Petrol Price
व्हीआयपींच्या दौऱ्यासाठी मुख्य मार्गावरील अतिक्रमण हटविले
- मुख्यमंत्री, राज्यपालांच्या आगमनासाठी रस्ता मोकळा; अचानक कारवाईमुळे छोट्या व्यावसायिकांमध्ये नाराजी
विदर्भ न्यूज एक्सप्रेस
प्रतिनिधी / गडचिरोली : जिल्हा स्टेडियमवर १५ नोव्हेंबर रोजी आयोजित राष्ट्रीय स्तरावरील जनजाती गौरव दिन कार्यक्रमाच्या पार्श्वभूमीवर शहरातील मुख्य मार्गावरील अतिक्रमणे हटविण्याची मोहीम राबविण्यात आली आहे. राज्यपाल जिष्णू देव वर्मा, केंद्रीय रस्ते वाहतूक व महामार्ग मंत्री नितीन गडकरी आणि मुख्यमंत्री देवेंद्र फडणवीस या कार्यक्रमाला उपस्थित राहणार असल्याने त्यांच्या आगमनाचा मार्ग मोकळा करण्यासाठी रस्त्याच्या दुतर्फा असलेली छोट्या व्यावसायिकांची दुकाने पोलीस बंदोबस्तात हटविण्यात आली.
गेल्या दोन दिवसांपासून ही अतिक्रमण हटाव मोहीम सुरू आहे. इंदिरा गांधी चौक ते जिल्हा स्टेडियमपर्यंतच्या मार्गावर रस्त्याच्या दोन्ही बाजूंना फूटपाथलगत अनेक छोट्या व्यावसायिकांनी तात्पुरती दुकाने थाटली होती. यामध्ये चहाच्या टपऱ्या, पानठेले, खाद्यपदार्थ विक्रेते, वाहन दुरुस्तीची दुकाने तसेच विविध वस्तूंची विक्री करणाऱ्या व्यावसायिकांचा समावेश होता.
या कारवाईमुळे संबंधित छोट्या व्यावसायिकांना आपली दुकाने हटवावी लागली असून, त्यांच्या व्यवसायावर परिणाम झाला आहे. जनजाती गौरव दिनाच्या राष्ट्रीय स्तरावरील कार्यक्रमासाठी राज्यातील प्रमुख मान्यवर शहरात येणार असल्याने प्रशासनाकडून मुख्य मार्गावरील वाहतूक व्यवस्था, स्वच्छता आणि सुरक्षिततेच्या दृष्टीने तयारी केली जात आहे. याच पार्श्वभूमीवर व्हीआयपींच्या आगमन मार्गावरील अतिक्रमणे हटवून रस्ता मोकळा करण्यात आला आहे.
मात्र, ही कारवाई कोणतीही पूर्वसूचना न देता अचानक करण्यात आल्याचा आरोप छोट्या व्यावसायिकांकडून केला जात आहे. अनेकांचा उदरनिर्वाह या छोट्या दुकानांवर अवलंबून असून, अचानक दुकाने हटविल्याने त्यांच्या रोजीरोटीचा प्रश्न निर्माण झाला आहे. प्रशासनाने कारवाईपूर्वी पूर्वसूचना देणे किंवा पर्यायी व्यवस्था उपलब्ध करून देणे आवश्यक होते, अशी भावना व्यावसायिकांकडून व्यक्त होत आहे. त्यामुळे या अतिक्रमण हटाव मोहिमेबाबत छोट्या व्यावसायिकांमध्ये नाराजी आणि असंतोषाचे वातावरण निर्माण झाले आहे.
