महत्वाच्या बातम्या

 वडिलोपार्जित जमिनीच्या संमतीपत्रावर बहिणींच्या बनावट सह्या : सख्ख्या भावाविरुद्ध ब्रम्हपुरीत गुन्हा दाखल


विदर्भ न्यूज एक्सप्रेस 
प्रतिनिधी / चंद्रपूर : वडिलोपार्जित जमिनीच्या प्रकरणात चारही बहिणींच्या बनावट सह्या करून खोटे संमतीपत्र तयार केल्याचा गंभीर प्रकार ब्रम्हपुरी येथे उघडकीस आला आहे. या प्रकरणी सख्खा भाऊ राहुल नारायण शेटीये याच्याविरुद्ध ब्रम्हपुरी पोलिसांनी गुन्हा नोंदविला आहे. या घटनेमुळे परिसरात खळबळ उडाली आहे.

सिंदेवाही येथील संगीता संतोष सागरे ४८ वर्षे यांच्या वडिलांच्या नावे ब्रम्हपुरी येथील फवारा चौकात शिट क्रमांक १२, नगर भूमापन क्रमांक १३५६, नगर परिषद मालमत्ता क्रमांक ११९७/६ अ मधील ३६८.९८ चौरस मीटर क्षेत्रफळाची वडिलोपार्जित जमीन आहे. वडील नारायणसाव गणेशसाव शेटीये यांच्या निधनानंतर २००३ मध्ये आई दुर्गाबाई आणि सहा भावंडांच्या नावे वारसाहक्काने जमिनीची नोंद करण्यात आली होती. त्यामुळे या जमिनीवर सर्व भावंडांचा समान हक्क आहे.

दरम्यान, २४ मे २०२६ रोजी ब्रम्हपुरी नगर परिषद कार्यालयातून संबंधित जमिनीबाबत संमतीपत्र प्राप्त झाल्याची माहिती देत कुटुंबीयांना कार्यालयात उपस्थित राहण्यास सांगण्यात आले. त्यानुसार पाचही बहिणी नगर परिषद कार्यालयात गेल्या असता, त्यांचा भाऊ राहुल शेटीये याने त्यांच्या परवानगीशिवाय संमतीपत्र तयार केल्याचे समोर आले. या संमतीपत्रावर चारही बहिणींच्या बनावट सह्या करून १०० रुपयांच्या स्टॅम्प पेपरवर नोटरी वकील प्रविण एस. चिंतावार यांच्याकडून नोटरी करून घेतले.

आपल्या सह्या नसताना खोट्या सह्या करून बनावट दस्तऐवज तयार करण्यात आल्याचे लक्षात येताच संगीता सागरे यांनी ब्रम्हपुरी पोलीस ठाण्यात तक्रार दाखल केली. या तक्रारीच्या आधारे ब्रम्हपुरी पोलिसांनी आरोपी राहुल नारायण शेटीये याच्याविरुद्ध गुन्हा नोंदविला आहे. या प्रकरणाचा पुढील तपास पोलीस निरीक्षक कांचन पांडे यांच्या मार्गदर्शनाखाली पोलीस उपनिरीक्षक प्रीतमकुमार येरमे करीत आहेत.





  Print






Related Photos