Petrol Price
नागपंचमीनिमित्त गोंडवाना सैनिकी विद्यालयात सर्पांविषयी जनजागृती
विदर्भ न्यूज एक्सप्रेस
प्रतिनिधी / गडचिरोली : नागपंचमीचे औचित्य साधून गोंडवाना सैनिकी विद्यालय, गडचिरोली येथे विद्यार्थ्यांमध्ये सापांविषयी वैज्ञानिक दृष्टिकोन निर्माण करण्यासाठी तसेच सर्पसंवर्धन आणि सर्पदंशाबाबत जनजागृती करण्याच्या उद्देशाने विशेष मार्गदर्शन व जनजागृती कार्यक्रमाचे आयोजन करण्यात आले.
या कार्यक्रमात सर्पमित्र अजय कुकुडकर व त्यांच्या चमूने विद्यार्थ्यांना विविध प्रकारच्या सापांची ओळख, त्यांची वैशिष्ट्ये, नैसर्गिक अधिवास, आहार, सापांपासून घ्यावयाची काळजी तसेच सर्पदंश झाल्यास घ्यावयाची प्राथमिक खबरदारी याबाबत सविस्तर माहिती दिली. विविध सापांविषयी माहिती देणाऱ्या आकर्षक बॅनरच्या माध्यमातून विद्यार्थ्यांना सापांच्या विविध प्रजाती, त्यांची वैशिष्ट्ये, अधिवास आणि पर्यावरणातील त्यांचे महत्त्व समजावून सांगण्यात आले.
यावेळी विद्यालयाचे विज्ञान शिक्षक प्रा. डॉ. राकेश चडगुलवार व देवेंद्र मशाखेत्री यांनी विद्यार्थ्यांना सापांविषयी वैज्ञानिक दृष्टिकोनातून सविस्तर मार्गदर्शन केले. सापांच्या विविध प्रजाती, त्यांचे अधिवास, आहारसाखळीतील त्यांचे स्थान तसेच पर्यावरणाचा समतोल राखण्यात सापांची असलेली महत्त्वपूर्ण भूमिका याबाबत त्यांनी माहिती दिली.
सापांविषयी समाजात प्रचलित असलेले विविध गैरसमज, अंधश्रद्धा आणि अनाठायी भीती यांचे वैज्ञानिक पद्धतीने निरसन करण्यात आले. साप हा मानवाचा शत्रू नसून पर्यावरणीय समतोल राखणारा महत्त्वाचा घटक आहे, हे विद्यार्थ्यांना पटवून देण्यात आले. साप दिसल्यास घाबरून जाऊ नये, त्याला विनाकारण इजा करू नये आणि सुरक्षित अंतर राखून प्रशिक्षित सर्पमित्रांची मदत घ्यावी, असे आवाहन करण्यात आले.
तसेच सर्पदंश झाल्यास कोणतेही घरगुती उपचार, झाडपाल्याचे उपाय किंवा अंधश्रद्धेवर आधारित उपचार न करता तातडीने जवळच्या रुग्णालयात वैद्यकीय उपचार घेणे आवश्यक आहे, याबाबतही विद्यार्थ्यांना महत्त्वपूर्ण मार्गदर्शन करण्यात आले. सर्पदंशाच्या वेळी योग्य वेळी वैद्यकीय मदत मिळणे किती महत्त्वाचे आहे, याचीही माहिती देण्यात आली.
कार्यक्रमाच्या अध्यक्षस्थानी विद्यालयाचे पर्यवेक्षक अजय वानखेडे सर होते. यावेळी प्रा. डॉ. राकेश चडगुलवार व देवेंद्र मशाखेत्री यांची प्रमुख उपस्थिती होती. सर्पमित्र अजय कुकुडकर व त्यांच्या चमूने विद्यार्थ्यांच्या विविध प्रश्नांना उत्तरे देत सापांविषयीच्या शंका व गैरसमज दूर केले.
विद्यार्थ्यांनी उत्स्फूर्त सहभाग नोंदवत सापांविषयी विविध प्रश्न विचारले. बॅनरवरील माहिती, मार्गदर्शन आणि प्रश्नोत्तरांच्या माध्यमातून विद्यार्थ्यांना सापांविषयी अधिक अचूक व वैज्ञानिक माहिती मिळाली. या उपक्रमामुळे विद्यार्थ्यांमध्ये सापांविषयी असलेली अनाठायी भीती व गैरसमज दूर होऊन वैज्ञानिक दृष्टिकोन, सर्पसंवर्धन, पर्यावरण संरक्षण आणि मानवी सुरक्षितता याबाबत जागरूकता निर्माण झाली.
नागपंचमीच्या पारंपरिक उत्सवाला वैज्ञानिक दृष्टिकोनाची जोड देत सापांचे संरक्षण करा, पर्यावरणाचे संतुलन जपा आणि सर्पदंशाबाबत योग्य माहिती जाणून घ्या, असा महत्त्वपूर्ण संदेश या उपक्रमातून देण्यात आला. विद्यार्थ्यांसाठी हा उपक्रम अत्यंत ज्ञानवर्धक, जनजागृतीपर आणि प्रेरणादायी ठरला. कार्यक्रमाचे संचालन ज्येष्ठ शिक्षक रवींद्र कोरे यांनी केले तर आभार संतोष कुळमेथे यांनी मानले.
