Petrol Price
गडचिरोली तालुक्यातील २३२ निराधारांना मिळणार मासिक अर्थसहाय्य
- संजय गांधी निराधार योजना समितीच्या बैठकीत २५५ प्रकरणांचा आढावा; २३ अर्ज नामंजूर
विदर्भ न्यूज एक्सप्रेस
प्रतिनिधी / गडचिरोली : निराधार वृद्ध व्यक्ती, अंध, दिव्यांग, शारीरिक व मानसिक आजाराने ग्रस्त व्यक्ती, निराधार विधवा, परित्यक्त्या, देवदासी महिला तसेच अनाथ बालकांना आर्थिक आधार देण्यासाठी शासनाच्या विविध विशेष सहाय्य योजनांची अंमलबजावणी केली जाते. या योजनांच्या माध्यमातून पात्र लाभार्थ्यांना दरमहा अर्थसहाय्य दिले जाते. या योजनांचा लाभ अधिकाधिक गरजू नागरिकांपर्यंत पोहोचविण्याच्या उद्देशाने गडचिरोली तालुका संजय गांधी निराधार योजना समितीची बैठक ४ नोव्हेंबर २०२६ रोजी समितीचे अध्यक्ष यश कोंडावार यांच्या अध्यक्षतेखाली पार पडली. या बैठकीत विविध योजनांअंतर्गत प्राप्त झालेल्या एकूण २५५ अर्जांपैकी २३२ अर्ज मंजूर करण्यात आले, तर २३ अर्ज नामंजूर करण्यात आले.
शासनाच्या विशेष सहाय्य योजनांची माहिती सर्वसामान्य नागरिकांपर्यंत पोहोचविण्यासाठी गडचिरोली तालुक्यात छत्रपती शिवाजी महाराज महाराजस्व अभियान, मुख्यमंत्री महिला सशक्तीकरण अभियान तसेच विविध जनजागृती कार्यक्रम राबविण्यात येत आहेत. या माध्यमातून इच्छुक लाभार्थ्यांकडून विहित नमुन्यात अर्ज स्वीकारले जातात. त्यानंतर ग्राम महसूल अधिकाऱ्यांकडून अर्जांची तपासणी करून आपले सेवा केंद्र चालकांमार्फत ऑनलाइन पद्धतीने तहसील कार्यालयात सादर केले जातात.
या प्रक्रियेद्वारे प्राप्त झालेली ऑनलाइन प्रकरणे ४ नोव्हेंबर रोजी संजय गांधी निराधार योजना समितीच्या बैठकीसमोर ठेवण्यात आली. समितीने अर्जांची छाननी करून पात्र लाभार्थ्यांचे अर्ज मंजूर केले.
चार योजनांमधील अर्जांचा तपशील -
बैठकीत संजय गांधी निराधार अनुदान योजनेअंतर्गत प्राप्त झालेल्या १५० अर्जांपैकी १४० अर्ज मंजूर करण्यात आले, तर १० अर्ज नामंजूर करण्यात आले. श्रावणबाळ सेवा राज्य निवृत्तीवेतन योजनेतील ६७ अर्जांपैकी ६४ अर्ज मंजूर झाले असून, ३ अर्ज नामंजूर करण्यात आले.
इंदिरा गांधी राष्ट्रीय विधवा निवृत्तीवेतन योजनेअंतर्गत प्राप्त २१ अर्जांपैकी १६ अर्जांना मंजुरी देण्यात आली, तर ५ अर्ज नामंजूर झाले. तसेच इंदिरा गांधी राष्ट्रीय वृद्धापकाळ निवृत्तीवेतन योजनेतील १७ अर्जांपैकी १२ अर्ज मंजूर करण्यात आले असून, ५ अर्ज नामंजूर करण्यात आले.
अशा प्रकारे चारही योजनांमधील एकूण २५५ प्रकरणांपैकी २३२ प्रकरणांना मंजुरी मिळाली आहे. त्यामुळे संबंधित पात्र लाभार्थ्यांना शासनाच्या नियमानुसार मासिक अर्थसहाय्याचा लाभ मिळण्याचा मार्ग मोकळा झाला आहे.
समितीच्या बैठकीला पदाधिकाऱ्यांची उपस्थिती -
या बैठकीला समितीचे अध्यक्ष यश कोंडावार यांच्यासह सदस्य वसंत गावतुरे, दीपक भारसागडे, संदीप जीवन शिंगाडे, दत्तू माकोडे आणि प्रमोद सुधाकर उमरगुंडावार उपस्थित होते. तसेच गडचिरोलीचे संवर्ग विकास अधिकारी अनिकेत पाटील हे शासकीय सदस्य म्हणून उपस्थित होते.
विशेष सहाय्य योजनांची ऑनलाइन प्रकरणे निकाली काढण्यासाठी तहसील कार्यालयातील नायब तहसीलदार (संजय गांधी योजना) डी. ए. ठाकरे, सहायक महसूल अधिकारी अमोल नन्नावरे आणि महसूल सहाय्यक एस. जे. नरुले यांनी सहकार्य केले.
पात्र लाभार्थ्यांनी अर्ज सादर करण्याचे आवाहन -
दरम्यान, विशेष सहाय्य योजनांचा लाभ घेण्यासाठी शासनाच्या नियमानुसार पात्र असलेल्या नागरिकांनी आवश्यक कागदपत्रांसह विहित नमुन्यात अर्ज सादर करावेत. संबंधित अर्जांची ग्राम महसूल अधिकाऱ्यांकडून तपासणी झाल्यानंतर आपले सेवा केंद्र चालकांमार्फत ऑनलाइन पद्धतीने तहसील कार्यालयात सादर करावेत, असे आवाहन तहसीलदार, गडचिरोली यांनी केले आहे.
