महत्वाच्या बातम्या

आ. विनोद अग्रवाल यांच्या पाठपुराव्याला यश : गोंदिया विधानसभा क्षेत्रातील जि.प. शाळांसाठी ३४ अतिरिक्त वर्गखोल्यांना मंजुरी

- वर्गखोल्यांच्या बांधकामासाठी ५.२७ कोटी, तर शाळांच्या दुरुस्ती कामांसाठी २ कोटींचा निधी मंजूर

विदर्भ न्यूज एक्सप्रेस
प्रतिनिधी / गोंदिया : गोंदिया विधानसभा क्षेत्रातील जिल्हा परिषद शाळांच्या शैक्षणिक सुविधांना मोठी चालना मिळणार आहे. आमदार विनोद अग्रवाल यांच्या सातत्यपूर्ण प्रयत्नांमुळे आणि प्रभावी पाठपुराव्यामुळे क्षेत्रातील जर्जर व अपुऱ्या वर्गखोल्यांच्या समस्येवर तोडगा काढण्यासाठी ३४ अतिरिक्त वर्गखोल्यांना मंजुरी मिळाली आहे.

समग्र शिक्षा अभियान २०२६-२०२७ अंतर्गत या अतिरिक्त वर्गखोल्यांच्या बांधकामासाठी ५ कोटी २७ लाख रुपयांचा निधी मंजूर करण्यात आला आहे. तसेच गोंदिया विधानसभा क्षेत्रातील इतर जिल्हा परिषद शाळांमधील आवश्यक दुरुस्ती व देखभाल कामांसाठी सुमारे २ कोटी रुपयांचा निधी मंजूर करण्यात आला आहे. या निर्णयामुळे ग्रामीण भागातील हजारो विद्यार्थ्यांना सुरक्षित, आधुनिक आणि सुविधायुक्त शैक्षणिक वातावरण उपलब्ध होणार आहे.

मुंबई येथे सुरू असलेल्या महाराष्ट्र विधानसभेच्या पावसाळी अधिवेशनादरम्यान आमदार विनोद अग्रवाल यांनी राज्याचे शालेय शिक्षण मंत्री दादा भुसे यांच्याशी चर्चा करून गोंदिया विधानसभा क्षेत्रातील जिल्हा परिषद शाळांची वास्तविक परिस्थिती त्यांच्या निदर्शनास आणून दिली होती.

क्षेत्रातील अनेक शाळांमध्ये वाढती विद्यार्थी संख्या, जुन्या झालेल्या इमारती आणि अपुऱ्या वर्गखोल्यांमुळे शिक्षण व्यवस्थेवर परिणाम होत असल्याचे आमदार अग्रवाल यांनी सांगितले. अनेक ठिकाणी विद्यार्थ्यांना मर्यादित सुविधांमध्ये शिक्षण घ्यावे लागत असल्याने गुणवत्तापूर्ण शिक्षण देण्यात अडचणी निर्माण होत असल्याचे त्यांनी स्पष्ट केले.

शालेय शिक्षण विभागाकडून राज्यस्तरावर अतिरिक्त वर्गखोल्यांसाठी निधीची उपलब्धता मर्यादित असल्याने अनेक प्रस्ताव प्रलंबित असल्याचे सांगण्यात आले होते. मात्र, आमदार विनोद अग्रवाल यांनी गोंदिया विधानसभा क्षेत्रातील विद्यार्थ्यांच्या हिताला प्राधान्य देत सातत्याने पाठपुरावा केला. क्षेत्रातील शाळांची गरज आणि वस्तुस्थिती त्यांनी शासनासमोर प्रभावीपणे मांडली.

या प्रयत्नांनंतर शालेय शिक्षण मंत्री दादा भुसे यांनी गोंदिया विधानसभा क्षेत्रातील प्रस्तावांना विशेष प्राधान्य देत ३४ अतिरिक्त वर्गखोल्यांना मंजुरी दिली. या वर्गखोल्यांच्या बांधकामासाठी ५.२७ कोटी रुपयांचा निधी उपलब्ध करून देण्यात आला असून, शाळांच्या दुरुस्ती व देखभाल कामांसाठी २ कोटी रुपयांची तरतूद करण्यात आली आहे.

या शाळांना मिळणार अतिरिक्त वर्गखोल्या -
प्रत्येक शाळेसाठी दोन अतिरिक्त वर्गखोल्या मंजूर करण्यात आल्या आहेत. यामध्ये पुढील शाळांचा समावेश आहे : जि.प. उच्च प्राथमिक शाळा रतनारा, डांगुर्ली, कोचेवाही, मोगर्रा, हिवरा, वाढेगाव, हालबीटोला, परसवाडा, कासा, देवरी, दतोरा, टांडा, रावणवाडी, सतोना, खमारी मुली, तुमखेडा प्रशासकीय प्रक्रियेनुसार या सर्व प्रस्तावांना केंद्र शासनाकडून अंतिम प्रशासकीय मान्यता मिळाल्याची माहिती देण्यात आली आहे. राज्यात निधीची मर्यादित उपलब्धता असतानाही गोंदिया विधानसभा क्षेत्रासाठी मिळालेली ही मंजुरी महत्त्वपूर्ण उपलब्धी मानली जात आहे.

आमदार विनोद अग्रवाल म्हणाले, शिक्षण ही समाजाच्या विकासाची सर्वात मजबूत पायाभरणी आहे. गोंदिया विधानसभा क्षेत्रातील प्रत्येक विद्यार्थ्याला चांगले शैक्षणिक वातावरण आणि आवश्यक सुविधा मिळणे हा माझा प्रयत्न आहे. अतिरिक्त वर्गखोल्यांच्या बांधकामासाठी ५.२७ कोटी रुपये आणि शाळांच्या दुरुस्तीसाठी २ कोटी रुपयांचा निधी मंजूर होणे ही विद्यार्थ्यांच्या उज्ज्वल भविष्यासाठी महत्त्वाची पायरी आहे.

ते पुढे म्हणाले, क्षेत्रातील कोणतीही शाळा मूलभूत शैक्षणिक सुविधांपासून वंचित राहू नये यासाठी माझे प्रयत्न सुरू राहतील. शिक्षण आणि विकासासाठी माझा संघर्ष कायम सुरू राहील. शिक्षणाचा मजबूत पाया तयार झाल्यासच विकसित गोंदिया आणि विकसित महाराष्ट्राची निर्मिती शक्य आहे.

या निर्णयासाठी आमदार विनोद अग्रवाल यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार तसेच शालेय शिक्षण मंत्री दादा भुसे यांचे आभार मानले. राज्य सरकारच्या सहकार्यामुळे गोंदिया विधानसभा क्षेत्रातील शिक्षणासह विविध विकासकामांना गती मिळत असल्याचे त्यांनी सांगितले.

दरम्यान, अतिरिक्त वर्गखोल्यांच्या बांधकामासह शाळांच्या दुरुस्ती कामांसाठी मंजूर झालेल्या निधीचे शिक्षक, पालक आणि नागरिकांनी स्वागत केले आहे. या निर्णयामुळे ग्रामीण भागातील विद्यार्थ्यांना सुरक्षित आणि गुणवत्तापूर्ण शिक्षणासाठी आवश्यक सुविधा उपलब्ध होतील, अशी अपेक्षा व्यक्त करण्यात येत आहे.