Petrol Price
अंमली पदार्थाची अवैध वाहतूक करुन विक्री करण्याच्या तयारीत असलेल्या ०८ आरोपींना गडचिरोली पोलीसांनी घेतले ताब्यात
- आरोपींकडून ०१ कोटी २० लाख रुपये किंमतीच्या २४०.५ किलो ग्रॅम अंमली पदार्थासह एकूण १ कोटी ४६ लाख १० हजार रु किंमतीचा मुद्देमाल हस्तगत
- स्थानिक गुन्हे शाखा व पोमके गट्टा (फु) येथील पोलीस पथकाची संयुक्त कारवाई
विदर्भ न्यूज एक्सप्रेस
प्रतिनिधी / गडचिरोली : गडचिरोली जिल्ह्यात अंमली पदार्थांची अवैध वाहतूक आणि विक्री करणाऱ्यांविरुद्ध पोलिसांनी मोठी कारवाई केली आहे. अंमली पदार्थांची वाहतूक करून विक्री करण्याच्या तयारीत असलेल्या आठ जणांना पोलिसांनी ताब्यात घेतले असून, त्यांच्याकडून तब्बल २४०.५८० किलो ग्रॅम अंमली पदार्थ जप्त करण्यात आला आहे. जप्त करण्यात आलेल्या या अंमली पदार्थाची अंदाजित किंमत १ कोटी २० लाख २९ हजार रुपये आहे. याशिवाय तीन चारचाकी वाहने आणि आठ मोबाईल असा एकूण १ कोटी ४६ लाख १० हजार रुपये किमतीचा मुद्देमाल पोलिसांनी हस्तगत केला आहे. स्थानिक गुन्हे शाखा आणि पोलीस मदत केंद्र गट्टा (फु.) येथील पथकाने संयुक्तरीत्या ही कारवाई केली.
जिल्ह्यातील अवैध व्यवसाय आणि गुन्हेगारी कारवायांना आळा घालून सुरक्षित वातावरण निर्माण करण्यासाठी पोलीस अधीक्षक एम. रमेश यांनी जिल्हा पोलिसांना विशेष निर्देश दिले आहेत. अंमली पदार्थांची तस्करी, विक्री तसेच इतर अवैध व्यवसायांमध्ये सहभागी असणाऱ्यांविरुद्ध कठोर कारवाई करण्याचे आदेश सर्व पोलीस ठाणे, उपपोलीस ठाणे आणि पोलीस मदत केंद्रांच्या प्रभारी अधिकाऱ्यांना देण्यात आले आहेत. याच पार्श्वभूमीवर ३१ ऑक्टोबर २०२६ रोजी पेंढरी उपविभागांतर्गत (कॅम्प कारवाफा) येणाऱ्या गट्टा (फु.) पोलीस मदत केंद्राच्या हद्दीत ही कारवाई करण्यात आली.
नाकाबंदीत संशयास्पद स्कॉर्पिओ पोलिसांच्या जाळ्यात -
३१ ऑक्टोबर रोजी गट्टा (फु.) येथील पोलीस अधिकारी व कर्मचारी परिसरात नाकाबंदी करून संशयित वाहनांची तपासणी करीत होते. यावेळी पांढऱ्या रंगाची सीजी २६ के २१४९ क्रमांकाची स्कॉर्पिओ गाडी पोलिसांनी थांबवून तपासणी केली. वाहनात तीन व्यक्ती आढळून आल्या. पोलिसांनी त्यांची नावे आणि पत्ते विचारले असता त्यांनी समाधानकारक उत्तरे दिली नाहीत. ओळखपत्रांची तपासणी आणि चौकशीदरम्यान त्यांच्या उत्तरांमध्ये विसंगती आढळून आल्याने पोलिसांचा संशय बळावला.
त्यानंतर पोलिसांनी तिघांची सखोल चौकशी केली असता ते अंमली पदार्थांच्या अवैध वाहतुकीसाठी पायलटिंग करीत असल्याची माहिती समोर आली. त्यांच्या पाठीमागून आणखी तीन साथीदार पिकअप वाहनातून अंमली पदार्थ घेऊन येत असल्याचेही त्यांनी सांगितले. तसेच अंमली पदार्थ खरेदी करण्यासाठी बीड जिल्ह्यातील दोघे जण निळ्या रंगाच्या चारचाकी वाहनातून काही अंतरावर थांबले असल्याची माहिती पोलिसांना मिळाली.
छत्तीसगड ते बीडपर्यंतच्या आठ जणांना ताब्यात -
पोलिसांनी मिळालेल्या माहितीच्या आधारे संबंधित वाहनांची आणि व्यक्तींची तपासणी केली. या कारवाईत ताब्यात घेण्यात आलेल्या आठ जणांची नावे पुढीलप्रमाणे आहेत.
छत्तीसगड राज्यातील सुकमा जिल्ह्यातील सहा आरोपी :
१. अनिशकुमार पोंदी, रा. देवी चौक, पटनमपारा, जि. सुकमा.
