चिखली परिसरात जंगली हत्तींचा धुमाकूळ : धानाची रोवणी उद्ध्वस्त, शेतकऱ्यांचा नुकसान

- तुकूम चिखली, रीट, हलबी डोंगरगावातही हत्तींचा हैदोस; शेती साहित्याची तोडफोड, गावाजवळ वावर वाढल्याने ग्रामस्थांमध्ये दहशत

विदर्भ न्यूज एक्सप्रेस
तालुका प्रतिनिधी / देसाईगंज : तालुक्यातील चिखली, तुकूम चिखली, रीट आणि हलबी डोंगरगाव परिसरात शुक्रवारी जंगली हत्तींच्या कळपाने अक्षरशः धुमाकूळ घातला. हत्तींच्या कळपाने शेतांमध्ये घुसून नुकतीच करण्यात आलेली धानाची रोवणी तुडवत मोठ्या प्रमाणात नुकसान केले. त्याचबरोबर झटका मशीन, शेतातील घरे आणि अन्य शेती साहित्याचीही प्रचंड तोडफोड केल्याने शेतकऱ्यांचे मोठे आर्थिक नुकसान झाले आहे. या प्रकारामुळे शेतकरी आणि ग्रामस्थांमध्ये भीतीचे तीव्र वातावरण निर्माण झाले आहे.

मोठ्या कष्टाने, वेळ आणि पैसा खर्च करून शेतकऱ्यांनी धानाची रोवणी केली होती. मात्र, पीक उभे राहण्याआधीच हत्तींच्या कळपाने शेतात घुसून रोवणी तुडविल्याने शेतकऱ्यांच्या मेहनतीवर पाणी फिरले आहे. डोळ्यांसमोर उभे पीक उद्ध्वस्त होत असल्याचे पाहून अनेक शेतकरी हवालदिल झाले आहेत. हत्तींच्या वाढत्या उपद्रवामुळे शेती करायची कशी, असा प्रश्नही शेतकऱ्यांसमोर निर्माण झाला आहे.

गावाजवळ हत्तींचा वावर; ग्रामस्थांची झोप उडाली -
हत्तींचा कळप आता जंगल आणि शेतांपुरता मर्यादित न राहता थेट मानवी वस्तीकडे वळू लागला आहे. रात्रीच्या सुमारास हत्ती गावाजवळ पोहोचत असल्याने नागरिकांच्या सुरक्षिततेचा प्रश्न गंभीर बनला आहे. एखाद्या दिवशी हत्तींकडून थेट नागरिकांवर जीवघेणा हल्ला होण्याची शक्यताही नाकारता येत नाही.

हत्तींच्या भीतीने ग्रामस्थांची झोप उडाली असून, रात्रीच्या वेळी शेताकडे जाण्यास शेतकरी आणि मजूर धजावत नाहीत. गावाच्या आसपास हत्तींचा वावर असल्याने नागरिकांमध्ये सतत भीतीचे वातावरण आहे. त्यामुळे वनविभागाने तातडीने या हत्तींचा बंदोबस्त करून नागरिकांच्या जीविताचे संरक्षण करावे, अशी मागणी ग्रामस्थांकडून होत आहे.

दुबार रोवणीचे संकट; शेतकऱ्यांवर दुप्पट खर्चाचा भार -
शेतकऱ्यांचे नुकतेच धानाचे रोवणे झाले आहे. अशातच हत्तींच्या कळपाने शेतात घुसून रोवलेले धान तुडविल्याने अनेक शेतकऱ्यांसमोर दुबार रोवणीचे संकट उभे ठाकले आहे. पुन्हा रोवणी करण्यासाठी मजुरी, रोपे आणि अन्य शेती खर्च करावा लागणार असल्याने शेतकऱ्यांचा खर्च दुप्पट होणार आहे.

दुबार रोवणी केल्यानंतर धान पीक तयार होण्यासाठी पुन्हा जवळपास चार महिन्यांचा कालावधी लागणार आहे. या काळात पुन्हा हत्तींच्या कळपाने पिकांचे नुकसान केले, तर दुबार रोवणीसाठी केलेला खर्चही वाया जाण्याची शक्यता आहे. त्यामुळे आधीच वाढत्या शेती खर्चाने त्रस्त असलेल्या शेतकऱ्यांसमोर आर्थिक संकट आणखी गडद होण्याची भीती व्यक्त केली जात आहे.

