अवैध दारू विक्री करणाऱ्या दोन कुख्यात आरोपींना दोन महिन्यांसाठी तडीपार


विदर्भ न्यूज एक्सप्रेस
प्रतिनिधी / चंद्रपूर : अवैध दारू विक्री तसेच मारहाणीच्या गुन्ह्यांमध्ये वारंवार सहभागी असलेल्या चिमूर येथील दोन कुख्यात दारू विक्रेत्यांविरुद्ध चिमूर पोलिसांनी कठोर कारवाई केली आहे. संजय तुकाराम भोयर ४८ वर्ष आणि संजय विनायक भैसारे ४५ वर्ष, दोघेही रा. चिमूर, यांना चंद्रपूर जिल्ह्यातून दोन महिन्यांसाठी हद्दपार करण्याचे आदेश उपविभागीय दंडाधिकारी किशोर घाटगे यांनी जारी केले आहेत.
दोन्ही आरोपींविरुद्ध चिमूर पोलीस ठाण्यात अवैध दारू विक्री तसेच मारहाणीचे गुन्हे दाखल होते. त्यांच्या गुन्हेगारी प्रवृत्तीमुळे सार्वजनिक शांतता व सुव्यवस्थेला धोका निर्माण होण्याची शक्यता असल्याने त्यांच्याविरुद्ध हद्दपारीचा प्रस्ताव चिमूर पोलिसांनी उपविभागीय दंडाधिकारी यांच्याकडे सादर केला होता.
प्रस्तावाची पडताळणी केल्यानंतर दोन्ही आरोपी हे गुन्हेगारी प्रवृत्तीचे असून वारंवार गुन्हे करण्याची सवय असल्याचे निष्पन्न झाले. त्यानंतर उपविभागीय दंडाधिकारी किशोर घाटगे यांनी दोघांनाही दोन महिन्यांसाठी संपूर्ण चंद्रपूर जिल्ह्यातून हद्दपार करण्याचे आदेश दिले.
या कारवाईमुळे अवैध धंदे करणाऱ्या व्यक्तींमध्ये दहशतीचे वातावरण निर्माण झाले असून, पोलिसांच्या कारवाईचे नागरिकांकडून कौतुक होत आहे. ही कारवाई पोलीस अधीक्षक आयुष नौपानी, अपर पोलीस अधीक्षक ईश्वर कातकडे आणि उपविभागीय पोलीस अधिकारी दिनकर ठोसरे यांच्या मार्गदर्शनाखाली चिमूरचे पोलीस निरीक्षक दिनेश लबडे व डीबी पथकाने केली.




Petrol Price