२. हिमांशू नायक, रा. सुकमा.
३. परमब परिमलदास, रा. बागीचापारा, जि. सुकमा.
४. शंकर कोसा माडवी, रा. पुसमीपारा, ता. व जि. सुकमा.
५. भूपेश धनसुराम कोमरे, रा. बोळको, ता. कोंटा, जि. सुकमा.
६. सुनील रामनाथ मंडावी, रा. सुडीपारा, वार्ड क्र. १, ता. व जि. सुकमा.
महाराष्ट्रातील बीड जिल्ह्यातील दोन आरोपी :
७. अमोल बळीराम दोरगे, रा. पारोडी बोरोडी, ता. आष्टी, जि. बीड.
८. विशाल गोवर्धन दोरगे, रा. पारोडी बोरोडी, ता. आष्टी, जि. बीड.
या आठही संशयितांना पोलिसांनी ताब्यात घेऊन कसून चौकशी केली असता त्यांच्या ताब्यातून १२ चुंगळ्यांमध्ये भरलेला अंमली पदार्थ आढळून आला. त्यानंतर पोलिसांनी संपूर्ण मुद्देमाल जप्त करून आरोपींविरुद्ध कायदेशीर कारवाई सुरू केली.
१ कोटी ४६ लाखांचा मुद्देमाल जप्त -
या कारवाईत पोलिसांनी एकूण १ कोटी ४६ लाख १० हजार रुपये किमतीचा मुद्देमाल जप्त केला आहे. त्याचा तपशील पुढीलप्रमाणे आहे.
अंमली पदार्थ : २४०.५८० किलो ग्रॅम, अंदाजित किंमत १ कोटी २० लाख २९ हजार रुपये.
चारचाकी वाहन : सीजी ०४ एमजी ०७३०, अंदाजित किंमत ७ लाख रुपये.
पिकअप वाहन : सीजी २६ ई ५४७५, अंदाजित किंमत ८ लाख रुपये.
स्कॉर्पिओ वाहन : सीजी २६ के २१४९, अंदाजित किंमत १० लाख रुपये.
मोबाईल : आठ जुने वापरते मोबाईल, अंदाजित किंमत ८१ हजार रुपये.
अशा प्रकारे अंमली पदार्थांसह तीन वाहनांची आणि आठ मोबाईलची जप्ती करण्यात आली असून, या कारवाईमुळे अवैध अंमली पदार्थ वाहतुकीविरोधात पोलिसांनी महत्त्वाची कारवाई केली आहे.
एनडीपीएस कायद्यान्वये गुन्हा दाखल; तीन दिवसांची पोलीस कोठडी -
या प्रकरणी १ नोव्हेंबर २०२६ रोजी उपपोलीस ठाणे पेंढरी येथे अप. क्र. ६०/२०२६ अन्वये आठही आरोपींविरुद्ध गुन्हा दाखल करण्यात आला आहे. त्यांच्यावर अंमली पदार्थ व मनोव्यापारावर परिणाम करणारे पदार्थ अधिनियम (NDPS Act), १९८५ मधील कलम ८(क), २०(ब)(ii)(क) आणि २९ अन्वये कारवाई करण्यात आली आहे.
न्यायालयाने आठही आरोपींना तीन दिवसांची पोलीस कोठडी सुनावली आहे. या प्रकरणाचा पुढील तपास स्थानिक गुन्हे शाखेतील सहाय्यक पोलीस निरीक्षक कपिल आगलावे करीत आहेत. या अंमली पदार्थांच्या अवैध वाहतुकीमागील संपूर्ण साखळी, त्यांचे संभाव्य खरेदीदार आणि इतर संबंधित व्यक्तींच्या भूमिकेचा तपास केला जात आहे.
वरिष्ठ अधिकाऱ्यांच्या मार्गदर्शनाखाली संयुक्त कारवाई -
ही कारवाई पोलीस अधीक्षक एम. रमेश, अपर पोलीस अधीक्षक (अभियान) कार्तिक मधिरा आणि अपर पोलीस अधीक्षक गोकुल राज जी. यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक अरुण फेगडे यांच्या नेतृत्वात सहाय्यक पोलीस निरीक्षक कपिल आगलावे व त्यांच्या पथकाने तसेच गट्टा (फु.) पोलीस मदत केंद्राचे प्रभारी अधिकारी पोलीस उपनिरीक्षक दयानंद भोंबे आणि पोलीस अंमलदारांनी ही संयुक्त कारवाई यशस्वीरीत्या पार पाडली. गडचिरोली जिल्ह्यात अंमली पदार्थांची अवैध वाहतूक आणि विक्री रोखण्यासाठी पोलिसांकडून विशेष मोहीम राबविण्यात येत असून, या मोठ्या कारवाईमुळे अंमली पदार्थ तस्करीविरोधातील पोलिसांच्या प्रयत्नांना महत्त्वपूर्ण यश मिळाले आहे.
