भगवान बिरसा मुंडा यांच्या १५१ व्या जयंतीनिमित्त गडचिरोलीत जनजातीय गौरव दिन उत्साहात साजरा


- माजी खासदार डॉ. अशोकजी नेते यांची प्रमुख उपस्थिती; बिरसा कला संगममधून आदिवासी संस्कृती, परंपरा आणि लोककलेचे भव्य दर्शन
विदर्भ न्यूज एक्सप्रेस
प्रतिनिधी / गडचिरोली : जल, जंगल आणि जमिनीवरील आदिवासी समाजाच्या हक्कांच्या रक्षणासाठी ब्रिटिश सत्तेविरुद्ध संघर्षाची मशाल पेटविणारे महान स्वातंत्र्यसेनानी, आदिवासी समाजाचे आराध्य दैवत तथा क्रांतिसूर्य धरती आबा भगवान बिरसा मुंडा यांच्या १५१ व्या जयंतीनिमित्त गडचिरोली येथे जनजातीय गौरव दिन सोहळा मोठ्या उत्साहात आणि जल्लोषात साजरा करण्यात आला. या सोहळ्याला माजी खासदार तथा भाजपा अनुसूचित जनजाती मोर्चाचे राष्ट्रीय महामंत्री डॉ. अशोकजी नेते यांची प्रमुख उपस्थिती होती. विविध आदिवासी जमातींच्या पारंपरिक वेशभूषा, लोकनृत्य, वाद्ये आणि सांस्कृतिक कलाविष्कारांनी संपूर्ण परिसर जनजातीय संस्कृतीच्या रंगात रंगून गेला होता.
भव्य जनजातीय गौरव रॅलीने वेधले लक्ष -
जनजातीय गौरव दिनानिमित्त सकाळी गडचिरोली शहरातील इंदिरा गांधी चौकातून भव्य जनजातीय गौरव रॅली काढण्यात आली. पारंपरिक वाद्यांचा गजर, विविध जनजातींच्या वैशिष्ट्यपूर्ण वेशभूषा आणि आदिवासी बांधवांचा उत्स्फूर्त सहभाग यामुळे रॅलीला विशेष आकर्षण प्राप्त झाले. या रॅलीचे माजी खासदार डॉ. अशोकजी नेते यांनी रेड्डी गोडाऊन चौकात पुष्पवृष्टी करून स्वागत केले.
यावेळी आयोजित बिरसा कला संगम या विशेष सांस्कृतिक महोत्सवातून विविध आदिवासी जमातींच्या समृद्ध लोककला, पारंपरिक नृत्य, रूढी-परंपरा, वेशभूषा आणि सांस्कृतिक वैभवाचे मनमोहक दर्शन घडले. आदिवासी समाजाची स्वतंत्र अस्मिता, सांस्कृतिक ओळख आणि गौरवशाली परंपरा जतन करण्याचा संदेश या महोत्सवातून देण्यात आला.
पंतप्रधान नरेंद्र मोदी यांची ऑनलाइन उपस्थिती -
या सोहळ्यात पंतप्रधान नरेंद्र मोदी यांनी ऑनलाइन माध्यमातून सहभाग घेत भगवान बिरसा मुंडा यांच्या १५१ व्या जयंतीनिमित्त शुभेच्छा दिल्या. देशातील आदिवासीबहुल भाग विकासाच्या नव्या पर्वात प्रवेश करीत असून, आदिवासी समाजाच्या सर्वांगीण विकासासाठी केंद्र शासन विविध योजनांच्या माध्यमातून प्रयत्नशील असल्याचे त्यांनी अधोरेखित केले. यावेळी त्यांनी महाराष्ट्र, गुजरात आणि तेलंगणा येथील तीन लाभार्थ्यांशी संवाद साधून विविध शासकीय विकास योजनांची माहिती घेत मार्गदर्शन केले.
मुख्यमंत्री देवेंद्र फडणवीस यांनी आपल्या संबोधनात जल, जंगल आणि जमिनीचे संवर्धन करून पर्यावरणाचा समतोल राखण्यावर भर दिला. गडचिरोली जिल्हा विकासाच्या बाबतीत राज्यातील अग्रेसर जिल्हा म्हणून ओळखला जाईल, असा विश्वास त्यांनी व्यक्त केला. तसेच स्टील हबच्या माध्यमातून मोठ्या प्रमाणावर रोजगारनिर्मिती होऊन जिल्ह्यातील औद्योगिक विकासाला गती मिळेल, असेही त्यांनी नमूद केले.