पदाधिकाऱ्यांकडून नुकसानग्रस्त शेतांची पाहणी -
हत्तींच्या हल्ल्यात झालेल्या नुकसानीची प्रत्यक्ष पाहणी करण्यासाठी राष्ट्रवादी काँग्रेस पार्टी (अजित पवार)चे कार्यकारी जिल्हाध्यक्ष नंदू नरोटे, सभापती पिंकू बावणे, होमराज हरगुडे, नितू बुद्धे, पोलिस पाटील कुंदा नाकाडे, पोलिस पाटील दुचला पर्वते, तंटामुक्ती अध्यक्ष संतोष उईके, बाळासाहेब ठाकरे, अर्जुन ढोरे, मनोहर पर्वते, टीकाराम बुद्धे, सोमनाथ मेश्राम, दीपक मेश्राम आणि मंगेश मेश्राम यांनी प्रत्यक्ष शेतात जाऊन पाहणी केली.

यावेळी नुकसानग्रस्त शेतकऱ्यांशी संवाद साधून त्यांच्या समस्या आणि अडचणी जाणून घेण्यात आल्या. हत्तींच्या सततच्या उपद्रवामुळे शेतीचे मोठ्या प्रमाणात नुकसान होत असून, केवळ पंचनामे करून हा प्रश्न सुटणार नसल्याची भूमिका शेतकऱ्यांनी मांडली.

केवळ पंचनामे नको; कायमस्वरूपी उपाययोजना करा -
हत्तींच्या हल्ल्यामुळे वारंवार होणारे नुकसान लक्षात घेता केवळ कागदोपत्री पंचनामे करून शेतकऱ्यांचा प्रश्न सुटणार नाही. हत्तींच्या दहशतीतून शेतकरी आणि ग्रामस्थांची कायमस्वरूपी सुटका करण्यासाठी प्रशासन व वनविभागाने ठोस आणि प्रभावी उपाययोजना करणे गरजेचे आहे, अशी मागणी करण्यात आली.

हत्तींच्या हालचालींवर नियंत्रण ठेवण्यासाठी प्रभावी यंत्रणा उभारावी, मानवी वस्त्यांकडे हत्तींचा वावर रोखण्यासाठी आवश्यक उपाययोजना कराव्यात आणि शेतकऱ्यांच्या पिकांचे संरक्षण करण्यासाठी कायमस्वरूपी उपाय शोधावा, अशी मागणी शेतकऱ्यांनी केली आहे.

नुकसानग्रस्त शेतकऱ्यांना तातडीने आर्थिक मदत द्या -
हत्तींच्या हल्ल्यात नुकसान झालेल्या शेतकऱ्यांचे तातडीने पंचनामे करून प्रत्यक्ष नुकसानीच्या प्रमाणात आर्थिक मदत देण्यात यावी, अशी मागणी जोर धरत आहे. दुबार रोवणीचा अतिरिक्त खर्च लक्षात घेऊन शासनाने नुकसानग्रस्त शेतकऱ्यांना विशेष मदत द्यावी, अशीही अपेक्षा व्यक्त करण्यात आली आहे.

प्रशासनाने तातडीने या समस्येची दखल घेऊन शेतकऱ्यांना दिलासा दिला नाही, तर आंदोलन छेडण्याचा इशारा देण्यात आला आहे. त्यामुळे वनविभाग आणि प्रशासन हत्तींच्या वाढत्या उपद्रवावर कोणती ठोस उपाययोजना करणार, याकडे चिखलीसह परिसरातील शेतकरी आणि ग्रामस्थांचे लक्ष लागले आहे.

हत्तींच्या दहशतीत शेती करायची तरी कशी -
एकीकडे वाढता शेती खर्च, दुसरीकडे नैसर्गिक संकटे आणि त्यात आता जंगली हत्तींच्या कळपाचा वाढता उपद्रव, अशा तिहेरी संकटात शेतकरी सापडला आहे. कष्टाने केलेली धानाची रोवणी काही क्षणांत हत्तींच्या पायाखाली तुडविली जात असल्याने शेतकऱ्यांमध्ये असुरक्षिततेची भावना निर्माण झाली आहे. त्यामुळे केवळ नुकसानभरपाई न देता हत्तींच्या उपद्रवावर कायमस्वरूपी तोडगा काढण्याची मागणी आता अधिक तीव्र होत आहे.