जीवन प्रमाणपत्र अपडेटच्या नावाखाली सेवानिवृत्त बँक अधिकाऱ्याची १०.६४ लाखांची फसवणूक


विदर्भ न्यूज एक्सप्रेस
प्रतिनिधी / चंद्रपूर : पेन्शन सुरू ठेवण्यासाठी जीवन प्रमाणपत्र अपडेट करण्याच्या बहाण्याने सायबर भामट्यांनी एका ६८ वर्षीय सेवानिवृत्त बँक अधिकाऱ्याची १० लाख ६४ हजार रुपयांनी फसवणूक केल्याची घटना १७ नोव्हेंबर रोजी ब्रह्मपुरी येथे घडली. कारू मारोती भुलाईवाले ६८ वर्ष , रा. गजानन नगर, गीत पेट्रोलपंपामागे, ब्रह्मपुरी असे फसवणूक झालेल्या व्यक्तीचे नाव आहे. कारू भुलाईवाले हे २०२१ मध्ये बँक ऑफ इंडियामधून सेवानिवृत्त झाले आहेत. दरवर्षी ते पेन्शन सुरू राहण्यासाठी जीवन प्रमाणपत्र अपडेट करतात. यावर्षी प्रमाणपत्र अपडेट करायचे राहिल्याने १७ नोव्हेंबर रोजी सकाळी ९ वाजताच्या सुमारास इन्स्टाग्रामवर बँक ऑफ इंडिया लाइफ सर्टिफिकेट अपडेट असा लोगो असलेली लिंक त्यांच्या निदर्शनास आली. त्यावर दिलेल्या मोबाईल क्रमांकावर त्यांनी संपर्क साधला असता, संबंधित व्यक्तीने व्हॉट्सॲपवर जीवन प्रमाणपत्र अपडेट करण्यासाठी एक फाइल पाठविली.
भुलाईवाले यांनी ती फाइल उघडताच ऑनलाइन फॉर्म दिसला. त्यात त्यांनी आपल्या पेन्शन खात्याचा क्रमांक, एटीएम कार्ड क्रमांक आणि एटीएम पिनची माहिती भरली. त्यानंतर प्रमाणपत्र अपडेट होण्यासाठी काही तास लागतील, असे सांगण्यात आले. काही वेळाने संबंधित क्रमांकावरून व्हॉट्सॲप कॉल करून प्रक्रिया पूर्ण होण्यास आणखी वेळ लागेल, असे सांगण्यात आले. दरम्यान, त्यांच्या मोबाईलवर ओटीपीचे संदेश आले. मात्र, तोपर्यंत सायबर भामट्यांनी त्यांच्या बँक खात्याची माहिती मिळवून खात्यातील रक्कम परस्पर काढण्यास सुरुवात केली होती.
दुपारी २.३३ ते ३.१२ वाजेदरम्यान त्यांच्या दोन बँक खात्यांतून वेगवेगळ्या व्यवहारांद्वारे एकूण १० लाख ६४ हजार रुपये काढून घेण्यात आले. खात्यातून मोठी रक्कम गायब झाल्याचे लक्षात येताच त्यांनी तातडीने बँक ऑफ इंडियाच्या शाखेत जाऊन आपली खाती गोठविली. तसेच बँक स्टेटमेंट प्राप्त करून सायबर गुन्हे पोर्टलवर तीन स्वतंत्र तक्रारी नोंदविल्या. याप्रकरणी १८ नोव्हेंबर रोजी सायबर पोलीस ठाणे, चंद्रपूर येथे अज्ञात आरोपीविरुद्ध तक्रार दाखल करण्यात आली असून पुढील तपास सायबर सेल विभागाचे पोलीस निरीक्षक सुनील गाडे करीत आहेत.




Petrol Price




