Petrol Price
गडचिरोलीत संघाचा विजयादशमी उत्सव उत्साहात
- शताब्दी वर्षानिमित्त पंचपरिवर्तनाचा संदेश; स्वयंसेवकांची विविध प्रात्यक्षिके
विदर्भ न्यूज एक्सप्रेस
प्रतिनिधी / गडचिरोली : राष्ट्रीय स्वयंसेवक संघाच्या गडचिरोली नगराच्या वतीने आयोजित श्री विजयादशमी उत्सव रविवारी १८ऑक्टोबर सायंकाळी गोकुळनगर येथील शिवाजी हायस्कूल परिसरात उत्साहात संपन्न झाला. संघाच्या शताब्दी वर्षानिमित्त पंचपरिवर्तनाचा संदेश देण्यात आला. स्वयंसेवकांनी सादर केलेल्या विविध प्रात्यक्षिकांनी उपस्थितांचे लक्ष वेधले. राष्ट्रभक्ती, सामाजिक एकात्मता आणि समाजजीवनात सकारात्मक परिवर्तन घडविण्याचे आवाहन यावेळी करण्यात आले.
केंद्रीय राखीव पोलीस दलाच्या १९२ बटालियनचे मुख्य वैद्यकीय अधिकारी डॉ. वसंत मुरारी कुंभरे प्रमुख अतिथी म्हणून उपस्थित होते. क्रीडा भारतीचे अखिल भारतीय संघटन मंत्री श्री. प्रसादजी महानकर यांनीही उपस्थितांना मार्गदर्शन केले. यावेळी जिल्हा संघचालक घिसुलाल काबरा, नगर संघचालक नीलकंठ भांडेकर तालुका संघचालक उरकंट राऊत यांच्यासह संघाचे पदाधिकारी, स्वयंसेवक, लोकप्रतिनिधी आणि समाजबांधव मोठ्या संख्येने उपस्थित होते.
विजयादशमी उत्सवाच्या निमित्ताने राष्ट्रीय स्वयंसेवक संघाच्या शतपूर्तीच्या प्रवासाचा आढावा घेण्यात आला. परमपूजनीय डॉ. केशव बलिराम हेडगेवार यांनी संघाची स्थापना केल्यानंतर संघाला आलेल्या विविध अडचणी, उपेक्षा आणि प्रतिकूल परिस्थितीचा सामना करत संघाने केलेली वाटचाल याबाबत माहिती देण्यात आली. संघाच्या स्थापनेमागील उद्देश, समाजातील एकात्मता आणि राष्ट्रभक्तीची भावना जागृत करण्यासाठी संघाने केलेले कार्य यावर प्रकाश टाकण्यात आला.
संघाच्या शताब्दी वर्षानिमित्त पंचपरिवर्तन या संकल्पनेवर विशेष भर देण्यात आला. कुटुंब प्रबोधन, सामाजिक समरसता, पर्यावरण संरक्षण, स्वदेशीचा आग्रह आणि नागरिक कर्तव्य या पाच विषयांच्या माध्यमातून समाजात सकारात्मक बदल घडविण्याचे आवाहन करण्यात आले. पंचपरिवर्तन ही केवळ संघटनात्मक संकल्पना नसून प्रत्येक व्यक्तीने आपल्या दैनंदिन जीवनात आचरणात आणण्याची सामाजिक जबाबदारी असल्याचे मार्गदर्शन मान्यवरांनी केले. कुटुंबात संस्कार, समाजात बंधुभाव, पर्यावरणाप्रती संवेदनशीलता, स्वदेशी वस्तूंचा वापर आणि राष्ट्राप्रती कर्तव्यभावना यांचा अंगीकार करण्याचे आवाहन करण्यात आले.
गडचिरोली नगरात विविध भागांत सुरू असलेल्या सुमारे ३२ ते ३३ शाखांच्या माध्यमातून समाजाला एकत्र आणण्याचे कार्य सुरू असल्याचे सांगण्यात आले. शाखांच्या माध्यमातून स्वयंसेवकांमध्ये शिस्त, संघभावना आणि सामाजिक बांधिलकी रुजविण्याबरोबरच समाजातील विविध क्षेत्रांत सकारात्मक योगदान देण्याचा प्रयत्न केला जात असल्याचे नमूद करण्यात आले.
आजच्या युवा पिढीने राष्ट्ररक्षण आणि समाजरक्षणाच्या दृष्टीने सज्ज राहण्याची आवश्यकता व्यक्त करण्यात आली. देशाच्या सुरक्षिततेबरोबरच समाजातील एकता, बंधुभाव आणि परस्पर सहकार्य जपणे ही प्रत्येकाची जबाबदारी आहे. युवकांनी शारीरिक, मानसिक आणि सामाजिकदृष्ट्या सक्षम बनून राष्ट्रनिर्माणाच्या कार्यात सक्रिय योगदान द्यावे, असे आवाहन करण्यात आले.विजयादशमी उत्सवाच्या माध्यमातून समाजात नवचैतन्य निर्माण करून राष्ट्रभक्ती आणि सामाजिक बांधिलकीची भावना दृढ करण्याचा संदेश देण्यात आला. देश जगाएँ, दोष मिटाएँ, नवशक्ति संचार करें; वीरव्रती हुंकार भरें या प्रेरणादायी घोषवाक्याने विजयादशमी उत्सवाचा समारोप झाला.
