महत्वाच्या बातम्या

 मुख्याध्यापकांच्या तक्रारीनंतर १४ वर्षीय विद्यार्थिनीची गळफास घेऊन आत्महत्या : चंद्रपुरात खळबळ


विदर्भ न्यूज एक्सप्रेस 
प्रतिनिधी / चंद्रपूर : शाळेच्या भिंतीवर मजकूर लिहिल्याच्या कारणावरून मुख्याध्यापकांनी पालकांकडे तक्रार केल्यानंतर अवघ्या १४ वर्षीय विद्यार्थिनीने गळफास घेऊन आत्महत्या केल्याची धक्कादायक घटना २२ ऑगस्ट रोजी चंद्रपूर शहरात घडली. या घटनेमुळे शहरात खळबळ उडाली असून, परिसरात हळहळ व्यक्त होत आहे.

कु. तनिष्का गाडगे १४ वर्षे ही चंद्रपूर शहरातील एका नामांकित शाळेत इयत्ता नववीत शिक्षण घेत होती. शाळेच्या भिंतीवर तिने काही मजकूर लिहिल्याचे मुख्याध्यापकांच्या निदर्शनास आले होते. त्यानंतर मुख्याध्यापकांनी तिच्या पालकांकडे या प्रकाराची तक्रार केली. यानंतर आई-वडिलांनी शाळेत जाऊन मुख्याध्यापकांची भेट घेतली. संबंधित विषयावर चर्चा झाल्यानंतर पालक मुलीसह घरी परतले.

त्यानंतर काही वेळाने तिचे आई-वडील कामानिमित्त न्यायालयात गेले असताना विद्यार्थिनी घरीच होती. पालक घराबाहेर गेल्यानंतर तिने गळफास घेऊन आत्महत्या केल्याचे समोर आले. हा प्रकार कुटुंबीयांच्या लक्षात येताच त्यांनी तिला तातडीने रुग्णालयात दाखल केले. मात्र, डॉक्टरांनी तपासणीनंतर तिला मृत घोषित केले.

घटनेची माहिती मिळताच रामनगर पोलिसांनी घटनास्थळी धाव घेतली. पोलिसांनी या प्रकरणी आकस्मिक मृत्यूची नोंद केली असून, आत्महत्येमागील नेमके कारण शोधण्यासाठी तपास सुरू केला आहे. शाळेतील घडलेला प्रकार, मुख्याध्यापकांची तक्रार, पालकांची शाळेतील भेट तसेच त्यानंतरची परिस्थिती या सर्व बाबींची पोलिसांकडून चौकशी करण्यात येत आहे.





  Print






Related Photos