महत्वाच्या बातम्या

 भाऊबीजेच्या आनंदावर चोरट्यांचे सावट : बंद घर फोडून ६८ हजारांचा ऐवज लंपास


विदर्भ न्यूज एक्सप्रेस 
प्रतिनिधी / चंद्रपूर : भाऊबीजेचा सण साजरा करण्यासाठी कुटुंबासह बाहेरगावी गेलेल्या डब्ल्यूसीएल कर्मचाऱ्याच्या बंद घराला चोरट्यांनी लक्ष्य केले. घराचे कुलूप तोडून आत प्रवेश केलेल्या अज्ञात चोरट्यांनी सोन्या-चांदीचे दागिने आणि रोख रकमेसह ६८ हजार ८०० रुपयांचा ऐवज लंपास केला. १४ नोव्हेंबर रोजी सकाळी ही घटना उघडकीस आली.

प्रफुल उत्तम कारेकर ३८ वर्षे रा. डब्ल्यूसीएल डीआरसी क्रमांक ५ कॉलनी, क्वार्टर क्रमांक एम-४७, चव्हाण कॉलनीजवळ, शिवमंदिर परिसर, चंद्रपूर हे डब्ल्यूसीएलच्या डीआरसी क्रमांक ४ येथे लिपिक पदावर कार्यरत आहेत. १२ नोव्हेंबर रोजी दुपारी ते कुटुंबासह भाऊबीज साजरी करण्यासाठी भद्रावती येथे गेले होते. १४ नोव्हेंबर रोजी सकाळी सात वाजताच्या सुमारास ड्युटीसाठी ते चंद्रपूर येथील आपल्या क्वार्टरवर परतले. यावेळी घराच्या मुख्य दरवाजाचे लोखंडी कुलूप गायब असल्याचे आणि दरवाजाची कडी वाकविल्याचे त्यांच्या निदर्शनास आले.

घरात प्रवेश केला असता हॉलमधील साहित्य अस्ताव्यस्त पडलेले दिसले. बेडरूममधील दिवाणातील सामानही खाली फेकलेले होते. लोखंडी कपाटाचे लॉकर तोडून त्यातील साहित्य जमिनीवर विखुरलेले होते. चोरट्यांनी कपाटातील सोन्याचे दोन जोड कानातले, सोन्याची अंगठी, सोन्याचे मणी असलेल्या दोन मनगट्या, सोन्याचा कॉइन, सोन्याची नथ, चांदीचे वाळे, चांदीचा गोफ, चांदीची चाळ आणि १२ हजार रुपये रोख असा एकूण ६८ हजार ८०० रुपयांचा ऐवज चोरून नेला.

 याप्रकरणी प्रफुल कारेकर यांनी रामनगर पोलीस ठाण्यात तक्रार दाखल केली असून अज्ञात चोरट्याविरुद्ध गुन्हा नोंदविण्यात आला आहे. ठाणेदार प्रभावती एकुरके यांच्या मार्गदर्शनाखाली पोलीस हवालदार आनंद खरात पुढील तपास करीत आहेत.





  Print






Related Photos