गायींच्या कळपावर वाघाचा हल्ला : एक गाय ठार, दोन गंभीर जखमी


- शंकरपूर बिटातील कंपार्टमेंट क्रमांक २८४ मधील घटना : मारकबोडी परिसरातही वाघाचे वारंवार दर्शन, शेतकरी व पशुपालकांमध्ये दहशत
विदर्भ न्यूज एक्सप्रेस
तालुका प्रतिनिधी / वडसा : देसाईगंज तालुक्यात वन्यप्राण्यांचा उपद्रव दिवसेंदिवस वाढत असून, वाघाच्या हल्ल्यांमुळे शेतकरी आणि पशुपालकांमध्ये भीतीचे वातावरण निर्माण झाले आहे. जंगलालगतच्या परिसरात पाळीव जनावरांवर हल्ले होण्याच्या घटनांमध्ये वाढ होत असतानाच, शनिवार, १४ नोव्हेंबर रोजी शंकरपूर बिटातील जंगल परिसरात वाघाने गायींच्या कळपावर हल्ला केला. या हल्ल्यात एक गाय जागीच ठार झाली, तर अन्य दोन गायी गंभीर जखमी झाल्या. या घटनेमुळे परिसरातील पशुपालकांमध्ये चिंतेचे वातावरण पसरले आहे.
मिळालेल्या माहितीनुसार, विठ्ठलगाव येथील गुराखी ओमप्रकाश दुधकूवर हे नेहमीप्रमाणे गायींचा कळप घेऊन जंगल परिसरात गेले होते. यावेळी शंकरपूर फॉरेस्ट बिटातील कंपार्टमेंट क्रमांक २८४ च्या हद्दीत दबा धरून बसलेल्या वाघाने अचानक गायींच्या कळपावर हल्ला चढविला. या हल्ल्यात सुरेश कुकूडकार (रा. पोटगाव) यांच्या मालकीची गाय वाघाच्या हल्ल्यात ठार झाली. तर रुपचंद मेश्राम (रा. पोटगाव) आणि केवळराम दुधकूवर (रा. विठ्ठलगाव) यांच्या मालकीच्या प्रत्येकी एका गायीला गंभीर दुखापत झाली. घटनेची माहिती मिळताच शंकरपूर येथील वनरक्षक दहिकर यांनी घटनास्थळी धाव घेतली. त्यांनी घटनेचा पंचनामा करून पुढील कार्यवाही सुरू केली. वाघाच्या हल्ल्यात पशुधनाचे नुकसान झाल्याने संबंधित पशुमालकांना आर्थिक फटका बसला असून, वनविभागाने नुकसानभरपाईची प्रक्रिया लवकर पूर्ण करावी, अशी अपेक्षा व्यक्त होत आहे.
वारंवार हल्ल्यांमुळे पशुपालकांमध्ये भीती -
शंकरपूर बिटातील जंगल परिसरात यापूर्वीही वाघाने पाळीव जनावरांवर हल्ले करून त्यांना ठार केल्याच्या घटना घडल्या आहेत. त्यामुळे या भागात वाघाचा वावर वाढल्याची चर्चा नागरिकांमध्ये सुरू आहे. वारंवार होणाऱ्या हल्ल्यांमुळे शेतकरी, गुराखी आणि पशुपालकांना जनावरे चराईसाठी जंगल परिसरात घेऊन जाणे धोकादायक वाटू लागले आहे. परिणामी, शेतीशी संबंधित कामांवरही या दहशतीचा परिणाम होत आहे.
मारकबोडी परिसरात पुन्हा वाघाचे दर्शन -
दरम्यान, गडचिरोली तालुक्यातील मारकबोडी जंगल परिसरातही वाघाच्या सततच्या दर्शनामुळे शेतकरी आणि ग्रामस्थांमध्ये भीतीचे वातावरण निर्माण झाले आहे. सुमारे दहा दिवसांपूर्वी गुरवळा मार्गावरील मारकबोडी फाट्यावरून जाणाऱ्या काही दुचाकीस्वारांना वाघाचे प्रत्यक्ष दर्शन झाले होते. ही घटना ताजी असतानाच शनिवारी पुन्हा याच मार्गाने मारकबोडीकडे जाणाऱ्या दुचाकीस्वारांना वाघ दिसून आला. एकाच परिसरात वारंवार वाघाचे दर्शन होत असल्याने या मार्गावरून प्रवास करणाऱ्या नागरिकांमध्ये भीती वाढली आहे. विशेषतः सकाळी आणि सायंकाळी शेतात जाणारे शेतकरी, शेतमजूर तसेच दुचाकीस्वारांमध्ये असुरक्षिततेची भावना निर्माण झाली आहे.
वनविभागाने उपाययोजना करण्याची मागणी -
देसाईगंज तालुक्यातील शंकरपूर परिसरात पशुधनावर वाघाचे हल्ले, तर गडचिरोली तालुक्यातील मारकबोडी परिसरात वारंवार होणारे दर्शन या घटनांमुळे वन्यप्राणी आणि मानवी वस्ती यांच्यातील संघर्षाचा प्रश्न पुन्हा ऐरणीवर आला आहे. वनविभागाने प्रभावित गावांमध्ये गस्त वाढवावी, नागरिकांना सतर्कतेच्या सूचना द्याव्यात आणि वाघाच्या हालचालींवर लक्ष ठेवण्यासाठी आवश्यक उपाययोजना कराव्यात, अशी मागणी शेतकरी व ग्रामस्थांकडून होत आहे. वन्यप्राण्यांच्या वाढत्या वावरामुळे नागरिकांच्या सुरक्षिततेबरोबरच पशुधनाचे संरक्षण करण्याचे आव्हानही वनविभागासमोर उभे राहिले आहे. त्यामुळे प्रशासनाने या घटनांची गांभीर्याने दखल घेऊन ठोस उपाययोजना करणे आवश्यक झाले आहे.




Petrol Price




