Petrol Price
रुग्णाचा जीव वाचविण्यासाठी धावलेल्या महिला डॉक्टरांनाच रोखले : चौगाण आरोग्य केंद्रात १० ते १२ जणांचा धुडगूस
विदर्भ न्यूज एक्सप्रेस
प्रतिनिधी / चंद्रपूर : रुग्णाची प्रकृती गंभीर असल्याची माहिती मिळताच तातडीने उपचारासाठी धाव घेतलेल्या महिला वैद्यकीय अधिकाऱ्यालाच मद्यधुंद जमावाने आरोग्य केंद्रात प्रवेश करण्यापासून रोखल्याची धक्कादायक घटना ब्रह्मपुरी तालुक्यातील चौगाण येथील प्राथमिक आरोग्य केंद्रात घडली. आमचा रुग्ण दगावला तरी चालेल, तुम्हाला आत जाऊ देणार नाही, अशा धमकीवजा शब्दांत डॉक्टरांना अडविण्यात आले. या प्रकारामुळे महिला वैद्यकीय अधिकारी आणि आरोग्य कर्मचाऱ्यांमध्ये भीतीचे वातावरण निर्माण झाले. याप्रकरणी ब्रह्मपुरी पोलिसांनी गुन्हा नोंदविला आहे.
प्राथमिक आरोग्य केंद्र चौगाण येथे वैद्यकीय अधिकारी म्हणून कार्यरत असलेल्या अनघा रमेश उंदीरवाडे (वय ३०) यांची १० नोव्हेंबर रोजी सकाळी ८ ते ११ नोव्हेंबर रोजी सकाळी ८ वाजेपर्यंत ड्युटी होती. दरम्यान, १० नोव्हेंबर रोजी रात्री ८.०५ वाजताच्या सुमारास चौगाण येथील वंदना दादाजी अर्जुनकार (वय ६०) यांना चक्कर येत असल्याने उपचारासाठी प्राथमिक आरोग्य केंद्रात आणण्यात आले. तपासणीत त्यांच्या रक्तातील साखरेचे प्रमाण वाढल्याचे लक्षात आल्याने आरोग्य सेविकेने डॉक्टरांना फोन करून माहिती दिली.
रुग्णाची प्रकृती लक्षात घेऊन डॉक्टरांनी रक्तदाब, शुगर आणि ईसीजी तपासणी करण्याच्या सूचना दिल्या. त्यानंतर औषधनिर्माण अधिकाऱ्यासह त्या रात्री ८.२३ वाजता प्राथमिक आरोग्य केंद्रात पोहोचल्या. मात्र, तेथे १० ते १२ जणांनी आतील चॅनल गेट दुपट्ट्याने बांधून बंद केले होते. त्यामुळे डॉक्टरांना रुग्णाची तपासणी करण्यासाठी आत जाता येत नव्हते.
डॉक्टरांनी जमावाला रुग्णाची आधी तपासणी करू द्या, त्यानंतर तुमच्याशी चर्चा करू, अशी वारंवार विनंती केली. मात्र, जमावाने त्यांचे म्हणणे ऐकण्याऐवजी अरेरावी सुरू केली. आमचा रुग्ण दगावला तरी चालेल, तुम्हाला आत जाऊ देणार नाही, असे म्हणत डॉक्टरांना धमकावण्यात आले. जमावातील अनेक जण मद्यप्राशन केलेल्या अवस्थेत असल्याचेही तक्रारीत नमूद करण्यात आले आहे. महिला डॉक्टरांसह त्यांच्यासोबत उपस्थित आरोग्य सेविका आणि सफाई कामगारांनाही मोठ्या आवाजात धमकावण्यात आले.
या गोंधळामुळे आरोग्य केंद्रात महिलांसाठी असुरक्षित वातावरण निर्माण झाले. डॉक्टरांनी आपत्कालीन मदतीसाठी ११२ क्रमांकावर संपर्क साधण्याचा प्रयत्न केला; मात्र जमावाच्या धिंगाण्यामुळे संपर्क होऊ शकला नाही. रात्री १०.३० वाजेपर्यंत हा प्रकार सुरू होता. त्यानंतर रुग्णावर उपचार करण्यात आले. प्रकृती सुधारल्यानंतर रात्री १०.५० वाजताच्या सुमारास डॉक्टर आणि सहकारी कर्मचाऱ्यांनी रुग्णाला तिच्या घरी पोहोचविले.
या प्रकरणी आरोग्य केंद्रातील कर्मचाऱ्यांनी दिलेल्या माहितीनुसार शिवाजी पत्रे, प्रफुल अर्जुनकार, रत्नाकर मेश्राम, मयूर देवघडे, रुपेश अर्जुनकार, शिवम कुंभारे, दादू मेघराज पत्रे, अंबादास अशोक देवारी आणि इतर व्यक्तींविरुद्ध ब्रह्मपुरी पोलीस ठाण्यात तक्रार दाखल करण्यात आली. त्यानुसार पोलिसांनी गुन्हा नोंदविला आहे.
पुढील तपास ब्रह्मपुरी पोलीस ठाण्याचे ठाणेदार कांचन पांडे यांच्या मार्गदर्शनाखाली पोलीस उपनिरीक्षक रेखलाल गौतम करीत आहेत.
ग्रामीण भागात रात्रंदिवस रुग्णसेवा देणाऱ्या आरोग्य कर्मचाऱ्यांनाच अशा प्रकारे धमकावले जात असेल, तर त्यांनी सुरक्षितपणे कर्तव्य कसे बजवायचे, असा प्रश्न या घटनेमुळे उपस्थित झाला आहे. रुग्णसेवेच्या ठिकाणी दहशत निर्माण करणाऱ्या प्रवृत्तींवर कठोर कारवाई होण्याची मागणी होत आहे.
