Petrol Price
थायलंडच्या ११० भिक्खूंच्या उपस्थितीत चंद्रपुरात भव्य शांती संदेश धम्म पदयात्रा : ५ नोव्हेंबरला दीक्षाभूमी ते विजासन प्रवास
विदर्भ न्यूज एक्सप्रेस
प्रतिनिधी / चंद्रपूर : तथागत भगवान गौतम बुद्धांचा शांती, करुणा, मैत्री आणि बंधुतेचा सार्वत्रिक संदेश जनमानसात रुजविण्याच्या उद्देशाने चंद्रपूर जिल्ह्यात भव्य शांती संदेश धम्म पदयात्रेचे आयोजन करण्यात आले आहे. थायलंड येथील ११० बौद्ध भिक्खूंच्या मंगलमय उपस्थितीत ५ नोव्हेंबर रोजी ही पदयात्रा चंद्रपूरच्या दीक्षाभूमीवरून भद्रावती येथील विजासनपर्यंत काढण्यात येणार आहे. बुद्धिस्ट फॉर ग्लोबल हारमोनी वेल्फेअर असोसिएशनच्या सौजन्याने आयोजित या धम्म पदयात्रेत जिल्ह्यातील बौद्ध उपासक-उपासिकांसह आंबेडकरी अनुयायांनी मोठ्या संख्येने सहभागी व्हावे, असे आवाहन आयोजकांनी केले आहे.
या धम्म पदयात्रेचा शुभारंभ करण्यासाठी ४ नोव्हेंबर रोजी सायंकाळी ६ वाजता थायलंडमधील ११० बौद्ध भिक्खूंचे चंद्रपूर येथील दीक्षाभूमीवर आगमन होणार आहे. यावेळी सामूहिक बुद्धवंदना, सुत्तपठण, धम्मदेसना, मैत्री संदेश आणि शांती प्रार्थना असे विविध धार्मिक कार्यक्रम आयोजित करण्यात आले आहेत. भिक्खू संघाच्या उपस्थितीमुळे दीक्षाभूमी परिसर धम्ममय वातावरणाने भारावून जाणार आहे.
५ नोव्हेंबर रोजी पहाटे ५ वाजता दीक्षाभूमी येथे भिक्खू संघाच्या सुत्तपठणाने आणि मंगलमय धार्मिक कार्यक्रमांनी दिवसाची सुरुवात होईल. त्यानंतर सकाळी ६ वाजता ११० बौद्ध भिक्खूंच्या नेतृत्वाखाली शांती संदेश धम्म पदयात्रेला प्रारंभ होणार आहे. ही पदयात्रा चंद्रपूर शहरातून विविध मार्गांनी मार्गक्रमण करीत भद्रावती येथील विजासन येथे पोहोचणार आहे.
पदयात्रेचा मार्ग दीक्षाभूमी, चंद्रपूर येथून संतकृपा रेस्टॉरंट, डॉ. पुनेकर हॉस्पिटल, मोरवा, ताडाळी, सीडीसीसी बँक, ऊर्जाग्राम चौक, घोडपेठ, पॉवर ग्रीड कॉलनी, सुमठाणा मार्गे भद्रावती येथील विजासन असा राहणार आहे. या संपूर्ण मार्गावर भगवान बुद्धांचा शांती, अहिंसा, करुणा आणि विश्वबंधुत्वाचा संदेश प्रसारित केला जाणार आहे.
वैराने वैर कधीही संपत नाही, अवैरानेच वैर शांत होते, हा तथागत भगवान गौतम बुद्धांचा विश्वाला दिलेला संदेश आजच्या परिस्थितीत अधिक महत्त्वाचा ठरत आहे. जगभरात वाढत असलेला संघर्ष, द्वेष, हिंसा आणि असहिष्णुतेच्या पार्श्वभूमीवर बुद्धांचा शांतता आणि मानवतेचा विचार समाजाला योग्य दिशा देणारा आहे. त्यामुळे ही धम्म पदयात्रा केवळ धार्मिक आयोजन न राहता सामाजिक सलोखा, बंधुता आणि जागतिक शांततेचा संदेश देणारी प्रेरणादायी चळवळ ठरणार आहे.
या उपक्रमाचे आयोजन डॉ. बाबासाहेब आंबेडकर मेमोरियल सोसायटी, भारतीय बौद्ध महासभा, समता सैनिक दल, ऑल इंडिया समता सैनिक दल, दीक्षाभूमी विहार विकास समिती तसेच चंद्रपूर शहरातील सर्व बौद्ध विहार व मंडळांच्या संयुक्त विद्यमाने करण्यात आले आहे. या मंगलमय धम्म पदयात्रेत बौद्ध उपासक-उपासिका, युवक-युवती, महिला आणि समस्त आंबेडकरी अनुयायांनी मोठ्या संख्येने सहभागी होऊन थायलंडच्या भिक्खू संघाचे स्वागत करावे आणि बुद्धांच्या शांती, करुणा व मैत्रीच्या संदेशाचा प्रसार करावा, असे आवाहन आयोजकांनी केले आहे.
