Petrol Price
देवळीत कापूस खरेदीचा श्रीगणेशा : पहिल्याच दिवशी ९०० क्विंटल कापसाची खरेदी
- दोन जिनिंगमध्ये हंगामाला सुरुवात; प्रतिक्विंटल ९,५०१ ते ९,५५१ रुपयांपर्यंत भाव
विदर्भ न्यूज एक्सप्रेस
प्रतिनिधी / वर्धा : देवळी शहरासह शिरपूर येथील जिनिंगमध्ये कापूस खरेदीचा शुभारंभ उत्साहात करण्यात आला. खरेदीच्या पहिल्याच दिवशी दोन्ही जिनिंगमध्ये मिळून एकूण ९०० क्विंटल कापसाची खरेदी करण्यात आली. यावेळी कापूस उत्पादक शेतकऱ्यांना प्रतिक्विंटल ९ हजार ५०१ ते ९ हजार ५५१ रुपयांपर्यंत भाव मिळाला. त्यामुळे परिसरातील कापूस खरेदी हंगामाला सुरुवात झाली असून शेतकऱ्यांमध्ये उत्साहाचे वातावरण आहे.
जय बजरंग जिनिंगमध्ये ६०० क्विंटल कापसाची खरेदी -
देवळी येथील जय बजरंग जिनिंगमध्ये संचालक मानक सुराणा, सुंदरलाल सुराणा आणि अमित सुराणा यांच्या हस्ते कापूस खरेदीचा शुभारंभ करण्यात आला. यावेळी कृषी उत्पन्न बाजार समितीचे माजी सभापती मनोहर खडसे, संचालक अरुण लाहूरे, मनीष खडसे आणि हरीश ओझा प्रमुख पाहुणे म्हणून उपस्थित होते.
खरेदीच्या मुहूर्तावर शेतकऱ्यांना प्रतिक्विंटल ९ हजार ५१३ रुपये भाव देण्यात आला. पहिल्याच दिवशी या जिनिंगमध्ये ६०० क्विंटल कापसाची खरेदी करण्यात आली. यावेळी मोहन तेलरांधे, प्रवीण तेलरांधे, आदित्य कामडी, दीपक कामडी आणि आनंद कदम या कापूस उत्पादक शेतकऱ्यांचा सत्कार करण्यात आला.
भवानी जिनिंगमध्ये ३०० क्विंटल कापसाची खरेदी -
शिरपूर येथील भवानी जिनिंगमध्येही कापूस खरेदीला सुरुवात झाली. पुलगाव कृषी उत्पन्न बाजार समितीचे सभापती मनोज वसू यांच्या हस्ते कापूस खरेदीचा शुभारंभ करण्यात आला. जिनिंगचे संचालक मयंक चौधरी आणि अमन चौधरी यांची यावेळी उपस्थिती होती.
या जिनिंगमध्ये खरेदीच्या मुहूर्तावर प्रतिक्विंटल ९ हजार ५०१ ते ९ हजार ५५१ रुपये दराने कापूस खरेदी करण्यात आला. पहिल्याच दिवशी येथे ३०० क्विंटल कापसाची खरेदी झाली. अशा प्रकारे देवळी आणि शिरपूर येथील दोन्ही जिनिंगमध्ये मिळून ९०० क्विंटल कापसाची खरेदी नोंदविण्यात आली.
सभापती मनोज वसू यांच्या हस्ते शेतकऱ्यांचा सत्कार -
भवानी जिनिंगमधील कार्यक्रमात सभापती मनोज वसू यांच्या हस्ते जगन खोडे, गोपाल बुटले, धीरज धवडे, वैभव मलकापुरे आणि मयंक चौधरी यांचा सत्कार करण्यात आला.या कार्यक्रमाला व्यापारी विनोद घिया, प्रमोद ठाकरे, पप्पू टावरी, गौरव उमरे, अयुब पटेल, विवेक कांकरिया, बबलू कांकरिया, जब्बार तंवर, सुनील बासू, नाना तांडेकर, मनीष अग्रवाल, हरीश कुंडलवाल, श्रीवल्लभ जावंधिया, मोतीलाल जैन, नरहरी कामडी, विनायक भोयर, पराग वैद्य, स्वप्नील ठाकरे, सतीश चौधरी, आशिष खडसे आणि अनिल ओझा यांच्यासह व्यापारी व कापूस उत्पादक शेतकरी उपस्थित होते.
कापूस खरेदी हंगामाला सुरुवात -
देवळी आणि शिरपूर येथील जिनिंगमध्ये कापूस खरेदी सुरू झाल्याने परिसरातील शेतकऱ्यांना कापूस विक्रीसाठी स्थानिक सुविधा उपलब्ध झाली आहे. पहिल्याच दिवशी झालेली ९०० क्विंटल कापसाची खरेदी हंगामाच्या सुरुवातीची नोंद ठरली. आगामी काळात कापसाची आवक आणि मिळणाऱ्या दरांकडे कापूस उत्पादक शेतकऱ्यांचे लक्ष राहणार आहे.
