Petrol Price
सहकार क्षेत्राच्या विकासासाठी सभासदांनी सक्रिय सहभाग घ्यावा - इंजि. प्रमोदजी पिपरे
- श्री संताजी नागरी सहकारी पतसंस्थेची दुसरी वार्षिक सर्वसाधारण सभा उत्साहात संपन्न
विदर्भ न्यूज एक्सप्रेस
प्रतिनिधी / गडचिरोली : सहकारी संस्थांच्या माध्यमातून सर्वसामान्य नागरिकांना आर्थिकदृष्ट्या सक्षम करण्यासाठी पतसंस्थांची भूमिका अत्यंत महत्त्वाची आहे. संस्थेच्या प्रगतीसाठी सभासदांचा सक्रिय सहभाग, आर्थिक शिस्त आणि पारदर्शक कारभार आवश्यक असून, सभासदांचा विश्वास कायम ठेवत पतसंस्थेने विकासाच्या दिशेने वाटचाल करावी. तसेच सहकार क्षेत्राच्या माध्यमातून उद्योग सहकारी संस्था उभारून नवउद्योजक निर्माण करण्यासाठी प्रयत्न झाले पाहिजेत, असे प्रतिपादन महाराष्ट्र राज्य सहकारी संघ मर्या, पुणेचे संचालक तथा गडचिरोली नगरपरिषदेचे माजी सभापती इंजि. प्रमोदजी पिपरे यांनी केले.
श्री संताजी नागरी सहकारी पतसंस्था मर्या, गडचिरोलीची सन २०२५ - २६ ची दुसरी वार्षिक सर्वसाधारण सभा रविवार, २० सप्टेंबर रोजी दुपारी १२ वाजता श्री संताजी स्मृती प्रतिष्ठान, आरमोरी रोड, गडचिरोली येथे उत्साहात पार पडली. या सभेच्या उद्घाटनप्रसंगी इंजि. प्रमोदजी पिपरे मार्गदर्शन करत होते.
कार्यक्रमाची सुरुवात श्री संत संताजी जगनाळे महाराज यांच्या प्रतिमेला पुष्पहार अर्पण करून व दीपप्रज्वलनाने करण्यात आली. यावेळी उपस्थित सभासदांना मार्गदर्शन करताना इंजि. प्रमोदजी पिपरे यांनी सहकार क्षेत्राचे महत्त्व स्पष्ट केले. सहकारी संस्थांचा कारभार हा सभासदांच्या सहभागावर आणि विश्वासावर आधारित असतो. त्यामुळे संस्थेच्या विकासासाठी प्रत्येक सभासदाने सक्रियपणे सहभागी होणे गरजेचे असल्याचे त्यांनी सांगितले.
पतसंस्थांच्या माध्यमातून नागरिकांच्या आर्थिक गरजा पूर्ण करण्याबरोबरच बचत, कर्जव्यवस्था आणि आर्थिक नियोजनाला चालना मिळते. सर्वसामान्य नागरिकांना आर्थिकदृष्ट्या सक्षम करण्यामध्ये पतसंस्थांचे योगदान महत्त्वाचे असल्याचे सांगून संस्थेने आर्थिक शिस्त आणि पारदर्शकता कायम ठेवावी, असेही त्यांनी नमूद केले.
सहकार क्षेत्राचा विस्तार केवळ पतसंस्थांपुरता मर्यादित न ठेवता उद्योग सहकारी संस्थांच्या माध्यमातून स्थानिक पातळीवर उद्योजक निर्माण करण्यासाठी प्रयत्न करणे आवश्यक आहे, असे मतही इंजि. पिपरे यांनी व्यक्त केले. सहकाराच्या माध्यमातून रोजगारनिर्मिती व आर्थिक विकासाला चालना मिळू शकते, याकडे त्यांनी उपस्थितांचे लक्ष वेधले.
या कार्यक्रमाच्या अध्यक्षस्थानी नगराध्यक्ष प्रणोतीताई निंबोरकर होत्या. प्रमुख अतिथी म्हणून संताजी प्रतिष्ठान, गडचिरोलीचे सचिव सुरेशजी भांडेकर, संताजी नागरी सहकारी पतसंस्थेचे अध्यक्षभय्याजी सोमणकर, उपाध्यक्ष राजेंद्र भुरसे, संचालक विजय भांडेकर, संचालक गजानन बारसागडे, प्रवर्तक रघुनाथजी भांडेकर, रमेश बोधलकर यांच्यासह पतसंस्थेचे पदाधिकारी, संचालक मंडळाचे सदस्य, सभासद व कर्मचारी मोठ्या संख्येने उपस्थित होते.
मान्यवरांचा व गुणवंतांचा सत्कार -
यावेळी श्री संताजी नागरी सहकारी पतसंस्था मर्या., गडचिरोलीच्या संचालक मंडळाच्या वतीने इंजि. प्रमोदजी पिपरे यांचा पुष्पगुच्छ व सन्मानचिन्ह देऊन सत्कार करण्यात आला. तसेच पतसंस्थेला आर्थिक स्वरूपात सहकार्य करणाऱ्या देणगीदारांचा आणि पतसंस्थेत उत्कृष्ट कार्य करणाऱ्या प्रतिनिधींचाही उपस्थित मान्यवरांच्या हस्ते पुष्पगुच्छ व श्री संताजी महाराजांचे स्मृतिचिन्ह देऊन सत्कार करण्यात आला. या सत्कारामुळे संबंधितांचा उत्साह वाढला.
वार्षिक सर्वसाधारण सभेत सभासद, संचालक मंडळ आणि पदाधिकाऱ्यांनी संस्थेच्या कामकाजात सहभाग नोंदवित सहकार क्षेत्राच्या विकासासाठी परस्पर सहकार्य करण्याचा संदेश दिला. सभेच्या निमित्ताने पतसंस्थेच्या कार्याबाबत सभासदांमध्ये उत्साहाचे वातावरण पाहायला मिळाले. कार्यक्रमाचे सूत्रसंचालन संचालिका शिलाताई सोमणकर यांनी केले, तर उपाध्यक्ष राजेंद्रजी भुरसे यांनी उपस्थितांचे आभार मानले.
