प्राथमिक शिक्षकांच्या प्रलंबित प्रश्नांवर प्रशासनाशी सविस्तर चर्चा : पाच प्रमुख मागण्यांवर सकारात्मक आश्वासन

- GPF पावत्या, NPS रक्कम GPF मध्ये वर्ग करणे, आंतरजिल्हा बदलीतील शिक्षकांचे नियमितीकरण, वैद्यकीय प्रतिपूर्ती व चटोपाध्याय वेतनश्रेणीचा प्रश्न ऐरणीवर

विदर्भ न्यूज एक्सप्रेस
प्रतिनिधी /गडचिरोली : गडचिरोली जिल्ह्यातील प्राथमिक शिक्षकांच्या विविध प्रलंबित सेवाविषयक, आर्थिक व प्रशासकीय समस्या तातडीने निकाली काढाव्यात, या प्रमुख मागणीसाठी महाराष्ट्र राज्य प्राथमिक शिक्षक संघ, जिल्हा शाखा गडचिरोलीच्या शिष्टमंडळाने जिल्हा परिषद प्रशासनातील संबंधित अधिकाऱ्यांची प्रत्यक्ष भेट घेऊन विविध प्रश्नांवर सविस्तर चर्चा व पाठपुरावा केला. यावेळी शिक्षकांच्या पाच प्रमुख प्रलंबित प्रश्नांवर सकारात्मक चर्चा होऊन संबंधित अधिकाऱ्यांकडून कार्यवाहीचे आश्वासन देण्यात आले.

५ ऑगस्ट २०२६ रोजी झालेल्या या भेटीत मुख्य लेखा तथा वित्त अधिकारी चौधरी, शिक्षणाधिकारी पवार, उपशिक्षणाधिकारी परसावार, वेतन अधीक्षक जल्लेवार तसेच मा. सहाय्यक प्रशासन अधिकारी वैद्य यांच्याशी शिक्षकांच्या प्रलंबित प्रश्नांबाबत सविस्तर चर्चा करण्यात आली.

२०२५-२६ च्या GPF पावत्यांचा प्रश्न -
शिक्षकांच्या सन २०२५-२०२६ च्या भविष्य निर्वाह निधी (GPF) पावत्या अद्याप उपलब्ध झालेल्या नसल्याने त्या तातडीने उपलब्ध करून देण्याची मागणी शिष्टमंडळाने केली. यावर मुख्य लेखा तथा वित्त अधिकारी चौधरी यांनी पुढील दहा दिवसांत GPF पावत्या उपलब्ध करून देण्यात येतील, असे आश्वासन दिले.

२३७ शिक्षकांच्या NPS रकमेचा GPF मध्ये वर्ग करण्यासाठी पाठपुरावा -
नोव्हेंबर २००५ पूर्वी जाहिरातीनुसार भरती व नियुक्त झालेल्या आणि शासनाने जुनी पेन्शन योजना लागू केलेल्या २३७ शिक्षकांच्या NPS खात्यातील रक्कम GPF खात्यात त्वरित वर्ग करण्यात यावी, अशी महत्त्वपूर्ण मागणी यावेळी करण्यात आली.

या विषयावर मुख्य लेखा तथा वित्त अधिकारी चौधरी यांच्याशी चर्चा केली असता, आतापर्यंत प्राप्त झालेल्या प्रस्तावांपैकी सुमारे १४० शिक्षकांचे प्रस्ताव शासनाकडे पाठविण्यात आले असल्याचे सांगण्यात आले. उर्वरित शिक्षकांचे प्रस्ताव प्राप्त होताच तेही विलंब न करता शासनाकडे पाठविण्यात येतील, असे आश्वासन देण्यात आले.

आंतरजिल्हा बदलीने आलेल्या शिक्षकांच्या नियमितीकरणाचा मुद्दा -
गडचिरोली जिल्ह्यात आंतरजिल्हा बदलीने आलेल्या शिक्षकांना सेवेत नियमित करण्याचा प्रश्नही शिष्टमंडळाने शिक्षण विभागासमोर मांडला. याबाबत शिक्षणाधिकारी पवार यांनी संबंधित शिक्षकांचे प्रस्ताव मागविण्यासाठी जिल्ह्यातील सर्व पंचायत समित्यांना तातडीने पत्र पाठविण्यात येईल, असे आश्वासन दिले.

थकीत वैद्यकीय प्रतिपूर्ती व इतर देयके लवकरच अदा करण्याचे आश्वासन -
जिल्ह्यातील प्राथमिक शिक्षकांची थकीत वैद्यकीय प्रतिपूर्तीची देयके तसेच इतर प्रलंबित देयके तातडीने अदा करण्याची मागणीही करण्यात आली. यामध्ये मारोती वनकर सर, दीपक केंद्रे सर यांच्यासह इतर शिक्षकांच्या प्रलंबित देयकांचा मुद्दा उपस्थित करण्यात आला.

यावर जिल्हा परिषद शिक्षण विभागाकडे प्राप्त झालेली मागणी व देयके तपासून लवकरात लवकर संबंधित शिक्षकांना देयके अदा करण्यात येतील, असे आश्वासन संबंधित अधिकाऱ्यांनी दिले.

१२ वर्षे सेवा पूर्ण केलेल्या शिक्षकांना चटोपाध्याय वेतनश्रेणी -
१२ वर्षांची सेवा पूर्ण झालेल्या उर्वरित शिक्षकांना चटोपाध्याय वेतनश्रेणी तातडीने लागू करण्यात यावी, अशी मागणीही संघटनेच्या शिष्टमंडळाने केली. यावर शिक्षण विभागाकडे प्राप्त झालेल्या प्रस्तावांतील पात्र शिक्षकांना लवकरच चटोपाध्याय वेतनश्रेणी लागू करण्यात येईल, असे आश्वासन देण्यात आले.

शिक्षकांच्या प्रश्नांसाठी सातत्याने पाठपुरावा -
शिक्षकांच्या सेवाविषयक आणि आर्थिक प्रश्नांकडे प्रशासनाने सकारात्मक दृष्टिकोनातून पाहून त्यांची तातडीने अंमलबजावणी करावी, अशी भूमिका महाराष्ट्र राज्य प्राथमिक शिक्षक संघाच्या वतीने यावेळी मांडण्यात आली. अधिकाऱ्यांनी दिलेल्या आश्वासनांची पूर्तता होण्यासाठी संघटनेच्या माध्यमातून पुढील काळातही सातत्याने पाठपुरावा करण्यात येणार असल्याचे संघाच्या पदाधिकाऱ्यांनी स्पष्ट केले.

या भेटीप्रसंगी महाराष्ट्र राज्य प्राथमिक शिक्षक संघ, जिल्हा गडचिरोलीचे जिल्हाध्यक्ष रघुनाथ भांडेकर, जिल्हा कोषाध्यक्ष राजेश चिल्लमवार, चामोर्शी तालुका युवा आघाडी प्रमुख जगदिश कळाम, सिरोंचा तालुका माजी अध्यक्ष साईनाथ सोनटक्के, सुरेश दुरकीवार, संजय कुमरे, गणेश वाघाडे, संतोष कुमरे, सरिता कातलामी मॅडम, शालु मेटे मॅडम यांच्यासह शिक्षक बंधू-भगिनी उपस्थित होते.

शिक्षकांच्या प्रलंबित प्रश्नांवर प्रशासनाशी थेट चर्चा करून त्यावर कार्यवाहीसाठी पाठपुरावा करण्यात आल्याने संबंधित शिक्षकांमध्ये प्रश्न मार्गी लागण्याबाबत अपेक्षा निर्माण झाली आहे.