Petrol Price
पेन्शन अदालतीतून निवृत्तीवेतन धारकांच्या शंकांचे निरसन
- ७० हून अधिक निवृत्तीवेतन धारकांचा सहभाग; प्रलंबित प्रकरणे निकाली काढण्यासाठी अधिकाऱ्यांचे मार्गदर्शन
विदर्भ न्यूज एक्सप्रेस
प्रतिनिधी / भंडारा : महालेखापाल कार्यालय, नागपूर आणि जिल्हा कोषागार कार्यालय, भंडारा यांच्या संयुक्त विद्यमाने सामाजिक न्याय भवन येथील सभागृहात एकदिवसीय पेन्शन अदालत व मार्गदर्शन कार्यशाळेचे आयोजन करण्यात आले. या उपक्रमात ७० हून अधिक निवृत्तीवेतनधारक, शासकीय कर्मचारी तसेच सेवानिवृत्तीवेतन संघटनेचे पदाधिकारी सहभागी झाले होते. यावेळी पेन्शनसंदर्भातील विविध शंका, किचकट प्रकरणे आणि तांत्रिक व प्रशासकीय अडचणींबाबत संबंधित अधिकाऱ्यांनी प्रत्यक्ष मार्गदर्शन करून उपस्थितांच्या शंकांचे निरसन केले.
निवृत्तीवेतनधारकांना त्यांचे लाभ मिळवून देणे, पेन्शन प्रकरणे सादर करताना येणाऱ्या अडचणी दूर करणे आणि प्रलंबित प्रकरणांचा निपटारा करण्यासाठी आवश्यक प्रक्रिया समजावून सांगणे, हा या उपक्रमाचा प्रमुख उद्देश होता.
पेन्शनधारकांना जास्तीत जास्त लाभ मिळवून देण्यावर भर -
कार्यक्रमाचे प्रास्ताविक करताना जिल्हा कोषागार अधिकारी नितीन दानव यांनी पेन्शन अदालत आयोजित करण्यामागील भूमिका स्पष्ट केली. महालेखापाल कार्यालयाकडे पेन्शन प्रकरणे सादर करताना अनेकदा तांत्रिक व प्रशासकीय अडचणी उद्भवतात. त्यामुळे प्रकरणे प्रलंबित राहण्याची शक्यता असते. अशा अडचणी दूर करून निवृत्तीवेतनधारकांना जास्तीत जास्त लाभ मिळावा, यासाठी या उपक्रमाचे आयोजन करण्यात आल्याचे त्यांनी सांगितले.
आवश्यक कागदपत्रांबाबत सविस्तर मार्गदर्शन -
महालेखापाल कार्यालयातील वरिष्ठ लेखाधिकारी सारिका आनंदराव पाटील यांनी पेन्शन प्रकरणे सादर करताना घ्यावयाची काळजी, आवश्यक कागदपत्रांची पूर्तता आणि कागदपत्रांची अचूक जोडणी याबाबत सविस्तर मार्गदर्शन केले. पेन्शन प्रस्ताव तयार करताना संबंधित नियमांचे पालन करणे आणि आवश्यक कागदपत्रे योग्य पद्धतीने सादर करणे महत्त्वाचे असल्याचे त्यांनी स्पष्ट केले.
विशेषतः शिक्षण, वन आणि गृह विभागातील कर्मचाऱ्यांच्या पेन्शन प्रकरणांचा जलद गतीने निपटारा करण्यासाठी कोणत्या बाबींची पूर्तता आवश्यक आहे, यावरही कार्यशाळेत चर्चा करण्यात आली. यामुळे संबंधित विभागांच्या कर्मचाऱ्यांना पेन्शनविषयक प्रक्रियेची माहिती मिळण्यास मदत झाली.
राष्ट्रीय पेन्शन प्रणालीतील कर्मचाऱ्यांच्या वारसांसाठी मार्गदर्शन -
राष्ट्रीय पेन्शन प्रणाली (NPS) अंतर्गत समाविष्ट असलेल्या कर्मचाऱ्याचा मृत्यू झाल्यास त्यांच्या पात्र वारसांना कुटुंब निवृत्तीवेतन मिळवून देण्यासाठी आवश्यक प्रक्रिया आणि करावयाच्या कार्यवाहीबाबतही मार्गदर्शन करण्यात आले. अशा प्रकरणांमध्ये आवश्यक कागदपत्रांची पूर्तता आणि संबंधित कार्यालयांशी समन्वय साधण्याच्या दृष्टीने माहिती देण्यात आली.या मार्गदर्शनामुळे संबंधित कर्मचाऱ्यांच्या वारसांना कुटुंब निवृत्तीवेतनाचा लाभ मिळवून देण्याच्या प्रक्रियेबाबत स्पष्टता निर्माण होण्यास मदत झाली.
मान्यवरांची प्रमुख उपस्थिती -
या कार्यक्रमाला महालेखापाल कार्यालयाचे सहाय्यक लेखाधिकारी विनय गजभिये, वरिष्ठ लेखापाल बिमान नियोगी, अपर कोषागार अधिकारी मधुबाला फाले आणि उपकोषागार अधिकारी प्रशांत इंगळे यांची प्रमुख उपस्थिती होती.कार्यक्रमाचे संचालन प्रतीक निमजे यांनी केले, तर मंजुश्री बडबाईक यांनी आभार मानले. कार्यक्रमाच्या यशस्वी आयोजनासाठी कोषागार कार्यालयातील तिवारी, बोरकर, खंडाते आणि बोंद्रे यांनी परिश्रम घेतले.
या पेन्शन अदालत व मार्गदर्शन कार्यशाळेमुळे निवृत्तीवेतनधारक, शासकीय कर्मचारी आणि सेवानिवृत्तीवेतन संघटनेच्या पदाधिकाऱ्यांना त्यांच्या अडचणी थेट अधिकाऱ्यांसमोर मांडण्याची संधी मिळाली. तसेच पेन्शन प्रकरणे योग्य पद्धतीने सादर करणे, आवश्यक कागदपत्रांची पूर्तता करणे आणि प्रलंबित प्रकरणांच्या निपटाऱ्यासाठी करावयाच्या कार्यवाहीबाबत उपयुक्त मार्गदर्शन मिळाले.
