Petrol Price
वयाच्या ३० व्या वर्षी २२ वेळा रक्तदान : यिशिता काळे यांचा देहदानाचाही संकल्प
विदर्भ न्यूज एक्सप्रेस
प्रतिनिधी / चंद्रपूर : स्वतःच्या रक्ताचा प्रत्येक थेंब एखाद्याला जीवनदान देऊ शकतो, तर मृत्यूनंतरही आपला देह आणि अवयव दुसऱ्याच्या आयुष्यात आशेचा किरण निर्माण करू शकतात, या भावनेतून सामाजिक बांधिलकी जपणाऱ्या यिशिता काळे यांनी माणुसकीचा अनोखा आदर्श उभा केला आहे. वयाच्या अवघ्या ३० व्या वर्षी २२ वेळा रक्तदान करून त्यांनी अनेक गरजू रुग्णांना जीवनदान देण्याच्या कार्यात योगदान दिले आहे. यासोबतच देहदान आणि अवयवदानाचा संकल्प करून त्यांनी समाजासमोर सेवाभावाचा प्रेरणादायी आदर्श ठेवला आहे. त्यांच्या या कार्याचा मराठा सेवा संघ व जिजाऊ ब्रिगेड, राजुरा शाखेच्या वतीने पुस्तक आणि रोपटे भेट देऊन गौरव करण्यात आला.
राजुरा येथील देशपांडे वाडीमध्ये आई-वडिलांसोबत राहणाऱ्या यिशिता काळे या संगणक अभियंता आहेत. तंत्रज्ञानाच्या क्षेत्रात कार्यरत असतानाही समाजातील वंचित, गरजू आणि दुर्लक्षित घटकांच्या वेदना जाणून घेण्याची त्यांची संवेदनशील वृत्ती विशेष उल्लेखनीय आहे. रक्तदानातून गरजू रुग्णांना मदत मिळू शकते, या विश्वासातून त्यांनी आतापर्यंत २२ वेळा रक्तदान केले आहे. एवढ्यावरच न थांबता, मृत्यूनंतरही आपला देह आणि अवयव दुसऱ्याच्या उपयोगी पडावेत, या उदात्त भावनेतून त्यांनी देहदान व अवयवदानाचा संकल्प केला आहे.
समाजातील शेवटच्या घटकापर्यंत मदतीचा हात पोहोचावा, यासाठी यिशिता सातत्याने प्रयत्नशील असतात. तांडे, वस्त्या, झोपडपट्ट्या आणि दुर्गम भागांत जाऊन त्या वंचित नागरिकांच्या समस्या जाणून घेतात. आरोग्य, शिक्षण, अन्न आणि निवारा यांसारख्या मूलभूत सुविधा गरजू नागरिकांना मिळाव्यात, यासाठी शासनाकडे पत्रव्यवहार करून पाठपुरावा करतात. समाजातील प्रश्नांकडे केवळ प्रेक्षक म्हणून न पाहता, ते सोडविण्यासाठी स्वतः पुढाकार घेण्याची त्यांची भूमिका त्यांच्या सामाजिक जाणिवेची साक्ष देते.
रक्तदान हे श्रेष्ठदान असून, त्यातून एखाद्या गरजू व्यक्तीला जीवनदान मिळू शकते. त्यामुळे तरुणांनी रक्तदानासाठी पुढे यावे आणि समाजाप्रती आपली जबाबदारी ओळखावी, असे यिशिता यांचे मत आहे. समाजासाठी केलेल्या छोट्याशा कृतीतूनही एखाद्याच्या आयुष्यात मोठा बदल घडू शकतो, हा विश्वास त्यांच्या कार्यातून दिसून येतो.
यिशिता काळे यांच्या सेवाभावी कार्याची दखल घेत मराठा सेवा संघ व जिजाऊ ब्रिगेड, राजुरा शाखेच्या वतीने त्यांचा सन्मान करण्यात आला. यावेळी त्यांना ‘रामस्वामी पेरियार आणि स्त्रीवाद’ हे पुस्तक आणि एक रोपटे भेट देण्यात आले. ज्ञानाचा विचार आणि निसर्गसंवर्धनाचा संदेश देणाऱ्या या भेटीतून त्यांच्या सामाजिक कार्याचा गौरव करण्यात आला.
या सत्कारप्रसंगी मराठा सेवा संघाचे दिनेश पारखी, मेघा धोटे, गोवर्धन कासवटे, पुंडलिक वाढई, विद्या चौधरी, मैत्रेयी बोबडे, मंदा घुगुल, कांचन तुराणकर, सरिता खडसे, अश्विनी ढपकस, पंचफुला मटाले, पुष्पा बोरकुटे, चिमुकली हिराई मारोती कुरवटकर यांच्यासह विविध क्षेत्रांतील मान्यवर उपस्थित होते.
वयाच्या अवघ्या ३० व्या वर्षी २२ वेळा रक्तदान, तसेच देहदान आणि अवयवदानाचा संकल्प करणाऱ्या यिशिता काळे यांचा प्रवास तरुण पिढीसाठी प्रेरणादायी आहे. जगणे केवळ स्वतःपुरते मर्यादित नसते, तर आपल्या अस्तित्वाचा उपयोग दुसऱ्याच्या आयुष्यात आनंद फुलवण्यासाठीही होऊ शकतो, हा संदेश त्यांनी आपल्या कृतीतून दिला आहे.
