Petrol Price
सिंदेवाही प्रेस क्लब ची नवीन कार्यकारिणी घोषित - अध्यक्षपदी प्रशांत गेडाम यांची निवड
विदर्भ न्यूज एक्सप्रेस
तालुका प्रतिनिधी / सिंदेवाही : प्रेस क्लब सिंदेवाहीची नवीन कार्यकारिणी नुकतीच जाहीर करण्यात आली. यामध्ये अध्यक्षपदी प्रशांत गेडाम, उपाध्यक्षपदी संतोष नन्नावार तर सचिवपदी सुधाकर गजभिये यांची सर्वानुमते निवड करण्यात आली. तसेच सहसचिवपदी पठाण यांची, तर कोषाध्यक्षपदी अनिल एलकेवार यांची निवड करण्यात आली. कार्यकारिणी सदस्य म्हणून जितेंद्र बिलोरकर, शशिकांत बतकमवार, राकेश बोरकुंडवार, अमृत दंडवते आणि मंगेश पुट्टावार, कपिल मेश्राम यांचा समावेश करण्यात आला आहे.
नवीन कार्यकारिणीच्या माध्यमातून सिंदेवाही तालुक्यातील विविध सामाजिक, शैक्षणिक, कृषी, प्रशासकीय तसेच जनहिताच्या प्रश्नांना प्रभावीपणे वाचा फोडण्यासोबतच पत्रकारिता क्षेत्रातील बांधिलकी अधिक सक्षम करण्याचा निर्धार व्यक्त करण्यात आला. नवनिर्वाचित अध्यक्ष प्रशांत गेडाम हे तरुण भारतचे सिंदेवाही तालुका प्रतिनिधी असून, तालुक्यातील विविध घडामोडींना वृत्तपत्रीय माध्यमातून सातत्याने प्रसिद्धी देण्याचे कार्य ते करीत आहेत. विशेष म्हणजे, प्रेस क्लब सिंदेवाहीच्या नवनिर्वाचित कार्यकारिणीतील सर्व सदस्य हे दैनिक वृत्तपत्रांचे अधिकृत प्रतिनिधी असून, कार्यकारिणीत डिजिटल मीडिया प्रतिनिधीचा समावेश नाही.
त्यामुळे पारंपरिक वृत्तपत्रीय पत्रकारितेची व्यावसायिक ओळख आणि प्रतिष्ठा जपणारी ही कार्यकारिणी ठरली आहे. नवीन कार्यकारिणीचे पत्रकार, सामाजिक कार्यकर्ते तसेच विविध क्षेत्रातील मान्यवरांकडून अभिनंदन करण्यात येत असून, तालुक्यातील पत्रकारिता अधिक सक्षम, निर्भीड आणि लोकाभिमुख होण्यासाठी नव्या कार्यकारिणीकडून अपेक्षा व्यक्त होत आहेत.
