Petrol Price
हत्तींचा हैदोस! वडसा, पिंपळगाव परिसरातील शेतकऱ्यांचे मोठे नुकसान
- १५ ते २० शेतकऱ्यांच्या पिकांसह मोटारपंप, सोलर पंप व सोलर प्लेटची नासधूस; तातडीने पंचनामे करण्याची मागणी
विदर्भ न्यूज एक्सप्रेस
तालुका प्रतिनिधी / वडसा : देसाईगंज (वडसा) तालुक्यात जंगली हत्तींच्या वाढत्या उपद्रवामुळे शेतकरी मोठ्या संकटात सापडले आहेत. विहीरगाव-पिंपळगाव (ह.) परिसरातील शेतशिवारात हत्तींच्या कळपाने धुमाकूळ घालत पिकांचे तसेच शेतीसाठी वापरण्यात येणाऱ्या मोटारपंप, सोलर पंप आणि सोलर प्लेटचे मोठ्या प्रमाणात नुकसान केले आहे. २५ ऑक्टोबर रोजी घडलेल्या या घटनेत परिसरातील सुमारे १५ ते २० शेतकऱ्यांना फटका बसल्याची माहिती आहे. आधीच दुष्काळसदृश परिस्थितीमुळे चिंतेत असलेल्या शेतकऱ्यांसमोर आता आर्थिक संकट उभे ठाकले आहे.
पिकांसह शेतीच्या साहित्याचीही नासधूस -
विहीरगाव परिसरातील शेतकरी मनोहर श्रावण निहाटे, गजानन मारोती पिलावन, शंकर काशीराम कांबळे, दशरथ धोंगडे आणि हरिदास लहानू गेडाम यांच्या शेतातील पिकांचे मोठ्या प्रमाणात नुकसान झाले आहे. हत्तींच्या कळपाने शेतातील पिकांची नासधूस करण्याबरोबरच मोटारपंप व सोलर पंपांचेही नुकसान केले. पिंपळगाव परिसरात सोलर प्लेटची तोडफोड झाल्याने सिंचन व्यवस्थेवरही परिणाम झाला आहे.
शेतीसाठी शेतकऱ्यांनी केलेली गुंतवणूक आणि पिकांच्या उत्पादनातून मिळणाऱ्या अपेक्षित उत्पन्नावर या घटनेमुळे पाणी फिरले आहे. पिकांचे नुकसान झाल्याने आगामी काळातील आर्थिक नियोजनही कोलमडण्याची भीती शेतकऱ्यांकडून व्यक्त केली जात आहे.
पंचनामे रखडल्याने शेतकऱ्यांची चिंता वाढली -
हत्तींच्या उपद्रवामुळे नुकसान झाल्यानंतरही पंचनाम्यांची प्रक्रिया सुरू न झाल्याने शेतकऱ्यांमध्ये नाराजी आहे. नुकसानग्रस्त शेतकऱ्यांना वेळेत मदत मिळावी, यासाठी प्रशासनाने तातडीने प्रत्यक्ष शेतात जाऊन नुकसानीची पाहणी करावी आणि पंचनामे पूर्ण करावेत, अशी मागणी होत आहे.
वन्यप्राण्यांमुळे शेतीचे नुकसान झाल्यानंतर वनविभागाकडून मिळणारी आर्थिक मदत अपुरी पडत असल्याची खंतही शेतकऱ्यांनी व्यक्त केली आहे. पिकांचे नुकसान, शेतीतील उपकरणांची दुरुस्ती आणि सिंचन व्यवस्था पुन्हा उभी करण्यासाठी मोठा खर्च करावा लागणार असल्याने शेतकऱ्यांसमोरील अडचणी वाढल्या आहेत.
आमदार रामदास मसराम यांची घटनास्थळी भेट -
या घटनेची माहिती मिळताच आमदार रामदास मसराम यांनी नुकसानग्रस्त भागाला भेट देऊन परिस्थितीची पाहणी केली. नुकसानग्रस्त शेतकऱ्यांना दिलासा मिळावा, यासाठी त्यांनी प्रशासनाला तातडीने पंचनामे करण्याच्या सूचना दिल्या. नुकसानग्रस्त शेतकऱ्यांच्या नुकसानीची नोंद घेऊन त्यांना नियमानुसार मदत मिळवून देण्याची आवश्यकता त्यांनी अधोरेखित केली.
दरम्यान, वनपरिक्षेत्र अधिकारी कैलास धोंडणे यांनी हत्तींच्या उपद्रवावर नियंत्रण मिळविण्यासाठी वरिष्ठ स्तरावर उपाययोजना सुरू असल्याचे सांगितले. तसेच, नुकसानग्रस्त शेतकऱ्यांना शासकीय नियम व निकषांनुसार मदत देण्यात येईल, असे स्पष्ट केले.
कायमस्वरूपी बंदोबस्ताची मागणी -
आरमोरी तालुक्यातही काही दिवसांपूर्वी जंगली हत्तींनी धुमाकूळ घालत शेतीचे नुकसान केले होते. आता देसाईगंज तालुक्यातही अशाच प्रकारच्या घटना घडत असल्याने वनविभागाच्या उपाययोजनांबाबत शेतकऱ्यांकडून प्रश्न उपस्थित केले जात आहेत. हत्तींच्या उपद्रवामुळे वारंवार होणारे नुकसान टाळण्यासाठी ठोस आणि कायमस्वरूपी उपाययोजना करण्याची मागणी शेतकरी करीत आहेत.
जंगली हत्तींच्या हालचालींवर प्रभावी देखरेख ठेवणे, संभाव्य धोक्याची माहिती वेळेत शेतकऱ्यांपर्यंत पोहोचविणे आणि नुकसानग्रस्तांना त्वरित आर्थिक मदत देणे आवश्यक असल्याचे मत व्यक्त होत आहे.
एकीकडे दुष्काळाची झळ आणि दुसरीकडे जंगली हत्तींचा उपद्रव, अशा दुहेरी संकटात शेतकरी सापडले आहेत. त्यामुळे नुकसानग्रस्त शेतकऱ्यांचे पंचनामे तातडीने पूर्ण करून शासकीय निकषांनुसार भरपाई द्यावी आणि हत्तींच्या उपद्रवावर कायमस्वरूपी उपाययोजना कराव्यात, अशी जोरदार मागणी परिसरातील शेतकऱ्यांकडून होत आहे.
