Petrol Price
मूलमध्ये ध्वनीमर्यादा ओलांडणाऱ्या डीजेंवर पोलिसांचा दणका : ८५ लाखांचा मुद्देमाल जप्त
विदर्भ न्यूज एक्सप्रेस
प्रतिनिधी / चंद्रपूर : दुर्गादेवी विसर्जन मिरवणुकीत ध्वनिक्षेपकांच्या आवाजाची विहित मर्यादा ओलांडून ध्वनीप्रदूषण करणाऱ्या डीजे मालकांसह मंडळाच्या आयोजकांवर मूल पोलिसांनी कारवाई केली. २१ ऑक्टोबर रोजी शहरातील गांधी चौक परिसरात करण्यात आलेल्या या कारवाईत पाच वाहने व डीजे साहित्य असा एकूण ८५ लाख २१ हजार रुपयांचा मुद्देमाल जप्त करण्यात आला. या प्रकरणी पाच जणांविरुद्ध गुन्हा दाखल करण्यात आला आहे.
दुर्गादेवी विसर्जन मिरवणुकीदरम्यान कायदा व सुव्यवस्था अबाधित राखण्यासाठी तसेच ध्वनीप्रदूषण नियमांचे पालन व्हावे, यासाठी मूल पोलिसांकडून विशेष गस्त व तपासणी मोहीम राबविण्यात आली. यावेळी गांधी चौक परिसरात दरार दुर्गा मंडळाच्या विसर्जन मिरवणुकीत सहभागी असलेल्या डीजे वाहनांची तपासणी करण्यात आली. ध्वनीमापक यंत्राद्वारे आवाजाची तीव्रता मोजली असता काही डीजेवरील ध्वनिक्षेपकांचा आवाज निर्धारित मर्यादेपेक्षा अधिक असल्याचे आढळून आले.
पोलिसांनी संबंधित डीजे चालक व मंडळाच्या आयोजकांना आवाजाची तीव्रता तातडीने कमी करण्याच्या स्पष्ट सूचना दिल्या. मात्र, या सूचनांचे पालन न करता कायदेशीर आदेशांचे उल्लंघन केल्याचे निदर्शनास आल्यानंतर पोलिसांनी संबंधितांविरुद्ध कायदेशीर कारवाई केली. या कारवाईत दरार दुर्गा मंडळाचे अध्यक्ष संतोष प्रभाकर ठाकूरबार ५१ वर्षे रा. मूल, डीजे मालक व चालक अनिकेत रवी ननावरे २२ वर्षे अभिषेक चंद्रशेखर चिट्टलोजवार २२ वर्षे रा. मूल, धीरज जुगलकिशोर घिचरे ५१ वर्षे रा. मानेवाडा, नागपूर आणि लकी अनिल दुर्गे १९ वर्षे रा. बोरचांदली, ता. मूल यांच्याविरुद्ध कारवाई करण्यात आली.
या प्रकरणी मूल पोलीस ठाण्यात अपराध क्रमांक ७३२/२०२६ अन्वये भारतीय न्याय संहिता, २०२३ चे कलम २२३ तसेच महाराष्ट्र पोलीस अधिनियम, १९५१ चे कलम ३८ व १३६ अंतर्गत गुन्हा दाखल करण्यात आला आहे. कारवाईदरम्यान पाच वाहने आणि डीजे साहित्य असा एकूण ८५ लाख २१ हजार रुपयांचा मुद्देमाल जप्त करण्यात आला. ध्वनीप्रदूषणावर नियंत्रण ठेवण्यासाठी आणि सार्वजनिक शांतता अबाधित राखण्यासाठी मूल पोलिसांनी केलेल्या या कारवाईमुळे विसर्जन मिरवणुकांमध्ये ध्वनीमर्यादेचे पालन करण्याचे महत्त्व पुन्हा अधोरेखित झाले आहे.
