सरपंचाच्या चुकीच्या निर्णयामुळे आम्ही मदतीपासून वंचित


- बेडगाव येथील लाभार्थ्यांनी पत्रकार परिषदेत दिली माहिती

विदर्भ न्यूज एक्सप्रेस 
तालुका प्रतिनिधी / कोरची :
  सर्वत्र थैमान घातलेल्या कोरोना विषाणू ला आळा घालण्याकरिता लसीकरण करून घेणे हे खूप महत्त्वाचे असून याचे महत्त्व पटवून देण्याकरिता ३ जून ला जिल्हा परिषद गडचिरोली येथील मुख्य कार्यकारी अधिकारी कुमार आशीर्वाद यांनी कोरची येथे भेट देऊन लोकांशी चर्चा केली होती. सदर भेटीदरम्यान आम्ही आमच्या आरोग्यासाठी चे संस्थापक डॉ. सतीश गोगुलवार हे सुद्धा उपस्थित होते व नागरिकांच्या मनातून भीती कमी व्हावी, नागरिक तपासणीकरिता समोर यावे व १४ दिवस ज्यांनी आपल्या रोजंदारीचे काम सोडून विलगीकरण कक्षात राहून प्रशासनाला सहकार्य केले अशा व्यक्तींना संस्थेच्या माध्यमातुन जीवनावश्यक वस्तूंचे वाटप करण्याचे डॉ. गोगुलवार यांनी ठरविले.
आम्ही आमच्या आरोग्यासाठी संस्थेने तालुक्यातील ३५ गावे घेतली होती त्यात बेळगाव गावाचा समावेश नव्हता पण बेळगाव गावामध्ये कोरोना रुग्ण  प्रमाण जास्त असल्याने व कोविड लसीकरणाचा करुन घेण्याचा प्रमाण ग्रामपंचायतीने प्रामाणिकपणे जास्त केल्यामुळे बेळगाव गाव संस्थेमार्फत घेण्याचे ठरविले आणि आम्ही आमच्या आरोग्यासाठी संस्थेच्या माध्यमातून ग्रामपंचायत कार्यालयातील सरपंच यांच्या अनुमतीचे पत्र घेऊन यादी तयार करण्यात आली. परंतु ग्रामपंचायत बेडगाव येथील सरपंच चेतानंद किरसान यांनी जिल्हाधिकारी यांचे पत्र आणा मग विचार करू असे विधान केले असल्याची माहिती बेडगाव येथील लाभार्थ्यांनी पत्रकार परिषदेत दिली. कोरोना काळात पहिलेच हातावर पोट अशी परिस्थिती असून १४ दिवस विलगीकरण कक्षात राहणाऱ्या लोकांना ही मदत धीर देणारी आहे. परंतु सरपंचाने सहकार्य न केल्यामुळे आम्हाला या योजनेपासून वंचित राहावे लागत असल्याचे प्रतिपादन पत्रकार परिषदेत उपस्थित लाभार्थ्यांनी केले.
या लाभार्थ्यांनी आम्ही आमच्या आरोग्यासाठी या संस्थेचे संस्थापक डॉ. सतीश गोगुलवार यांची भेट घेऊन विचारणा केली असता, तुमच्या गावातील सरपंच यांनी मला जिल्हाधिकारी यांचे पत्र आणा मग विचार करू असे उत्तर दिले व माहिती घेण्यासाठी गेलेल्या कर्मचाऱ्यांना परत पाठविले त्यामुळे बेडगाव हे गाव सदर अभियानातून वगळण्यात आले असल्याचे डॉ. गोगुलवार यांनी सांगितले. अशी माहिती उपस्थित नागरिकांनी दिली. आम्हाला या लाभापासून वंचित ठेवण्यामागे सरपंच चेतानंद किरसान हेच जिम्मेदार असल्यामुळे त्यांनी त्वरित ग्रामपंचायत बेडगाव येथे बैठक बोलावून ४६ नागरीक जे या सुविधेपासून वंचित झाले आहेत त्यांच्या समस्यांचे निराकरण करावे अशी मागणी सरपंच चेतानंद किरसान यांना निवेदनातून केली आहे.
काल १६ सप्टेंबरला विश्रामगृह कोरची येथे पत्रकार परिषद आयोजित करण्यात आली होती व या बैठकीमध्ये बेडगाव येथील रामभाऊ नागरे, यशवंत वाळदे, राकेश पारटवार, दामोदर बोगा, दिलीप वाळदे, सौ. निर्मला नागरे, सौ. देवका वाढई, श्रीमती कमल मस्के,  कु. तेजस्विनी नागरे उपस्थित होते.

कोरची तालुक्यात बेळगाव ग्रामपंचायत मध्ये सर्वाधिक कोरोना रुग्ण निघाल्यामुळे आरोग्य विभाग व महसूल विभागाशी व पोलिस प्रशासनाच्या सहकार्याने बेळगाव ग्रामपंचायत मध्ये  कोविड लसीकरणाच्या कॅम्प घेऊन तालुक्यात सर्वाधिक संपूर्ण ग्रामपंचायत मध्ये ९५ टक्के लसीकरण केल्याचा रेकॉर्ड  नोंदविला आहे त्यामुळे आम्ही आमच्या आरोग्यासाठी चे कार्यकर्ते महेश लाडे हे कोरोना मुक्त गाव योजनेसाठी मला विचारणा केली असता मी सहकार्य करण्याच्या दृष्टिकोनातून त्यांना आश्वासन दिले पण या योजनेसाठी शासकीय परिपत्रक असल्यास मला आणून द्यावे असे सांगितले असता त्यांनी मला दोन दिवसानंतर पत्र घेऊन येतो असे सांगितले. पण ते आलेच नाही त्यामुळे आम्ही आमच्या आरोग्यासाठी संस्थेमार्फत कोरोना पॉझिटिव रुग्णांना दिली जाणारी संस्थेकडील मदत हे संस्थेने न आल्यामुळे गावातील लोक वंचित राहिलेले आहेत याला मी कुठेही अडथळा निर्माण केलेलं नाही गावातील विरोधी पक्षाचे काही पदाधिकारी व्यक्तिगत हितासाठी मला बदनाम करण्याचा प्रयत्न करीत आहेत. 

-चेतानंद  किरसान
सरपंच ग्रामपंचायत बेडगाव

बेडगाव या गावाला कोरोना मुक्त गावात सहभागी करुन घेण्यासाठी संस्थेचे कार्यकार्ये बेडगाव येथील सरपंच व त्यांचे सहकारी यांना ग्राम पंचायत बेडगाव येथे भेट देऊन या अभियानाची माहिती दिली. परंतु सरपंच यांनी जिल्हाधिकारी यांचे पत्र आना मग आम्ही विचार करू असे उत्तर दिल्यामुळे संस्थेने बेडगाव हे गाव अभियानात जोडले नाही. तरीही या लाभार्थ्यांना लाभ देता येईल काय यावर विचार सुरू आहे.

-डॉ. सतीश गोगुलवार
संस्थापक
आम्ही आमच्या आरोग्यासाठी



  Print






News - Gadchiroli | Posted : 2021-09-17




Related Photos