Petrol Price
राज्यस्तरीय टेबल टेनिस स्पर्धेत जनचेतना विद्यालयाची सुवर्ण भरारी!
- दोन सुवर्ण, दोन रजत आणि दोन कांस्य पदकांची कमाई; सहा विद्यार्थ्यांची दमदार कामगिरी
विदर्भ न्यूज एक्सप्रेस
प्रतिनिधी / भंडारा : मुंबईतील गोरेगाव येथे १७ ऑक्टोबर २०२६ रोजी आयोजित १७ व्या महाराष्ट्र राज्यस्तरीय टेबल टेनिस स्पर्धेत परिवर्तन शिक्षण संस्था, वासेळा संचालित जनचेतना मतिमंद निवासी विद्यालयाच्या विद्यार्थ्यांनी नेत्रदीपक कामगिरी केली. विद्यालयाच्या सहा विद्यार्थ्यांनी दोन सुवर्ण, दोन रजत आणि दोन कांस्य अशी एकूण सहा पदके पटकावत भंडारा जिल्ह्याच्या शिरपेचात मानाचा तुरा रोवला
विद्यार्थ्यांच्या या यशामुळे विद्यालयासह जिल्ह्याच्या क्रीडा क्षेत्रात आनंदाचे वातावरण निर्माण झाले आहे. या राज्यस्तरीय स्पर्धेसाठी विद्यालयातील सहा विद्यार्थ्यांची निवड झाली होती. राज्यातील विविध भागांतून सहभागी झालेल्या खेळाडूंशी चुरशीची लढत देत या विद्यार्थ्यांनी आपल्या कौशल्याचे, जिद्दीचे आणि मेहनतीचे प्रभावी दर्शन घडविले. प्रत्येक विद्यार्थ्याने उत्कृष्ट खेळाचे प्रदर्शन करत पदकांची कमाई केली.
पदकविजेत्या विद्यार्थ्यांची नावे पुढीलप्रमाणे : सुवर्णपदक विजेते : लक्ष्मी रामा शिंदे आणि खुशबू रविकुमार हातझाडे, रजतपदक विजेते : शिप्रा मदन रामटेके आणि यश बिहारीलाल पटले. कांस्यपदक विजेते : भूपेंद्र चेतन भगत आणि अमरदीप भोजराम रहपाडे. सहा विद्यार्थ्यांनी मिळविलेल्या या यशामुळे जनचेतना मतिमंद निवासी विद्यालयाच्या शैक्षणिक व क्रीडा क्षेत्रातील कार्याला नवी ओळख मिळाली आहे.
विद्यार्थ्यांच्या या उल्लेखनीय कामगिरीचे सर्व स्तरांतून कौतुक होत असून, त्यांच्या यशामुळे इतर विद्यार्थ्यांनाही क्रीडा क्षेत्रात पुढे जाण्यास प्रेरणा मिळणार आहे. राज्यस्तरीय स्पर्धेत सहा पदकांची कमाई करून भंडारा जिल्ह्याचा नावलौकिक वाढविणाऱ्या या विद्यार्थ्यांचे सर्वत्र अभिनंदन होत आहे.
