Petrol Price
चामोर्शीत वाघाचा शेतकऱ्यावर हल्ला : शेतकरी गंभीर जखमी
- १२ दिवसांत वाघाच्या हल्ल्याची तिसरी घटना; शेतकरी व नागरिकांमध्ये दहशत
विदर्भ न्यूज एक्सप्रेस
तालुका प्रतिनिधी / चामोर्शी : शेतात बैलांना चराईसाठी घेऊन गेल्यानंतर त्यांना घेऊन घरी परतत असलेल्या शेतकऱ्यावर दबा धरून बसलेल्या वाघाने अचानक हल्ला केला. या हल्ल्यात शेतकरी गंभीर जखमी झाला. ही घटना शनिवार, ३१ ऑक्टोबर रोजी दुपारी ३.४५ वाजताच्या सुमारास तालुक्यातील तळोधी (मो.) हद्दीतील खोर्दा येथे घडली. सुनील पिंपरे ५० वर्षे रा. खोर्दा असे जखमी शेतकऱ्याचे नाव आहे. या घटनेमुळे परिसरातील शेतकरी व नागरिकांमध्ये भीतीचे वातावरण निर्माण झाले आहे.
मिळालेल्या माहितीनुसार, सुनील पिंपरे हे नेहमीप्रमाणे आपल्या बैलांना चराईसाठी शेतात घेऊन गेले होते. दुपारी बैलांना घेऊन ते घराकडे परतत असताना श्रावण नैताम यांच्या शेताजवळ दबा धरून बसलेल्या वाघाने त्यांच्यावर अचानक झडप घातली. या अनपेक्षित हल्ल्यात पिंपरे गंभीर जखमी झाले. घटनेची माहिती मिळताच ग्रामस्थांनी घटनास्थळी धाव घेतली. जखमी पिंपरे यांना तातडीने आमगाव (म.) येथील प्राथमिक आरोग्य केंद्रात दाखल करण्यात आले. तेथे प्राथमिक उपचार केल्यानंतर पुढील उपचारासाठी त्यांना गडचिरोली येथे हलविण्यात आले.
१२ दिवसांत वाघाच्या हल्ल्याची तिसरी घटना -
घटनेची माहिती मिळताच चामोर्शीचे वनपरिक्षेत्र अधिकारी आकाश मल्लेलवार यांच्या मार्गदर्शनाखाली क्षेत्रसहायक सलीम कुरेशी आणि तळोधी बिटचे वनरक्षक प्रमोद धाडसे यांनी घटनास्थळी भेट देऊन पाहणी केली. वनविभागाच्या पथकाने घटनेचा पंचनामा केला.
दरम्यान, मागील १२ दिवसांत वाघाच्या हल्ल्याची ही तिसरी घटना आहे. यापूर्वी धानोरा तालुक्यात वाघाच्या हल्ल्यात दोघांचा बळी गेला आहे. वारंवार घडणाऱ्या या घटनांमुळे ग्रामीण भागातील नागरिकांमध्ये चिंतेचे वातावरण पसरले आहे. शेतात कामासाठी जाणाऱ्या शेतकऱ्यांच्या सुरक्षिततेचा प्रश्न ऐरणीवर आला असून, वनविभागाने वाघाचा बंदोबस्त करून नागरिकांना दिलासा द्यावा, अशी मागणी परिसरातील नागरिकांकडून होत आहे.
