Petrol Price
भरधाव ट्रकच्या धडकेत तीनचाकी स्कूटरचालकाचा मृत्यू
- किल्ले कोलार टी पॉइंटजवळ भीषण अपघात; धडक देऊन ट्रकचालक पसार
विदर्भ न्यूज एक्सप्रेस
प्रतिनिधी / नागपूर : नागपूर-सावनेर महामार्गावरील किल्ले कोलार टी पॉइंटजवळ भरधाव ट्रकने तीनचाकी स्कूटरला मागून जोरदार धडक दिल्याने स्कूटरचालकाचा घटनास्थळीच मृत्यू झाला. रवींद्र मनोहर वलोकर ५० वर्षे रा. वॉर्ड क्रमांक २, खापरखेडा, ता. सावनेर असे मृताचे नाव आहे. रविवारी २५ ऑक्टोबर दुपारी १२ वाजताच्या सुमारास हा अपघात घडला. धडक दिल्यानंतर ट्रकचालक घटनास्थळावरून पसार झाला असून, खापरखेडा पोलिस त्याचा शोध घेत आहेत.
पेट्रोल खरेदीसाठी जाताना काळाचा घाला -
रवींद्र वलोकर हे खापरखेडा येथे सलून व्यवसाय करून आपल्या कुटुंबाचा उदरनिर्वाह करीत होते. पक्षाघातामुळे त्यांना काही प्रमाणात दिव्यांगत्व आले होते. दैनंदिन ये-जा करण्यासाठी ते तीनचाकी स्कूटरचा वापर करीत असत. रविवारी दुपारी ते आपल्या एमएच-४०/सीवाय-४८९५ क्रमांकाच्या तीनचाकी स्कूटरने पेट्रोल खरेदी करण्यासाठी खापरखेडा येथून दहेगाव (रंगारी) येथे जात होते. दरम्यान, नागपूर-सावनेर महामार्गावरील किल्ले कोलार टी पॉइंटजवळ मागून वेगाने आलेल्या ट्रकने त्यांच्या स्कूटरला जोरदार धडक दिली. धडकेची तीव्रता इतकी होती की, वलोकर हे स्कूटरसह काही अंतरापर्यंत फरफटत गेले. या अपघातात त्यांना गंभीर दुखापत झाली आणि त्यांचा घटनास्थळीच मृत्यू झाला. अपघातानंतर ट्रक न थांबवता चालकाने घटनास्थळावरून पळ काढला.
पोलिसांकडून पंचनामा; अज्ञात ट्रकचालकाचा शोध सुरू -
अपघाताची माहिती मिळताच खापरखेडा पोलिसांनी घटनास्थळी धाव घेतली. पोलिसांनी घटनास्थळाची पाहणी करून पंचनामा केला. त्यानंतर मृतदेह उत्तरीय तपासणीसाठी पाठविण्यात आला. या प्रकरणी खापरखेडा पोलिसांनी अज्ञात ट्रकचालकाविरुद्ध गुन्हा नोंदविला असून, पसार झालेल्या चालकाचा शोध सुरू केला आहे.
किल्ले कोलार टी पॉइंट अपघातप्रवण -
नागपूर-सावनेर महामार्गावर चोवीस तास वाहनांची मोठ्या प्रमाणात वर्दळ असते. या मार्गावरील किल्ले कोलार टी पॉइंटजवळील वळणावर वारंवार अपघात होत असल्याने हा परिसर वाहनचालकांसाठी धोकादायक ठरत आहे. या ठिकाणी अपघातांचे प्रमाण कमी करण्यासाठी संबंधित यंत्रणांनी तातडीने लक्ष देण्याची गरज आहे. या वळणावर वाहनांचा वेग नियंत्रित करण्यासाठी गतिरोधक, योग्य दिशादर्शक व सावधानतेचे फलक तसेच आवश्यक सुरक्षा उपाययोजना करणे गरजेचे आहे. महामार्गावरील वाढती वाहतूक आणि धोकादायक वळण लक्षात घेता, भविष्यात अशा दुर्घटना टाळण्यासाठी संबंधित विभागाने ठोस पावले उचलावीत, अशी अपेक्षा व्यक्त होत आहे.
