महत्वाच्या बातम्या

 केंद्र सरकारच्या शेतकरी हिताच्या योजनांचा लाभ घ्या : आर्थिक मदतीपासून पीक विम्यापर्यंत विविध सुविधा – डॉ. प्रणय खुणे यांचे आवाहन


विदर्भ न्यूज एक्सप्रेस 
प्रतिनिधी / गडचिरोली : देशातील शेतकऱ्यांचे उत्पन्न वाढावे, शेतीवरील आर्थिक संकट कमी व्हावे आणि आधुनिक शेतीला प्रोत्साहन मिळावे, यासाठी केंद्र सरकारने गेल्या काही वर्षांत अनेक महत्त्वाचे निर्णय घेतले आहेत. पंतप्रधान नरेंद्र मोदी यांच्या नेतृत्वाखाली केंद्र सरकारच्या वतीने सुरू करण्यात आलेल्या आणि विस्तारलेल्या पाच महत्त्वाच्या योजनांचा शेतकऱ्यांना फायदा होत आहे. या योजनांमधून थेट आर्थिक मदत, पीक विमा, कर्ज सुविधा, माती परीक्षण आणि सिंचनासाठी मदत उपलब्ध करून देण्याचा प्रयत्न करण्यात आला आहे

१. पीएम किसान सन्मान निधी योजना -
२०१९ मध्ये सुरू झालेल्या या योजनेअंतर्गत पात्र शेतकरी कुटुंबांना दरवर्षी ६ हजार रुपये दिले जातात. प्रत्येकी २ हजार रुपयांचे तीन हप्ते थेट बँक खात्यात जमा होतात. बियाणे, खते आणि शेतीच्या छोट्या खर्चासाठी या पैशांचा उपयोग होऊ शकतो.

२. प्रधानमंत्री पीक विमा योजना -
२०१६ मध्ये सुरू झालेल्या या योजनेतून नैसर्गिक आपत्तींमुळे पिकांचे नुकसान झाल्यास विमा संरक्षण मिळते. दुष्काळ, अतिवृष्टी, गारपीट आणि काही स्थानिक आपत्तींचा यामध्ये समावेश होतो. पात्रतेनुसार नुकसान भरपाई दिली जाते. त्यामुळे संकटाच्या काळात शेतकऱ्यांना आर्थिक आधार मिळू शकतो.

३. किसान क्रेडिट कार्ड -
शेतकऱ्यांना शेतीसाठी वेळेवर कर्ज मिळावे यासाठी किसान क्रेडिट कार्ड सुविधा महत्त्वाची आहे. २०२५-२६ पासून सुधारित व्याज सवलत योजनेअंतर्गत पीक कर्जाची मर्यादा ३ लाखांवरून ५ लाख रुपये करण्यात आली. पात्र शेतकऱ्यांना वेळेवर परतफेड केल्यास अतिरिक्त व्याज सवलतीचाही लाभ मिळू शकतो.

४. मृदा आरोग्य पत्रिका योजना -
२०१५ मध्ये सुरू झालेल्या या योजनेत शेतातील मातीची तपासणी करून जमिनीतील पोषक घटकांची माहिती दिली जाते. कोणत्या खताची किती गरज आहे, हे समजण्यास मदत होते. त्यामुळे अनावश्यक खतांचा वापर आणि उत्पादन खर्च कमी करण्यास मदत होऊ शकते.

५. प्रधानमंत्री कृषी सिंचन योजना -
२०१५ मध्ये सुरू झालेल्या या योजनेतून ठिबक सिंचन, तुषार सिंचन आणि जलसंधारणाला प्रोत्साहन दिले जाते. कमी पाण्यात अधिक कार्यक्षम पद्धतीने शेती करण्यासाठी या सुविधांचा उपयोग होतो. पात्र शेतकऱ्यांना नियमांनुसार अनुदानही मिळू शकते.

या पाच योजनांमुळे शेतकऱ्यांना आर्थिक मदत, कर्ज, विमा आणि सिंचनाच्या सुविधा उपलब्ध झाल्या आहेत. मात्र योजनांचा लाभ प्रत्येक पात्र शेतकऱ्यानी घ्यावा, तसेच पीक विम्याची भरपाई मिळत आहे, शेती फायदेशीर आणि शेतकरी आर्थिकदृष्ट्या सक्षम होण्यासाठी या सर्व बाबींची प्रभावी अंमलबजावणी मोठ्या प्रमाणात होत आहे. तरी शेतकऱ्यांनी या समस्त योजणांचा लाभ घ्यावा. असे आवाहन भाजपा जिल्हा उपाध्यक्ष डॉ. प्रणय भाऊ खुणे यांनी केले आहे.





  Print






Related Photos