Petrol Price
नवीन कोराडीत भरधाव चारचाकीची वृद्धाला धडक : उपचारादरम्यान मृत्यू
- कोराडी देवीच्या दर्शनावरून परतताना अपघात; धडक देऊन चालक पसार, पोलिसांत गुन्हा दाखल
विदर्भ न्यूज एक्सप्रेस
प्रतिनिधी / नागपूर : नवीन कोराडी परिसरात रस्ता ओलांडण्यासाठी उभ्या असलेल्या ६२ वर्षीय वृद्धाला भरधाव चारचाकी वाहनाने जोरदार धडक दिली. या अपघातात गंभीर जखमी झालेल्या वृद्धाचा उपचारादरम्यान मृत्यू झाला. अपघातानंतर वाहनचालक घटनास्थळावरून पसार झाला. या प्रकरणी कोराडी पोलिसांनी संबंधित वाहनचालकाविरुद्ध गुन्हा दाखल केला आहे. प्रभाकर सोनू भोईटे ६२ वर्षे रा. बेटावद बुद्रुक, ता. जामनेर, जि. जळगाव असे मृत वृद्धाचे नाव आहे.
मंदिरातून परतताना काळाचा घाला -
पोलिसांनी दिलेल्या माहितीनुसार, प्रभाकर भोईटे हे सध्या नवीन कोराडी येथील महादुला परिसरात, किंग्स हॉटेलजवळ असलेल्या आपल्या मुलीच्या घरी राहत होते. रविवार, १८ ऑक्टोबर रोजी सायंकाळी सुमारे ७ वाजताच्या सुमारास ते पायी कोराडी देवी मंदिरात दर्शनासाठी गेले होते. दर्शन घेतल्यानंतर ते नवीन कोराडी येथील वंजारी भवन बसस्थानकासमोरील रस्त्यावर आले. रस्ता ओलांडण्यासाठी ते उभे असताना सावनेरकडून नागपूरच्या दिशेने एक चारचाकी वाहन भरधाव वेगाने येत होते. या वाहनाच्या चालकाने वाहन वेगाने आणि निष्काळजीपणे चालविल्याने प्रभाकर भोईटे यांना जोरदार धडक बसली. या धडकेत ते गंभीर जखमी झाले.
उपचारादरम्यान मृत्यू -
अपघातानंतर जखमी प्रभाकर भोईटे यांना उपचारासाठी रुग्णालयात दाखल करण्यात आले. मात्र, उपचार सुरू असताना त्यांची प्राणज्योत मालवली. मंदिरात दर्शन घेऊन परतत असताना झालेल्या या अपघातामुळे त्यांच्या कुटुंबीयांवर दुःखाचा डोंगर कोसळला.
चालक घटनास्थळावरून पसार -
वृद्धाला धडक दिल्यानंतर संबंधित चारचाकी वाहनाचा चालक घटनास्थळी न थांबता पळून गेला. या घटनेची माहिती मिळाल्यानंतर कोराडी पोलिसांनी प्रकरणाची नोंद घेतली. प्रभाकर भोईटे यांच्या मृत्यूस कारणीभूत ठरलेल्या वाहनचालकाविरुद्ध गुन्हा दाखल करण्यात आला असून, या प्रकरणाचा पुढील तपास कोराडी पोलीस करीत आहेत. भरधाव आणि निष्काळजी वाहनचालकांमुळे पादचाऱ्यांच्या सुरक्षिततेचा प्रश्न पुन्हा ऐरणीवर आला आहे. रस्त्यावरून जाताना वाहनचालकांनी वेगावर नियंत्रण ठेवून वाहतुकीच्या नियमांचे पालन करणे आवश्यक असल्याचे या घटनेतून अधोरेखित होते.
