Petrol Price
महावितरणचा दणका : पाच महिन्यांत ५२९ वीजचोरीची प्रकरणे उघड
- ५६ लाख ७ हजार रुपयांच्या २.५२ लाख युनिट्स विजेचा बेकायदेशीर वापर उघडकीस; ऑगस्टमध्ये एकाच महिन्यात १६० कारवाया
विदर्भ न्यूज एक्सप्रेस
प्रतिनिधी / वर्धा : वीजचोरीला पूर्णपणे पायबंद घालण्यासोबतच प्रामाणिक वीजग्राहकांचे हित जपणे आणि महावितरणच्या महसुली सुरक्षेला बळकटी देण्याच्या उद्देशाने जिल्ह्यात विशेष वीजचोरीविरोधी मोहीम राबविण्यात आली. एप्रिल ते ऑगस्ट या पाच महिन्यांच्या कालावधीत ग्रामीण तसेच शहरी भागात राबविण्यात आलेल्या या मोहिमेत महावितरणच्या विशेष पथकांनी तब्बल ५२९ वीजचोरीची प्रकरणे उघडकीस आणली आहेत. या कारवाईत सुमारे ५६ लाख ७ हजार रुपयांच्या २.५२ लाख युनिट्स विजेचा बेकायदेशीर वापर झाल्याचे समोर आले आहे.
महावितरणच्या पथकांनी वीजचोरीच्या विविध प्रकारांवर लक्ष केंद्रित करत ही कारवाई केली. वीज वितरण प्रणालीच्या मुख्य वाहिन्यांवर थेट आकडे टाकून वीज घेणे, अनधिकृत केबलच्या माध्यमातून वीज वापरणे तसेच वीजमीटरमध्ये तांत्रिक छेडछाड करून वीज वापरणे, अशा विविध प्रकारच्या वीजचोऱ्या तपासणीदरम्यान उघडकीस आल्या.
ऑगस्टमध्ये कारवाईला वेग -
या मोहिमेचे विशेष वैशिष्ट्य म्हणजे सुरुवातीच्या चार महिन्यांच्या तुलनेत ऑगस्टमध्ये कारवाईची तीव्रता मोठ्या प्रमाणात वाढविण्यात आली. एप्रिल ते जुलै या चार महिन्यांत ३६९ वीजचोरीची प्रकरणे पकडण्यात आली होती. त्यानंतर ऑगस्ट महिन्यात महावितरणच्या पथकांनी मोहीम अधिक तीव्र करत एकाच महिन्यात तब्बल १६० वीजचोऱ्या उघडकीस आणल्या. यामुळे वीजचोरी करणाऱ्या ग्राहकांमध्ये खळबळ उडाली असून, वीजचोरीला आळा घालण्यासाठी महावितरणकडून भविष्यातही अशाच प्रकारच्या धडक कारवाया सुरू राहण्याची शक्यता आहे.
वर्धा विभागात सर्वाधिक कारवाया-
जिल्ह्यातील तीन विभागांमध्ये झालेल्या कारवाईत वर्धा विभाग आघाडीवर राहिला. विभागनिहाय उघडकीस आलेल्या वीजचोरीच्या प्रकरणांची संख्या पुढीलप्रमाणे आहे.
- वर्धा विभाग : २५३ प्रकरणे
- आर्वी विभाग : १५१ प्रकरणे
- हिंगणघाट विभाग : १३५ प्रकरणे
या तिन्ही विभागांमध्ये मिळून एकूण ५२९ वीजचोरीची प्रकरणे उघडकीस आली आहेत.
४१७ ग्राहकांकडून ४८ लाख ७ हजार रुपयांचा भरणा -
वीजचोरीविरोधी कारवाईदरम्यान पकडण्यात आलेल्या एकूण ५२९ ग्राहकांपैकी ४१७ ग्राहकांनी वीज बिल आणि दंडापोटी सुमारे ४८ लाख ७ हजार रुपयांचा भरणा महावितरणकडे केला आहे. त्यामुळे महावितरणच्या महसुलाला मोठा हातभार लागला आहे. तसेच, नियमानुसार पुढील कायदेशीर कारवाई आणि खटल्याची गुंतागुंत टाळण्यासाठी ३६७ ग्राहकांना तडजोड शुल्काचे देयक आकारण्यात आले आहे. संबंधित ग्राहकांना नियमानुसार आकारण्यात आलेली रक्कम भरण्याची प्रक्रिया करण्यात आली.
सहकार्य न करणाऱ्या सहा जणांवर गुन्हे -
दरम्यान, महावितरणच्या सूचनांकडे पूर्णपणे दुर्लक्ष करून कारवाईदरम्यान सहकार्य न करणाऱ्या ६ ग्राहकांविरुद्ध थेट पोलिस ठाण्यात गुन्हे दाखल करण्यात आले आहेत. त्यामुळे वीजचोरीच्या प्रकरणांमध्ये महावितरणकडून केवळ दंडात्मक वसुली न करता आवश्यकतेनुसार कायदेशीर कारवाईही केली जात असल्याचे स्पष्ट झाले आहे.
वीजचोरीमुळे प्रामाणिकपणे वीजबिल भरणाऱ्या ग्राहकांवर अप्रत्यक्ष आर्थिक भार पडतो. तसेच वीज वितरण व्यवस्थेतील तांत्रिक व महसुली नुकसान वाढते. त्यामुळे वीजचोरीला आळा घालण्यासाठी महावितरणने राबविलेली ही विशेष मोहीम महत्त्वाची ठरली आहे. आगामी काळातही वीजचोरीविरोधातील तपासणी आणि कारवाई अधिक प्रभावीपणे राबविण्याची भूमिका महावितरणने घेतली आहे.
