Petrol Price
गांधी तलावात बुडून ३६ वर्षीय गोपाल रुयारकर यांचा मृत्यू
- मासे पकडण्यासाठी गेले असताना दुर्घटना; शोधमोहीमेदरम्यान आढळला मृतदेह
विदर्भ न्यूज एक्सप्रेस
तालुका प्रतिनिधी / वरोरा : वरोरा येथील गांधी तलावात मासे पकडण्यासाठी गेलेल्या गोपाल रुयारकर ३६वर्ष, रा. कॉलरी वॉर्ड, नवीन वस्ती, वरोरा यांचा पाण्यात बुडून मृत्यू झाल्याची घटना रविवारी उघडकीस आली. या घटनेमुळे त्यांच्या कुटुंबीयांवर दुःखाचा डोंगर कोसळला असून, परिसरात हळहळ व्यक्त केली जात आहे.
मिळालेल्या माहितीनुसार, गोपाल रुयारकर हे मासे पकडण्यासाठी गांधी तलावावर गेले होते. मात्र, बराच वेळ उलटूनही ते घरी परतले नाहीत. त्यामुळे कुटुंबीय चिंतेत पडले आणि त्यांनी त्यांचा शोध सुरू केला. नातेवाईक व स्थानिक नागरिकांनी तलाव परिसरात शोध घेतला.
दरम्यान, नागरिक आणि पोलिसांच्या मदतीने तलावात शोधमोहीम राबविण्यात आली. या शोधमोहीमेदरम्यान गोपाल रुयारकर यांचा मृतदेह पाण्यात आढळून आला. त्यानंतर पोलिसांनी मृतदेह पाण्याबाहेर काढून उत्तरीय तपासणीसाठी रुग्णालयात पाठविला.
मृत्यूचे नेमके कारण अद्याप अस्पष्ट -
गोपाल रुयारकर यांचा मृत्यू नेमक्या कोणत्या परिस्थितीत झाला, हे अद्याप स्पष्ट झालेले नाही. उत्तरीय तपासणीचा अहवाल आणि पोलिसांच्या पुढील तपासानंतर मृत्यूचे कारण स्पष्ट होण्याची शक्यता आहे. या प्रकरणी वरोरा पोलीस पुढील तपास करीत आहेत. गोपाल रुयारकर यांच्या आकस्मिक मृत्यूमुळे त्यांच्या कुटुंबीयांना मोठा धक्का बसला असून, कॉलरी वॉर्ड परिसरात शोक व्यक्त केला जात आहे.
