Petrol Price
रामकृष्णपूर मध्ये जुगार अड्ड्यावर पोलिसांची धाड : ११ जण जेरबंद
- रोख रक्कम, जुगाराचे साहित्य आणि नऊ दुचाकी जप्त; तब्बल ४ लाख २ हजार २०० रुपयांचा मुद्देमाल ताब्यात
विदर्भ न्यूज एक्सप्रेस
तालुका प्रतिनिधी / आष्टी : तालुक्यातील रामकृष्णपूर येथे सुरू असलेल्या जुगार अड्ड्यावर आष्टी पोलिसांनी धडक कारवाई करत ११ जुगाऱ्यांना रंगेहाथ जेरबंद केले. ही कारवाई ३ ऑक्टोबर रोजी करण्यात आली. या कारवाईत पोलिसांनी रोख रक्कम, जुगाराचे साहित्य तसेच नऊ दुचाकी असा एकूण ४ लाख २ हजार २०० रुपयांचा मुद्देमाल जप्त केला. पोलिसांच्या या कारवाईमुळे रामकृष्णपूर परिसरात खळबळ उडाली आहे.
मिळालेल्या माहितीनुसार, रामकृष्णपूर परिसरात जुगार सुरू असल्याची माहिती आष्टी पोलिसांना मिळाली होती. माहितीच्या आधारे पोलिसांनी नियोजनबद्ध पद्धतीने जुगार अड्ड्यावर धाड टाकली. पोलिसांची कारवाई होताच तेथे जुगार खेळणाऱ्यांची धावपळ उडाली. मात्र, पोलिसांनी ११ जणांना ताब्यात घेतले.
११ जुगाऱ्यांना रंगेहाथ पकडले -
या कारवाईत रतन मंडल, सुब्रजीत बिश्वास, हिमांशु सरदार, बिक्रमजीत सरकार, बिजय सरकार, प्रबिन मंडल, गौतम बिश्वास, सरोजीत सरकार, रंजित सरकार, आशुतोष बिश्वास आणि सुषमय बिश्वास यांना पोलिसांनी ताब्यात घेतले आहे. सर्व आरोपी रामकृष्णपूर, तालुका चामोर्शी येथील रहिवासी असल्याची माहिती पोलिसांनी दिली.
नऊ दुचाकींसह मुद्देमाल जप्त -
जुगार अड्ड्यावर केलेल्या कारवाईदरम्यान पोलिसांनी रोख रक्कम आणि जुगार खेळण्यासाठी वापरले जाणारे साहित्य जप्त केले. याशिवाय घटनास्थळी आढळलेल्या नऊ दुचाकीही पोलिसांनी ताब्यात घेतल्या. रोख रक्कम, जुगाराचे साहित्य आणि दुचाकी मिळून जप्त करण्यात आलेल्या मुद्देमालाची एकूण किंमत ४ लाख २ हजार २०० रुपये आहे.
पोलिसांच्या कारवाईने खळबळ -
रामकृष्णपूर येथे सुरू असलेल्या जुगार अड्ड्यावर पोलिसांनी अचानक धाड टाकल्याने परिसरात खळबळ उडाली. अवैध जुगाराच्या माध्यमातून सुरू असलेल्या गैरप्रकारांवर नियंत्रण मिळविण्यासाठी पोलिसांनी केलेल्या या कारवाईचे परिसरात लक्ष वेधले गेले आहे.
ही कारवाई पोलीस निरीक्षक महेंद्र वाघ यांच्या मार्गदर्शनाखाली करण्यात आली. प्रकरणाचा पुढील तपास पोलीस हवालदार जितेंद्र मुनघाटे करीत आहेत. या प्रकरणात पोलिसांकडून पुढील कायदेशीर प्रक्रिया सुरू आहे.
