याची प्रत्यक्ष पाहणी करावी, अशी मागणी लाभार्थ्यांकडून होत आहे. तांदूळ आणि मक्याचे नमुने प्रयोगशाळेत तपासणीसाठी पाठवून त्यांची गुणवत्ता व खाण्यायोग्यता निश्चित करावी. तपासणीत धान्य निकृष्ट किंवा वितरणासाठी अयोग्य असल्याचे आढळल्यास संबंधितांवर नियमानुसार कारवाई करावी, अशी अपेक्षा व्यक्त केली जात आहे.
गरीब कुटुंबांना दर्जेदार आणि खाण्यायोग्य धान्य मिळणे आवश्यक आहे. त्यामुळे संबंधित विभागाने या तक्रारींची तातडीने दखल घेऊन वस्तुस्थिती स्पष्ट करावी आणि लाभार्थ्यांना योग्य दर्जाचे धान्य उपलब्ध करून द्यावे, अशी मागणी होत आहे.
दरम्यान, धान्याच्या गुणवत्तेबाबत करण्यात आलेल्या आरोपांची अधिकृत तपासणी आणि संबंधित विभागाची भूमिका समोर आलेली नाही. त्यामुळे प्रत्यक्ष पाहणी व प्रयोगशाळेतील तपासणी अहवालानंतरच या प्रकरणातील वस्तुस्थिती स्पष्ट होऊ शकेल
