Petrol Price
कायद्याच्या चौकटीचा गैरवापर नको : विद्यार्थिनींना जागृतीचा संदेश
- लोकमान्य टिळक कन्या विद्यालयात जनजागृती कार्यक्रम; ३०० विद्यार्थिनींचा सहभाग
विदर्भ न्यूज एक्सप्रेस
प्रतिनिधी / चंद्रपूर : लोकमान्य टिळक कन्या विद्यालय, चंद्रपूर येथे जिल्हा बाल संरक्षण कक्षाच्या वतीने जनजागृती कार्यक्रमाचे आयोजन करण्यात आले. यावेळी विद्यार्थिनींना जिल्हा बाल संरक्षण कक्षामार्फत राबविण्यात येणाऱ्या विविध योजना तसेच चाईल्ड हेल्पलाईनबाबत सविस्तर माहिती देण्यात आली.
कार्यक्रमात महिलांच्या संरक्षणासाठी करण्यात आलेल्या विविध कायद्यांची माहिती देताना त्यांचा गैरवापर करू नये, असे आवाहन करण्यात आले. प्रत्येक नाण्याला दोन बाजू असतात, त्याचप्रमाणे प्रत्येक घटनेलाही चांगली-वाईट अशी दोन बाजू असू शकतात. त्यामुळे केवळ एखाद्याला कायद्याच्या चौकटीत आणण्यासाठी किंवा वैयक्तिक रागातून कायद्याचा चुकीचा वापर करू नये, याबाबत विद्यार्थिनींना मार्गदर्शन करण्यात आले. यावेळी शिक्षक हे विद्यार्थ्यांचे गुरु असून त्यांचा नेहमी आदर व सन्मान केला पाहिजे. विद्यार्थिनींनी मन लावून अभ्यास करून जीवनात मोठे ध्येय गाठावे, असा संदेशही मार्गदर्शनातून देण्यात आला.
कार्यक्रमाला सुमारे ३०० विद्यार्थिनी तसेच १० ते १२ शिक्षक उपस्थित होते. जिल्हा बाल संरक्षण कक्षाच्या सोशल वर्कर प्रतिभा मडावी, डाटा ऑपरेटर कल्पना कांत आणि चाईल्ड हेल्पलाईनच्या केस वर्कर किरण बोहरा यांनी विद्यार्थिनींना विविध विषयांवर मार्गदर्शन केले. कार्यक्रमातून बालकांचे हक्क, संरक्षण आणि उपलब्ध मदत यंत्रणांबाबत विद्यार्थिनींमध्ये जनजागृती करण्यात आली.
