महत्वाच्या बातम्या

खासदार डॉ. प्रशांत पडोळे अपघातातून थोडक्यात बचावले : नागपूरजवळील वडोदा येथे कार-ट्रकची भीषण धडक

विदर्भ न्यूज एक्सप्रेस
प्रतिनिधी / नागपूर/भंडारा : भंडारा-गोंदिया लोकसभा क्षेत्राचे खासदार डॉ. प्रशांत पडोळे यांच्या वाहनाला आज पहाटे नागपूरजवळील वडोदा परिसरात भीषण अपघात झाला. सुदैवाने, या अपघातात मोठी जीवितहानी टळली असून खासदार पडोळे थोडक्यात बचावले आहेत. मात्र, त्यांच्या वाहनाचे मोठ्या प्रमाणावर नुकसान झाले असून त्यांच्या पायाला किरकोळ दुखापत झाली आहे.

नेमकी घटना काय?
खासदार कार्यालयीन सूत्रांनी दिलेल्या माहितीनुसार, डॉ. प्रशांत पडोळे आज पहाटे ५ वाजता भंडाऱ्याहून नागपूरकडे रवाना झाले होते. नागपूर विमानतळावरून त्यांना दिल्लीतील अधिवेशनासाठी जायचे होते.

मौदा ते वडोदा दरम्यान, हल्दीराम कंपनीसमोर समोरून जाणाऱ्या ट्रकने अचानक ब्रेक मारल्याने खासदारांची कार मागून ट्रकवर जोरात आदळली.या वाहनामध्ये खासदार पडोळे यांच्यासह चालक राहुल गिरीपुंजे, अंगरक्षक खडसे आणि भंडारा येथील कार्यकर्ते देवेंद्र उर्फ अप्पू शहारे उपस्थित होते.

नुकसान आणि जखमींची स्थिती -
वाहनाचे नुकसान: धडक इतकी जोरदार होती की खासदारांच्या वाहनाचा पुढील भाग पूर्णपणे चक्काचूर झाला आहे.

जखमी: या अपघातात खासदार पडोळे आणि देवेंद्र शहारे यांच्या पायाला दुखापत झाली.
पुढील प्रवास अपघातानंतरही कर्तव्याला प्राधान्य देत खासदार पडोळे सकाळी ७ वाजताच्या विमानाने दिल्लीकडे रवाना झाले. मात्र, जखमी देवेंद्र शहारे यांच्यावर वडोदा येथील रुग्णालयात उपचार सुरू आहेत.

सुरक्षेचा प्रश्न ऐरणीवर: एकाच मार्गावर तिसरा अपघात
विशेष म्हणजे, याच मार्गावर खासदार पडोळे यांच्या वाहनाचा झालेला हा तिसरा अपघात आहे. यापूर्वी ११ सप्टेंबर २०२५ रोजीदेखील त्यांच्या वाहनाला अपघात झाला होता. वारंवार होणाऱ्या या घटनांमुळे वडोदा परिसरातील रस्ते सुरक्षा आणि प्रशासकीय नियोजनावर गंभीर प्रश्नचिन्ह निर्माण झाले आहे.

पायलट वाहनाची मागणी अद्याप प्रलंबित -
मागील अपघातांनंतर खासदार पडोळे यांनी सुरक्षेच्या कारणास्तव पायलट वाहन देण्याची मागणी केली होती. मात्र, प्रशासनाकडून ही मागणी अद्याप दुर्लक्षित राहिली आहे. ताफ्यात पायलट वाहन नसल्यानेच अशा प्रकारे अचानक ब्रेक लागल्यास अपघात होत असल्याचा सूर कार्यकर्त्यांमधून उमटत आहे.

कार्यकर्त्यांकडून चिंता व्यक्त -
या अपघाताची नोंद वडोदा पोलीस स्टेशनमध्ये करण्यात आली आहे. खासदारांच्या अपघाताची बातमी समजताच भंडारा-गोंदिया जिल्ह्यातील कार्यकर्त्यांनी आणि नागरिकांनी मोठी चिंता व्यक्त केली आहे. लोकप्रतिनिधींच्या सुरक्षिततेसाठी प्रशासनाने तातडीने पावले उचलून पायलट वाहन उपलब्ध करून द्यावे, अशी मागणी आता जोर धरत आहे.