विदर्भ न्यूज एक्सप्रेस
प्रतिनिधी / भंडारा : संभाव्य अल निनोच्या प्रभावामुळे यावर्षी भंडारा जिल्ह्यात सरासरीपेक्षा कमी पर्जन्यमान झाले आहे. सप्टेंबर २०२६ अखेरपर्यंत पवनी, लाखांदूर व भंडारा या तालुक्यांमध्ये ७५ टक्क्यांपेक्षा कमी पाऊस झाल्याने आगामी काळात चारा टंचाई निर्माण होण्याची शक्यता आहे. या पार्श्वभूमीवर पशुपालकांनी आतापासूनच चारा व्यवस्थापनाचे योग्य नियोजन करावे, असे आवाहन जिल्हा उपआयुक्त, पशुसंवर्धन व दुग्धव्यवसाय, भंडारा डॉ. विलास अशोक गाडगे यांनी केले आहे.

चारा टंचाईवर मात करण्यासाठी पशुपालकांनी रब्बी व उन्हाळी हंगामात जास्तीत जास्त चारा पिकांची लागवड करावी. उपलब्ध असलेल्या चाऱ्याची योग्य पद्धतीने साठवणूक करून त्याचा भविष्यात उपयोग होईल, याची दक्षता घ्यावी. तसेच शेतातील तणीस व इतर पिकांचे अवशेष न जाळता त्यावर योग्य प्रक्रिया करून त्यांची पौष्टिकता वाढवून पशुखाद्य म्हणून उपयोग करावा.

रब्बी व उन्हाळी हंगामात वाळलेला चारा मोठ्या प्रमाणात उपलब्ध होईल, अशा चारा पिकांची प्राधान्याने लागवड करण्याचेही आवाहन करण्यात आले आहे. यामुळे भविष्यातील चारा टंचाईची तीव्रता कमी करण्यास मदत होणार आहे.

चारा बियाण्यांसाठी विहित नमुन्यात अर्ज -
चारा पिकांचे बियाणे मिळविण्यासाठी इच्छुक पशुपालकांनी संबंधित तालुका पशुसंवर्धन व दुग्धव्यवसाय अधिकारी यांच्याकडे विहित नमुन्यात अर्ज सादर करावा. चारा पिकांची निवड, लागवड, साठवणूक तसेच चाऱ्याची पौष्टिकता वाढविण्याबाबत तांत्रिकमार्गदर्शनासाठी जिल्हा किंवा तालुकास्तरीय पशुसंवर्धन विभागाशी संपर्क साधावा, असे आवाहन डॉ. विलास अशोक गाडगे यांनी केले आहे.