गडचिरोली पोलीस दलाच्या प्रयत्नांनी पोस्टे नेलगुंडा हद्दीतील अतिदुर्गम मौजा मोरमेट्टा गावात विद्युत सेवा सुरळीतपणे सुरू


- पोलीस स्टेशन नेलगुंडा व महावितरण विभागाच्या संयुक्त प्रयत्नातून राबविण्यात आला उपक्रम
विदर्भ न्यूज एक्सप्रेस
प्रतिनिधी / गडचिरोली : गडचिरोली जिल्हा हा आदिवासी बहूल जिल्हा म्हणून ओळखला जातो. ज्या ठिकाणी बरेच आदिवासी बांधव आज देखील विकासापासून कोसो दूर आहेत, अशा दुर्गम भागातील नागरिकांचे जगणे सुसह्र व्हावे यासाठी गडचिरोली पोलीस दलाकडून विविध उपक्रम राबविले जात असतात. याच उपक्रमांचा एक भाग म्हणून जिल्ह्रातील अतिदुर्गम भामरागड उपविभागातील मौजा मोरमेट्टा येथे काल दिनांक १६ नोव्हेंबर २०२६ रोजी गडचिरोली पोलीस दल व महाराष्ट्र राज्य विद्युत मंडळाच्या सहकार्याने सुरळीतपणे विद्युत सेवा सुरू करण्यात आली आहे. सविस्तर वृत्त असे आहे की, मौजा नेलगुंडा येथे गडचिरोली पोलीस दलाच्या वतीने दिनांक ३० जानेवारी २०२५ रोजी नवीन पोलीस स्टेशनची स्थापना करण्यात आली होती. सुमारे ०३ वर्षोपुर्वी मौजा पोस्टे नेलगुंडा हद्दीतील मौजा मोरमेट्टा गावात विद्युत सेवा पोहचविण्याचा प्रयत्न करण्यात आला होता. मात्र अवघड भूभाग व जंगल परिसरामूळे त्यावेळी हा प्रयत्न यशस्वी होऊ शकला नव्हता. तसेच दरम्यान च्या काळात विद्युत खांब पडल्यामूृळे व वायर जोडणी तुटल्यामूळे सदर पुरवठा सुरळित करणे अधिक आव्हानाचे झाले होते.
या अनुषंगाने गावातील नागरिकांना विद्युत पुरवठा मिळण्यासाठी गडचिरोली पोलीस दलाच्या वतीने महावितरण विभागाकडे सातत्याने पाठपुरवा करण्यात आला. यानुसार गडचिरोली पोलीस दलाच्या प्रयत्नातून महावितरण विभागाच्या मदतीने काल दिनांक 16 नोव्हेंबर २०२६ रोजी सुरळीतपणे विद्युत सेवा सुरू करण्यात आली आहे. या उपक्रमामूळे स्थानिक नागरिकांच्या जीवनमानात लक्षणीय सुधारणा होणार आहे. पोलीस स्टेशन नेलगुंडाच्या स्थापनेमूळे दीर्घकाळापासून मूलभूत सुविधांपासून वंचित असलेल्या नेलगुंडा हद्दीतील गावांत विकासाला चालना मिळाली आहे. याच अतंर्गत पोलीस दलाच्या सहकार्यातून बोगामी नाल्यावर पूल बांधून देण्यात आल्यामुळे परिसरातील गावांची दळणवळण व संपर्क व्यवस्था अधिक सुलभ झाली आहे तसेच पोलीस दलाच्या माध्यमातून नेलगुंडा गावामध्ये सोलर लॅम्प बसविण्यात आले आहेत. पोलीस दादालोरा खिडकीच्या माध्यमातून नागरिकांच्या आरोग्य, महिला सक्षमीकरण व आर्थिक उन्नतीच्या दृष्टीने महिला मेळावा, आरोग्य मेळावा, कृषी मेळावा, आधार कार्ड शिबिर व जनजागरण मेळाव्यांचे आयोजन करण्यात येऊन जवळपास २,५०० नागरिकांना विविध शासकीय योजनांचे लाभ देण्यात आले आहेत.
या विकासाला गतीमान करण्यासाठी दुर्गम भौगोलिक परिस्थिती, वाहतुकीची कमतरता आणि सुरक्षा संदर्भातील अडचणी असूनही पोलीस दलाने संबंधित विभागांशी समन्वय साधून मौजा मोरमेट्टा गावामध्ये विद्युत पुरवठा सुरु केलेला आहे. वीजपुरवठा सुरू झाल्यामूळे गावातील नागरिकांना आता प्रकाश, पिण्याच्या पाण्याची सोय, तसेच विद्याथ्र्यांना अभ्यासासाठी आवश्यक सुविधा उपलब्ध झाल्या आहेत. यामुळे नागरिकांचे शिक्षण, आरोग्य आणि दैनंदिन जीवनात सकारात्मक बदल होणार आहेत, अशी आशा पोलीस अधीक्षक, गडचिरोली श्री. एम. रमेश यांनी व्यक्त केली आहे. सामान्य नागरिकांच्या दळण-वळणाच्या मुलभूत प्रश्नावर उपाय करण्यासाठी गडचिरोली पोलीस दलाच्या संरक्षणात जिल्हाभरामध्ये एकूण ५६७ मोबाईल टॉवर्सची उभारणी करण्यात आली असून, एकूण ४२४.२७ कि.मी. लांबीच्या रस्त्याचे आणि ६५ पुलांचे बांधकाम पूर्ण करण्यात आले आहे. सदर उपक्रमांमूळे प्रशासन आणि नागरिकांमधील विश्वास अधिक दृढ करणारा ठरत आहे. यासोबतच अशा विकासकामांमूळे दुर्गम भागातील नागरीकांना मुख्य प्रवाहात येण्यास मदत होईल.
सदर उपक्रम पोलीस अधीक्षक गडचिरोली एम. रमेश, अपर पोलीस अधीक्षक (अभियान) कार्तिक मधीरा, अपर पोलीस अधीक्षक (प्रशासन) गोकुल राज जी., अपर पोलीस अधीक्षक (प्राणहिता) हर्षवर्धन बी.जे., तसेच सहायक पोलीस अधीक्षक (भामरागड) सागर भामरे यांच्या मार्गदर्शनाखाली पोलीस स्टेशन नेलगुंडा चे प्रभारी अधिकारी अजिंक्स इथापे, पोउपनि. राहुल जेंगठे, एसआरपीएफ चे पोउपनि. मोराणकर ग्रामसेवक नेलगुंडा मनमावरे, वरिष्ठ तंत्रज्ञ राजू माहाका व मोरमेढा गावातील तरुण तसेच पोस्टे नेलगुंडाचे पोलीस अंमलदार व एसआरपीएफ चे पोलीस अंमलदार यांच्या प्रयत्नांनी पार पडला.




Petrol Price




