गडचिरोली जिल्ह्यात वाघाचे इसमावरील हल्ले सुरूच, पुन्हा घेतला एकाचा बळी


- नरभक्षक वाघ वनविभागाला देत आहे हुलकावणी, जेरबंद करण्याचे शर्थीचे प्रयत्न सुरु 

विदर्भ न्यूज एक्सप्रेस
प्रतिनिधी / गडचिरोली :
जिल्हयात वाघाचे इमसावरील हल्ले सुरूच असून आज १५ सप्टेंबर रोजी आरमोरी तालुक्यातील देलोडा खुर्द येथील इसमावर नरभक्षक वाघाने हल्ला करून ठार केल्याची घटना उघडकीस आली. भिमदेव खोमाजी नागापूरे (६०) रा. देलोडा खुर्द असे वाघाच्या हल्ल्यात ठार झालेल्या इसमाचे नाव आहे.
जिल्हयात आक्टोबर २०२० पासून वाघाच्या हल्यात इसम ठार होण्याचे सत्र सुरूच आहे. ऑक्टोबर २०२० पासून आतापर्यंत तब्बल १४ लोकांचा बळी नरभक्षक वाघाने  घेतला आहे. सदर नरभक्षक वाघाचा बंदोबस्त करण्याकरिता परिसरातील नागरिकांनी अनेकदा वनविभाग, जिल्हा प्रशासनास विनवणी केली मात्र ते फोल ठरली. काल पुन्हा सदर नरभक्षी वाघाचा बंदोबस्त करण्यात यावा याकरिता गडचिरोली वनवृत्त कार्यालयावर ढोल बजाओ मोर्चा काढण्यात  आला होता. सदर आंदोलनाची दखल घेवून वनविभागाच्यावतीने वाघाला बेशुध्द करून जेरबद करण्यासाठी प्रयत्न केले जात असतांनाच आज पुन्हा एकाचा वाघाने बळी घेतल्याचे उघडकीस आले आहे. मृतक भिमदेव नागापूरे हे काल १४ सप्टेंबर रोजी बैल चारण्यारिता जंगलात गेले असता नरभक्षक वाघाने त्यांच्यावर हल्ला करून ठार केले. एवढेच नाही तर वाघाने त्यांचा पोटापासूनचा खालील सर्व भाग खाल्ला असल्याचे दिसुन येत आहे. नागापूरे हे काल बैल चारण्याकरिता गेले पंरतु घरी परत न आल्याने शोधाशोध करण्यात आली आज १५ सप्टेंबर रोजी त्यांचे अर्धवट मृत शरीर जंगल परिसरात आढळून आले.
नरभक्षक वाघाला बेशुध्द करून जेरबंद करण्यासाठी नवेगांव, नागझिरा येथील तीन चमु आल्या असल्याचे गडचिरोली वनवृत्ताचे मुख्य वनसंरक्षक डॉ. मानकर यांनी सांगितले आहे. वाघाला जेरबंद करण्याकरिता जंगलात ट्रॅप कॅमेरे लावले असून गावागावात युवकांच्या चमु तयार केल्या आहेत. ट्रॅप कॅमेरे लावले असलेल्या जागेवर पिंजरे लावण्यात आले असून वाघ पिंजऱ्यास हुलकावणी देत असल्याचेही सांगितले. 




  Print






News - Gadchiroli | Posted : 2021-09-15



Related Photos