यावेळी उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांनीही ऑनलाइन माध्यमातून सहभाग नोंदवत सोहळ्याला शुभेच्छा दिल्या.
मुख्यमंत्र्यांकडून सांस्कृतिक प्रदर्शनाची पाहणी -
कार्यक्रमापूर्वी मुख्यमंत्री देवेंद्र फडणवीस यांनी आदिवासी समाजाच्या कुलदैवतांचे दर्शन घेतले. तसेच सांस्कृतिक प्रदर्शनाची पाहणी करून विविध आदिवासी कलाकृती आणि परंपरांची माहिती जाणून घेतली. यावेळी आमदार डॉ. मिलिंद नरोटे यांच्यासह उपस्थित मान्यवरांसोबत त्यांनी बॅडमिंटन खेळण्याचाही आनंद घेतला.
केंद्रीय व राज्यस्तरीय मान्यवरांची उपस्थिती -
या सोहळ्याला केंद्रीय जनजातीय कार्यमंत्री जुएल ओराम, केंद्रीय राज्यमंत्री दुर्गादास उईके, महाराष्ट्राचे आदिवासी विकास मंत्री डॉ. अशोक उईके, अन्न व औषध प्रशासन मंत्री नरहरी झिरवाळ, सहपालकमंत्री अॅड. आशिष जयस्वाल, राज्यमंत्री इंद्रनील नाईक, खासदार तथा भाजपा अनुसूचित जनजाती मोर्चाचे राष्ट्रीय अध्यक्ष डॉ. मन्नालाल रावत, खासदार डॉ. नामदेवराव किरसान, राज्यसभा खासदार माया इवनाते, आमदार धर्मरावबाबा आत्राम, आमदार डॉ. मिलिंद नरोटे, माजी राज्यमंत्री राजे अमरीशराव आत्राम यांची उपस्थिती होती.
याशिवाय केंद्रीय आदिवासी कार्य विभागाच्या सचिव रंजना चोप्रा, महाराष्ट्र राज्याच्या आदिवासी विकास विभागाचे सचिव विजय वाघमारे यांच्यासह विविध लोकप्रतिनिधी, वरिष्ठ प्रशासकीय अधिकारी, सामाजिक कार्यकर्ते आणि आदिवासी समाजबांधव मोठ्या संख्येने सहभागी झाले होते.
भगवान बिरसा मुंडा यांचे विचार सामाजिक परिवर्तनाचे प्रेरणास्रोत -
भगवान बिरसा मुंडा यांचा संघर्ष हा केवळ आदिवासी समाजापुरता मर्यादित नसून अन्याय, शोषण आणि परकीय सत्तेविरुद्ध स्वाभिमानाने उभे राहण्याची प्रेरणा देणारा इतिहास आहे. जल, जंगल, जमीन आणि समाजाच्या स्वाभिमानाच्या रक्षणासाठी त्यांनी दिलेला लढा आजही नव्या पिढीसाठी प्रेरणादायी व दिशादर्शक आहे.
त्यांच्या क्रांतिकारी विचारांचा आणि संघर्षमय वारशाचा जागर करीत आदिवासी समाजाच्या सामाजिक, शैक्षणिक, सांस्कृतिक आणि आर्थिक प्रगतीसाठी शासन, प्रशासन व समाजाने एकत्रितपणे प्रयत्न करण्याचा संदेश या सोहळ्यातून देण्यात आला.
आदिवासी संस्कृतीचे जतन व संवर्धन करण्यासोबतच तिचा गौरवशाली वारसा नव्या पिढीपर्यंत पोहोचविण्याच्या दृष्टीने गडचिरोली येथे आयोजित जनजातीय गौरव दिन सोहळा आदिवासी समाजाच्या अस्मितेचा, एकतेचा आणि सांस्कृतिक वैभवाचा उत्सव ठरला.




Petrol Price




