भरधाव पिकअपच्या धडकेत पाच वर्षीय चिमुकलीचा मृत्यू : आई-वडील व भाऊ गंभीर जखमी


- जांभळी-नवाटोला मार्गावरील भीषण अपघात; धडक देऊन पिकअप चालक फरार, सालेकसा पोलिसांत गुन्हा दाखल
विदर्भ न्यूज एक्सप्रेस
प्रतिनिधी / गोंदिया : भरधाव वेगाने जाणाऱ्या पिकअप वाहनाने दुचाकीला जोरदार धडक दिल्याने झालेल्या भीषण अपघातात पाच वर्षीय चिमुकलीचा मृत्यू झाला, तर तिचे आई-वडील आणि तीन वर्षीय भाऊ गंभीर जखमी झाले. ही घटना सालेकसा पोलिस ठाण्याच्या हद्दीतील जांभळी ते नवाटोला मार्गावर शनिवारी (१४ नोव्हेंबर) दुपारी १२.४५ वाजताच्या सुमारास घडली. रियांशी हिवराज बल्हारे (वय ५, रा. घनसुवाबोरी, ता. सालेकसा) असे मृत चिमुकलीचे नाव आहे. अपघातानंतर पिकअप चालक वाहनासह घटनास्थळावरून फरार झाला.
पोलिसांकडून मिळालेल्या माहितीनुसार, हेमंत सुखदास बसोने (वय ३१, रा. घनसुवाबोरी) यांनी या अपघातासंदर्भात तक्रार दाखल केली आहे. त्यांचे काका हिवराज कन्हैया बल्हारे (वय ३५), त्यांची पत्नी कविता हिवराज बल्हारे (वय ३०), मुलगा प्रियांश (वय ३) आणि मुलगी रियांशी (वय ५) हे शेजारच्या छत्तीसगड राज्यातील राजनांदगाव जिल्ह्यातील चौकीटोला-बोरतलाव येथून दुचाकीने आपल्या घनसुवाबोरी या गावी परत येत होते.
दरम्यान, जांभळी ते नवाटोला मार्गावर समोरून किंवा मागून आलेल्या अज्ञात पिकअप वाहनाच्या चालकाने भरधाव वेगाने व निष्काळजीपणे वाहन चालवून त्यांच्या दुचाकीला जोरदार धडक दिली. या धडकेत दुचाकीवरील हिवराज बल्हारे, कविता बल्हारे आणि प्रियांश हे तिघे गंभीर जखमी झाले, तर पाच वर्षीय रियांशीचा मृत्यू झाला. अपघातामुळे परिसरात हळहळ व्यक्त करण्यात येत आहे.
अपघात घडल्यानंतर पिकअप वाहनचालक घटनास्थळावर न थांबता वाहनासह पळून गेला. जखमींना तातडीने उपचारासाठी रुग्णालयात दाखल करण्यात आले. या घटनेमुळे बल्हारे कुटुंबावर दुःखाचा डोंगर कोसळला आहे.
या प्रकरणी सालेकसा पोलिसांनी अज्ञात पिकअप वाहनचालकाविरुद्ध भारतीय न्याय संहितेच्या कलम १०६(१), २८१, १२५(अ), १२५(ब) तसेच मोटार वाहन कायद्याच्या कलम १८४, १३४(अ), १३४(ब) आणि १८७ अन्वये गुन्हा दाखल केला आहे. फरार वाहनचालकाचा शोध घेण्यासह पुढील तपास सालेकसा पोलिसांकडून सुरू आहे.




Petrol Price




